Panda Ovituwa Via Jeova Nomutima Auho

1. (a) Ovituwa patyi via Jeova Ovakristau vesukisa okuhinangela? (b) Okulilongesa ovituwa via Huku matyituetela ouwa patyi?

TYINA usoka ku Jeova, uhinangela ovituwa patyi? Ovanyingi puonthue tuhinangela oluembia, nouviuki, nounongo, nepondolo. Mahi, tutyii okuti Jeova una ovituwa ovinyingi oviwa. Tyotyili, tupondola okuvalula ovituwa vilamba po 40 vielikalela Jeova ena, iya aviho viapopiwale momikanda vietu. Nkhele soka ovipuka ovinyingi vihuvisa konthele ya Jeova tupondola okulilongesa melilongeso lietu lioulike no liombunga! Ouwa patyi tupondola okupola kelilongeso olio? Lipondola okutukuatesako okupanda vali unene Tate yetu keulu. Tyina tuamalingi ngotyo, ehando lietu liokufuena kwe nokumuhetekela, nalio maliliyawisa.—Josué 23:8; Salmo 73:28.

2. (a) Ava ongeleka ilekesa oñgeni tupondola okupanda vali ovituwa via Jeova. (b) Oityi matulilongesa?

² Mahi, “okupanda” otyipuka tyimwe tyihangununa tyi? Monthele ei, ondaka oyo ihangununa okuimbuka esilivilo liotyipuka tyimwe. Okupanda otyipuka tyimwe tyipondola okuliyawisa katutu-katutu. Mongeleka, opo tupande okulia tuehenelie, tete tuiva omuniko wao, nokukumakela, iya konyima atukuteleka. Tyelifwa notyo, okupanda ovituwa via Jeova, tyiliyawisa tyina tuvinoñgonoka, nokuvisokolola, nokuvihetekela. (Efésios 5:1) Onthele ei, no nonkhuavo onombali mambulandulako, mbalingwa pala okutukuatesako okupanda vali ovituwa via Huku tuahasoko unene, ngetyi tusoka kovikuavo. Matulilongesa: Oityi kese tyimwe tyihangununa? Oñgeni Jeova etyilekesa? Iya oñgeni tupondola okuhetekela ovituwa ovio via Jeova?

JEOVA WAPEPUKA OMUTIMA

3, 4. (a) Kuove omunthu wapepuka omutima ukahi ñgeni? (b) Oñgeni Jeova alekesa okuti wapepuka omutima?

³ Tete matupopi konthele yokupepuka omutima. Kuove omunthu wapepuka omutima ukahi ñgeni? Upondola okupopia okuti, ‘omunthu wapepuka omutima una ohole, nokuapwa elundo, nokuhepuiya okutomphola nae.’ Tupondola okuimbuka inkha omunthu wapepuka omutima ine kapepukile omutima, pokutehelela etyi apopia nokutala oñgeni otyipala tyae tyikala, noñgeni eliviya ine eliminya, novikuavo vali.

⁴ Oñgeni Jeova alekesa okuti wapepuka omutima? Namphila Jeova Omutungi wouye auho, nokuna epondolo enene, utukalesa nonthumbi yokuti wafuapo, iya uhanda okutehelela nokukumbulula omalikuambelo etu. (Tanga Salmo 145:18; Isaías 30:18, 19.) Tupondola okupopia na Huku momuvo tuhanda ine omphangu tuhanda. Tupondola okufuena kwe tyehena owoma, okunoñgonoka okuti kametukandukila. (Salmo 65:2; Tiago 1:5) Ondaka ya Huku ipopia konthele ya Jeova monkhalelo ilekesa okuti uhanda tufuene kwe. Mongeleka, omuhoneki wono salmu David wahonekele okuti “omaiho a Jeova” etutala iya “okulio kwae” kutukuata. (Salmo 34:15; 63:8) Omuuli Isaia waelekele Jeova nomunthita, wati: “Nokuoko kwae makaongolola onongi, nokumbutyinda ponkhondo.” (Isaías 40:11) Nkhele soka! Jeova uhanda tukale ponthele yae ngetyi omunthita atyinda ongi yae ponkhondo. Tyotyili, Tate yetu wapepuka unene omutima! Oñgeni tupondola okuhetekela Jeova?

