Oñgeni Huku Atala Okupuena?

Naoko, wapopiwa monthele yotete, wapopia okuti wetyivila okuyekapo okupuena, “Ame netyivila okupilulula onkhalelo yomuenyo wange mokonda nelilongesa otyili konthele yovituwa via Huku nehando liae.” Etyi elilongesa wetyivasa Mombimbiliya. Namphila Ombimbiliya ihapopi omakaya, mahi itukuatesako okunoñgonoka oñgeni Huku atala okupuena.a Kovanyingi, enoñgonoko lieveavela ondundo yokulikuatesila ine okuyekapo ovituwa ovivi. (2 Timóteo 3:16, 17) Matulilongesa ovipuka vitatu ovivi vituka kokupuena nokutala etyi Ombimbiliya yapopia.

OVIPEPE VIOKUPUENA

Omakaya ena vali ovipepe ovinene tyipona ovipuka ovikuavo. Omakaya alinga ngatyina akalesa nawa omunthu. Ovipepe viokupuena vinyingila liwa mowongo nokuhongiliya omunthu okutualako okusipa. Tyina omunthu anana omuihi, unyingila momapunga, onthiki ike vala inkha omunthu umana omalusu yomakaya mokati kae mulinga eka, linyona tyipona kese vihemba vikoleswa. Iya okutualako nokupuena eka olio likalesa novipepe viomakaya. Tyina omunthu amakala novipepe viomakaya, tyina ahanda okutyiyekapo ulitehela kekahi nawa.

Ombimbiliya itukuatesako okukala nolusoke luaviuka konthele yokupuena etyi yati: “Kamutyii okuti inkha mutualako okulipakula komunthu umwe ngatyina muvapika, amumutavela, ngotyo onwe vapika vae, mokonda mumutavela?” (Romanos 6:16) Tyina omunthu asoka komakaya nokuhanda vala okupuena ukala omupika wotyituwa otyo otyivi. Mahi, Huku, utiwa o Jeova uhanda tuyovoke kovituwa vinyona olutu luetu nokuyekapo otyituwa otyo tyokusipa tyinyona omalusoke etu. (Salmo 83:18; 2 Coríntios 7:1) Ngotyo, tyina omunthu apandula nokukala nonthilo na Jeova, wimbuka okuti Jeova uhole oviwa nokuimbuka okuti kapondola okulinga etyi tyaviuka ku Jeova inkha utualako novituwa ovivi. Okuimbuka ngotyo tyikuatesako omunthu okuyekapo ovipepe ovio ovivi viokusipa.

Olaf, ukala ko Alemanya, wetyivila okuyekapo otyituwa tyokupuena akala natyo omanima 16, tunde etyi ena omanima 12. Oe wati: “Etyi nahimbika osikalu yotete ankho ngoti otyivi unene. Mahi mokueenda kuomanima andyikala novipepe. Tyina nahanda okuyekapo okupuena, ndyikala tyahanunuka andyiongolola ovinthimbo vionosikalu, andyiongiya omakaya andyiwingi osikalu. Okusoka nawa, netyimona okuti ñgeno tyanyona ekongoko liange.” Oñgeni etyivila okuyekapo otyituwa otyo tyokupuena? Oe wati: “Tyankhuatesako unene ehando liokuhambukiswa Jeova. Ohole Jeova ena novanthu nekevelo andyavela viapameka ehando liange liokuyekapo otyituwa otyo novikuavo vali.”

OKUPUENA TYINYONA EKONGOKO

Omukanda The Tobacco Atlas wati: “Okupuena tyaimbukwa no nondotolo okuti tyinyona unene ekongoko nokuyawisa omauvela nokuipaa.” Tyihole okumonwa okuti okupuena tyikahi nokueta ouvela komapunga, no komutima noviponga ovinene. Mahi ngetyi tyapopia Organização Mundial da Saúde (OMS), okupuena tupu tyikahi nokueta unene ononkhia mbutuka komauvela ngetyi ombela-nthulo.

Nondaka yae Ombimbiliya, Jeova Huku, utulongesa tukale nonkhalelo ongwa yomuenyo, mokukala nolutu luasukuka naapa tukala. Omona wae Jesus, otyo wetyilekesa etyi ati: “Una okukala nohole na Jeova Huku yove nomutima wove auho, nomuenyo wove auho nonondunge mbove ambuho.” (Mateus 22:37) Tyimoneka nawa okuti Huku uhanda tuundapese nawa omuenyo wetu nolutu luetu nokutekula vakuetu nonthilo. Tyina tuamelilongesa konthele ya Jeova nomilao viae, tukala nohole nae nokuhumba atyiho etulingila. Otyo tyitukuatesako okuyekapo atyiho tyinyona olutu luetu.

