Onoandyu Mbapopile Okuti Sesusi Watyitwa

Omutumini wo Loma Sesale Angusitu, watumine ova Sundaa aveho opo vende kovilongo oku vatyitilwa vekelihonekese. Susee na Maliya avaende noko Mbelei, oku Susee atyitilwa. Pomuvo opo Maliya uhungi kokukutula.

Etyi vehika ko Mbelei, ankho petupu apa vapondola okulalela, avakalala mohambo. Mohambo, omo Maliya akutulila omona wae Sesusi. Emuwingila pomulele emulangeka momutemba.

Popepi yo Mbelei, ankho pena ovanthita vamwe veli konohambo vakatulisa ovipako viavo. Vakati-ko vala ñgaa oandyu, omunkhima wa Siovaa auvemimikila. Ovanthita avatili owoma, mahi oandyu aivepopila okuti: ‘Mwahatilei owoma. Nemwetela oviwa ovipe. Mesiya watyitwa hono mo Mbelei.’ Akumoneka onoandyu ononyingi meulu, ambupopi okuti: ‘Huku keulu ankhimanekwe, pohi pakale ombembwa.’ Etyi mbapopia ngootyo ambwende. Oityi ovanthita valingile?

Ovanthita avelipopila okuti: ‘Twendei pehepano ko Mbelei.’ Avaende, avavasi Susee na Maliya nolukembe lwavo mohambo.

Ovanthu aveho veiva etyi onoandyu mbapopila ovanthita avahuvu. Maliya ahinangela onondaka apopililwe noandyu, ehembulimbwa. Etyi ovanthita vakondoka kovipako viavo, avapandula Siovaa mokonda yeetyi vamona neetyi veiva.