Oityi Ovanthu Velikuambelela?

Okuti ove apeho ulikuambela? Otyo ovanthu ovanyingi valinga, alo umwe vana vehetavela okuti kuna Huku. Mahi oityi ovanthu velikuambelela? Ngetyi tyapopia eovololo limwe lialingwa ko França, ovanthu vamwe voko França vapopia okuti pamwe velikuambela opo “velitehelele nawa.” Ngetyi tyilinga ovanyingi ko Europa, kavelikuambela opo vafende Huku. Mahi, vaovola “etyi matyivekalesa nawa melikuambelo.” Tupu, vamwe vetavela vala okuti kuna Huku tyina vesuka, avakevela okuti makumbulula omalikuambelo avo.​—Isaías 26:16.

Iya ove? Usoka okuti elikuambelo malikuatesako omalusoke ove? Inkha utavela okuti kuna Huku, okuti kuove omalikuambelo akolela? Ine tyimoneka ngoti omalikuambelo ove kakumbululwa? Ombimbiliya ipondola okukukuatesako okutala okuti omalikuambelo, hapala vala okulitehela nawa, mahi ondyila yakolela yokuhika ku Huku.