Jesus Kristu​—Oñgeni Tuna Okumuhinangela?

Mu Kayovo, ovanthu ovanyingi mouye auho vamona omalutalatu a Jesus ngatyina olukembe, lukahi momutemba. Mahi okuti tuna okuhinangela vala Jesus ngatyina olukembe?​—a Matupopi onkhalelo imwe yakolela unene tupondola okumuhinangela. Tupondola okulilongesila kuetyi tyamonekelele ovanthita vamwe ankho vekahi movipembe vioko Mbelei kounthiki.

Oandyu imwe yamonekelele ovanthita, aivepopila okuti: “Hono muatyitilwa Omuyovoli, Kristu Tatekulu.” Tupu aivepopila okuti mavavasi Jesus “wawingilwa pomulele nokualangekwa momutemba.” Pomuvo opo, apamoneka onoandyu ononkhuavo ononyingi ambuhimbika “okuhivilika Huku.”

Oñgeni ñgeno welitehelela inkha weivile onoandyu mbuhivilika Huku?​—Ovanthita vahambukilwe! Avati: “Tuendei ko Mbelei opo tukatale otyipuka etyi tyamoneka.” Etyi vehika, vavasa “Maliya na Jose, nolukembe lualangekwa momutemba.”

Pakala vala katutu, ovakuavo aveya ko Mbelei oku ankho kukahi Maliya na Jose. Etyi ovanthita vevepopila etyi vamona, aveho avahuvu. Okuti okunoñgonoka ovipuka ovio oviwa tyikuhambukiswa?​—Aveho vehole Huku vahambukwa. Pahe tutale omokonda yatyi ovanthu vahambukilwe unene etyi Jesus atyitwa. Opo tutyinoñgonoke, tuesukisa okukondoka komuvo etyi Maliya nkhele ehenenepwe.

Nthiki imwe oandyu itiwa o Gabrieli yeile okutalelapo Maliya. Yemulaele okuti makala nolukembe “makala omunene, iya maihanwa okuti Omona wo Mukulami.” Gabrieli ati: “Makala ohamba, iya ouhamba wae maukakalako apeho.”

Maliya ankho uhanda okunoñgonoka oñgeni otyo matyikamoneka, mokonda ankho kenelale nomulume. Ngotyo, Gabrieli emuhangununina okuti: “Epondolo lio Mukulami malikufiki. Moluotyo, tupu omona matyitwa matiwa osandu, Omona wa Huku.” Ankho ehuviso limwe enene okupola omuenyo Womona wa Huku keulu, aupakwa meimo lia Maliya akala olukembe!

Okuti uhole okumona omalutalatu alekesa ‘ovalume vetatu ovanongo,’ kumwe novanthita vakatalelapo olukembe Jesus?—Ponatale omalutalatu oo, amoneka unene. Mahi ha otyotyiliko. ‘Ovanongo ovo,’ ankho tyilityili ovitapi, otyipuka Huku eyele. Tutalei oityi tyamonekelepo etyi vehika. Ombimbiliya yati: “Etyi vanyingila meumbo, vamona omona ukahi na Maliya me yae.” Ngotyo Jesus ankho halukembe ko vali lukahi momutemba, ankho wekulale iya ankho ukahi mondyuo na Jose na Maliya!

Oñgeni ovitapi viavasile Jesus?​—Vahongolelelwe “nonthungululu,” mahi tete kavaile ko Mbelei, vaile ko Hamba Herode mo Jelusalei. Ombimbiliya ipopia okuti Herode wahandele okuvasa Jesus opo emuipae. Pahe soka. Kuove, olie wamonekesile onthungululu yahongolelele ovitapi ku Herode?​—Ankho ha Jeova ko, Huku yotyotyili, mahi ondyale yae Satanasi Eliapu!

Hono Satanasi uhongiliya ovanthu vasoke okuti Jesus nkhele olukembe. Mahi, oandyu Gabrieli yapopilile Maliya okuti: “Makala ohamba . . . , iya ouhamba wae maukakalako apeho.” Hono Jesus Ohamba ikahi nokutumina keulu, iya apa katutu makamanako onondyale ambuho mba Huku. Etyi otyo tuna okuhinangela konthele ya Jesus, iya tuesukisa okutyipopila vakuetu.