OTYITUWA TYAKOLELA UNENE

5. Omokonda yatyi ovakulu vewaneno vesukisila okukala nomutima wapepuka?

⁵ Onombangi vokuna ombili vakala movilongo vielikalela, vapulilwe okuti: “Otyituwa patyi ove uhole vali komukulu weuaneno?” Ovanyingi vakumbululile okuti, “Okuapepuka omutima.” Tyotyili, Ovakristau aveho vesukisa okukala notyituwa otyo, mahi haunene ovakulu vewaneno vesukisa okupepuka omutima. (Isaías 32:1, 2) Omphange umwe wapopia omokonda yatyi asokela okuti otyituwa otyo tyakolela, wati: “Matutyivili vala okupola ouwa kovituwa ovikuavo oviwa viomukulu weuaneno inkha ukala nomutima wapepuka.” Wetyiiva etyi tyapopia omphange oo? Mahi, oityi tyikalesa omunthu nomutima wapepuka?

6. Oityi omunthu ena okulinga opo akale nomutima wapepuka?

⁶ Opo omunthu akale nomutima wapepuka wesukisa okusuka navakuavo. Inkha omukulu weuaneno usuka navakuavo, nokukala tyafuapo opo evekuateseko, ovakuatate vae no nomphange, okukutikinyamo ovakuendye novahikuena, mavetyimono. (Marcos 10:13-16) Carlos wokuna omanima 12, wati: “Mondyuo yomaliongiyo, ndyitala ovakulu vewaneno tyina vayola, nokutomphola nawa, iya ndyityihole unene.” Tyotyili, omukulu weuaneno kapondola okupopia vala okuti wapepuka omutima, mahi una okutyilekesa. (1 João 3:18) Oñgeni apondola okutyilinga?

7. Omokonda yatyi olapela apeho itukuatesako okutomphola novanthu, iya otyo tyitulongesa tyi?

⁷ Soka kongeleka ei. Omukuatate umwe ankho una olapela yae etyi ekahi nokutunda kotyonge okuenda nokeumbo no aviau. Etyi omuundapi umwe wo aviau amona olapela yae yahonekwa “Ouhamba wa Huku Uye!”, wapopila omukuatate okuti, “Eenga, uye umwe, tuna okutomphola vali konthele yotyo.” Konyima avatomphola, iya omuundapi etavela omikanda. Ovanyingi puonthue tuna ongeleka ngoyo. Mahi, omokonda yatyi olapela apeho itukuatesako okutomphola novanthu? Omokonda, ikahi ngatyina ipopila ovanthu okuti: “Mupondola okuya okupopia naame. Mphulei opi ndyenda nako.” Olapela enyingilikilo lilekesa ovanthu okuti tuhanda okuvepopila omatavelo etu. Tupu, Ovakristau ovakulu vewaneno vesukisa okukala nomanyingilikilo apopila ovakuatate vavo okuti: “Mupondola okuya okupopia naame.” Oñgeni vapondola okutyilinga?

8. Oñgeni ovakulu vewaneno valekesa okuti tyilityili vesuka navakuavo, iya oñgeni otyo tyikalesa ewaneno?

⁸ Ovilongo vina ovituwa vielikalela, mahi, tyina tuyolela ovakuatate vetu no nomphange, nokuvekuatesapo nehambu, atuehevekukunya vala otyo tulamba, tulekesa okuti tusuka unene navo. Olie una okuhimbika okutyilinga? Tala ongeleka ya Jesus. Mateus wapopile okuti Jesus ankho ukahi meliongiyo novalongwa vae iya “afuene ponthele yavo apopi navo.” (Mateus 28:18) Tupu hono, ovakulu vewaneno, ovo vatetekela okufuena kovakuatate vavo nokutomphola navo. Oñgeni otyo tyipondola okukalesa ewaneno? Omphange umwe omukokoli-ndyila una omanima 88, wati: “Tyina ndyinyingila Mondyuo Yomaliongiyo iya ovakulu vewaneno avandyolela, nokumphopila onondaka mbupameka, ndyihambukwa unene.” Omphange omukuavo wati: “Tyikahi ngoti otyipuka otyitutu, mahi tyina ndyenda keliongiyo, omukulu weuaneno andiepesa otyo andyolela, ndyilitehelela nawa.”

