Yesu Watyitilwa Motyunda

OKUTI okalukembe aka ukei? O Yesu. Watyitilwa motyunda. Otyunda omomu mulala ovipako. Maliya ukahi nokulangeka Yesu momutemba. Omutemba omomu mulila ovimbulu novipako ovikuavo vali. Mahi, omokonda yatyi Maliya na Jose vakalela motyunda kumue novipako? Okuti otyunda omphangu yokukutulila omona?

Au. Mahi, vekahi motyunda mokonda omutumini woko Roma, Sesale Augustu, walinga otyitumino tyokuti kese umue una yokukondoka kepundaumbo oku atyitilwa opo ekelihonekese. Jose ankho watyitilwa ko Mbelei. Anthi etyi ehika na Maliya, ankho petupu vali ondyuo pala okukala. Otyo veila okukala novipako. Monthiki yatyo oyo Maliya akutula Yesu. Mahi, olukembe lukahi nawa, ngetyi uluete polutalatu apa.

Uluete ovanthita ava vekahi nokuiya okutala Yesu? Ankho vekahi mohika kounthiki nokuyunga onongi mbavo, iya otyitei tyimue atyiliaimina ponthele yavo. Ankho oandyu! Ovanthita avakala unene nouoma. Mahi, oandyu aipopi okuti: ‘Muhakalei nouoma. Ame ndyina onondaka onongwa pala onue. Hono mo Mbelei muatyitwa Kristu, Tatekulu. Oe makayovola ovanthu. Onue mamumuvasi wauingilua momilele no kualangekwa momutemba.’ Liwa liwa apeya onoandyu ononyingi iya ambuhimbika okuhivilika Huku. Moluotyo, ovanthita ovo vakanyauka okukaovola Yesu, iya avemuvasi.

Utyii omokonda yatyi Yesu akolela unene? Ove tyilityili umwii umue? Hinangela okuti mehipululo liotete liomukanda ou, tuapopia kombinga Yomona wotete wa Huku. Omona oo, waundapa na Yehova pokulinga eulu, no oohi, novipuka ovikuavo vali. Enyina liae o Yesu.

Yehova wapola omuenyo Womona wae keulu eupake meimo lia Maliya. Meimo lia Maliya amuhimbika okukula olukembe, ngetyi omalukembe omakuavo ekula momaimo o me yavo. Mahi olukembe olu ankho Omona wa Huku. Okuhulako, Yesu watyitilwa motyunda ko Mbelei. Pahe upondola okunoñgonoka omokonda yatyi onoandyu ankho mbahambukilwa unene etyi mbatolela ovanthu okuti Yesu watyitua?