OVOLA OMUVO WOKUTOMPHOLA NOVAKUATATE NONOMPHANGE

9, 10. (a) Ongeleka patyi ongwa Jeova aava? (b) Oñgeni ovakulu vewaneno vapondola okuhetekela Jeova?

⁹ Tyotyili, inkha tuhanda vakuetu vatomphole nawa nonthue, tuesukisa okuovola omuvo wokukala navo. Jeova ongeleka ongwa pala onthue. Ombimbiliya yati: “Huku kekahi kokule na kese umwe puonthue.” (Atos 17:27) Onkhalelo imwe ovakulu vewaneno vapondola okuhetekela Jeova, omokutomphola novakuatate vavo, no nomphange, novana novakulu, tyina omaliongiyo ehenehimbike, na tyina amapu. Omukuatate umwe omukokoli-ndyila wati: “Tyina omukulu weuaneno amphula inkha ndyili nawa, iya atehelela ekumbululo liange, ndyilitehelela okuti unthyole.” Omphange umwe uumbilale Jeova omanima ehungi po 50, wati: “Tyina ovakulu vewaneno vatomphola naame konyima yeliongiyo, ndyilitehelela okuti venthyole.”

¹⁰ Tyotyili, Ovakristau ovakulu vewaneno vena ovilinga ovikuavo. Mahi, momaliongiyo tete vena okusuka novakuatate no nomphange.

JEOVA UTUPU OKAPUNGULULA

11, 12. (a) Okuhakala nokapungulula tyihangununa tyi? (b) Oñgeni Jeova etuavela ongeleka yokuhakala nokapungulula?

¹¹ Okuhena okupungulula otyituwa otyikuavo otyiwa Jeova ena. Okuhakala nokapungulula tyihangununa tyi? Tyakutikinya okukala omuviuki, okuhatale kotyivala, nokolupe ine okuhakala nokaamenena. Otyo tyitalelwa kovipuka vivali: kovituwa vietu, nokuetyi tulinga. Omokonda yatyi aviho viesukisila? Mokonda inkha omunthu utupu okapungulula kamalingi okapungulula omunthu nawike. Movihonekwa vio Vakristau mo Gregu, ondaka “okuhena okapungulula” ihangununa “okuhatale kovipala,” okuhalingi vali nawa umwe tyipona mukuavo. (Atos 10:34; Kingdom Interlinear) Mahi, omunthu wokuhena okapungulula katale kolupe luovanthu, no konkhalelo yavo yomuenyo, mahi utala kovituwa viavo.

¹² Jeova ongeleka yavilapo yokuhakala nokapungulula. Ondaka yae ipopia okuti “utupu okapungulula” iya “kalingi nawike okapungulula.” (Tanga Atos 10:34, 35; Deuteronômio 10:17.) Otyo tutyitalela kuetyi tyamonekelele Moisesi.

13, 14. (a) Ovana vetano va Zelofeade vakalele notyitateka patyi? (b) Oñgeni Jeova alekesile okuti utupu okapungulula?

¹³ Etyi ova Isilayeli vehenenyingile Motyilongo Valaelwe, ovahikuena vetano ankho velikuai vakalele notyitateka. Otyitateka patyi? Ankho vetyii okuti ombunga yavo, ngetyi ankho tyilingwa onombunga ononkhuavo mo Isilayeli, ina okupewa ohika ankho yasiwapo na tate yavo. (Números 26:52-55) Mahi, tate yavo Zelofeade womuhoko wa Manases, ankho wankhia. Ngetyi ankho tyilingwa, ohika ya Zelofeade ankho ina okupewa ovana vae ovakuendye, mahi ankho una vala ovahikuena. (Números 26:33) Okuti mokonda ankho utupu ovakuendye, ohika yombunga ankho ina okupewa ovanthu ovakuavo iya ovana vae ovahikuena avakala tyehena natyike?

¹⁴ Ovahikuena ovo vetano avaende ku Moisesi avemupulu okuti: “Omokonda yatyi enyina lia tate malipolelwa pokati kombunga yae mokonda vala yokuhena ovana ovakuendye?” Avemuiti okuti: “Tuavelevo ohika pokati kovakulu va tate.” Okuti Moisesi watile, ‘otyitumino katyipopi ngotyo’? Au, mahi “wetyipopilile Jeova.” (Números 27:2-5) Oñgeni Jeova akumbululile? Wapopilile Moisesi okuti: “Etyi ovana va Zelofeade vekahi nokupopia tyaviuka. Tyotyili, una okuvepingisa ohika pokati kovakulu va tate yavo iya una okuveavela epingo lia tate yavo.” Jeova apopila vali Moisesi okuti: “Inkha omulume umwe unkhia ahasipo omona omukuendye, muna okuavela epingo liae omona wae omukainthu.” (Números 27:6-8; Josué 17:1-6) Okupolelela opo, ovakai aveho ova Isilayeli ankho vakala notyitateka otyo, vaamenwa.

15. (a) Oñgeni Jeova atekula ovanthu vae, haunene vana vehena ombatelo? (b) Upondola okupopia omahipululo omakuavo Ombimbiliya alekesa okuti Jeova utupu okapungulula?

¹⁵ Tyotyili, etokolo olio lialekesile nawa okuti Jeova una oluembia, iya utupu okapungulula! Wakuatesileko ovakai ovo ankho vehena ombatelo ngetyi ankho alinga ova Isilayeli ovakuavo. (Salmo 68:5) Olio, o limwe pomahipululo omanyingi Ombimbiliya alekesa okuti Jeova utekula ovaumbili vae aveho tyehena okapungulula.​—1 Samuel 16:1-13; Atos 10:30-35, 44-48.

TUPONDOLA OKUHETEKELA JEOVA

16. Oityi tuna okulinga opo tuahakale nokapungulula?

¹⁶ Oñgeni tupondola okuhetekela Jeova wehena okapungulula? Hinangela, okuhakala nokapungulula tyitalelwa kovipuka vivali. Inkha tutupu okapungulula kamatulingi okapungulula omunthu nawike. Tyotyili, atuho tuhole okusoka okuti tutupu okapungulula. Mahi, motavela okuti onthue muene katutyivili okulitala nawa oñgeni tukahi. Moluotyo, oityi tuna okulinga opo tunoñgonoke inkha tutupu umwe okapungulula? Etyi Jesus ahandele okunoñgonoka oityi ovanthu ankho vapopia konthele yae, wapulile omapanga ae ankho ayumba onthumbi, okuti: “Ovanthu vekahi nokuti Omona womulume olie?” (Mateus 16:13, 14) Omokonda yatyi tuahalingila nga Jesus? Upondola okupula epanga liove utyii okuti mekupopila otyili, inkha wiiwe okuti una okapungulula. Inkha ukupopila okuti una okapungulula, oityi wesukisa okulinga? Likuambela unene ku Jeova konthele yotyituwa otyo, omuiti ekukuateseko okuviukisa onkhalelo yove opo umuhetekele nawa konthele yokuhakala nokapungulula.​—Mateus 7:7; Colossenses 3:10, 11.

17. Omononkhalelo patyi tupondola okulekesa okuti tutupu okapungulula?

¹⁷ Mewaneno Liovakristau tulekesa okuti tuhanda okuhetekela Jeova wehena okapungulula, mokukala noluembia, nokankhenda novakuatate vetu aveho no nomphange. Mongeleka, tyina tukonga ovakuatate veye meumbo lietu, tukongei aveho, okukutikinyamo vana vena ontheto yelikalela no yetu, no vokuahepa, no nonthyiwe, ine ovahepe. (Tanga Gálatas 2:10; Tiago 1:27.) Tupu, movilinga viokuivisa Ouhamba wa Huku, katulingi okapungulula, tupopila ovanthu aveho onondaka onongwa, alo umwe onongendi. Tuna ehambu enene mokonda tuna omikanda vipopia konthele Yombimbiliya momalaka 600. Otyo tyilekesa nawa okuti tutupu okapungulula!

18. Oñgeni molekesa okuti upanda ovituwa via Jeova, okuapepuka omutima nokuhena okapungulula?

¹⁸ Tyotyili, tyina tuovola omuvo wokusokolola oñgeni Jeova apepuka omutima, nokuhena okapungulula, tumupanda vali unene. Iya otyo tyituavela ondundo yokuhetekela vali nawa ovituwa via Jeova, nokuvilekesa tyina tukahi novakuatate vetu, na vana tuivisa onondaka onongwa.