Jayavanth, ondotolo imwe ko India, wakala nokupuena momanima 38. Wati: “Nanoñgonoka ovitateka vituka kokupuena momikanda vionondotolo. Ame netyimona okuti otyo otyiponga otyinene, andyipopila vana ankho ndyihakula vasipa opo vetyiyekepo. Mahi ame hetyiyekelepo, namphila kononkhono mbange nahetekela ovikando vitano ine epandu.” Oityi tyemukuatesako okutyiyekapo? Oe wati: “Nayekapo okupuena mokonda yokuelilongesa Ombimbiliya. Ehando liokuhilivika Jeova liankhuatesako okuyekapo otyituwa otyo otyivi.”

OKUPUENA TYINYONA VAKUETU

Omuihi womakaya ovanthu vapuena, na una utunda kosikalu, ukola ovanthu. Okunyina omuihi womakaya tyina ovanthu vapuena tyipondola okuetela vakuavo ouvela womapunga nomauvela omakuavo, ekahi nokuipaa ovanthu 600.000 kese nima vahapuene, haunene ovakai novana. Omukanda wahonekwa no OMS wati: “Petupu onkhalelo yokulityilika omuihi wa vana vapuena.”

Ngetyi tyapopia Jesus, okukala nohole navakuetu, nombunga yetu, nomapanga na vana vekahi ponthele yetu, otyo otyitumino tya vali pala okuhumba Huku. Oe wati: “Una okukala nohole na mukuenyi ngetyi ulihole ove muene.” (Mateus 22:39) Inkha tuna otyituwa tyokulinga omapita vana tunavo, tyilekesa okuti tutupu ohole navo. Ohole yotyotyili itulunda okulandula elondolo eli Liombimbiliya: “Kese umwe ahatualeko vala okuovola ouwa wae muene, mahi atualeko okuovola ouwa wamukuavo.”​— 1 Coríntios 10:24.

Armen, ukala ko Armenia, wati: “Mokonda matyivenyono ombunga yange vandyitile ndyiyekepo okupuena. Mahi ame ankho hihande okutavela okuti otyo matyivelingi omapita.” Oe wahangununa etyi tyapilululile onkhalelo yae yokusoka: “Enoñgonoko liange Liombimbiliya nohole na Jeova viankhuatesako okuyekapo okupuena nokutavela okuti otyo katyilingi vala omapita ame, mahi alo umwe vana vekahi ponthele yange.”

OKUMANAKO OKUPUENA PALA OUWA!

Ombimbiliya yakuatesako Olaf, na Jayavanth, na Armen vetyivila okuyekapo otyituwa otyo ankho tyinyona ovo muene navakuavo. Vetyivila okuyekepo okupuena hakuetavela vala okuti tyinyona, mahi omokonda yoluembia na Jeova nokuhanda okumuhambukiswa. Etyi tyakolela vali konthele yohole tyapopiwa mu 1 João 5:3, yati: “Mokonda ohole na Huku ihangununa okutavela ovitumino viae. Iya ovitumino viae kavileme.” Tyotyili, okulandula onondonga Mbombimbiliya hapeho tyapepuka, mahi omunthu ulundua nohole onene ena na Huku, okutavela ovitumino viae katyalemene.

Nondongeso ikahi nokuawa ouye auho, Jeova Huku ukahi nokukuatesako ovanthu ovanyingi okuyekapo ine okutualako okuliyovola moupika womakaya. (1 Timóteo 2:3, 4) Apa katutu Nouhamba wae, utumina keulu nehongolelo liomona wae Jesus Kristu, Jeova makamanako onondyuo mbokulinga ovitanda viomakaya mbukahi nokupaka ovanthu ovanyingi moupika. Oe mamaneko okupuena mokueta oviwa nokukalesa ovanthu vokutavela nomalutu nomalusoke asukuka.​—Isaías 33:24; Revelação 19:11, 15.

Inkha ukahi nokulinga ononkhono mbokuyekapo okupuena, uhatalame. Mokulilongesa okukala nohole na Jeova nokupanda oñgeni okupuena etyitala, movasi ononkhono wesukisa opo utyiyekepo. Onombangi mba Jeova mavakala nehambu liokukuavela onondonga mbaviuka mokulilongesa navo Ombimbiliya okulandula nonondonga mbayo. Kala tyityi okuti inkha uhanda Jeova ekukuateseko okuyekapo omakaya, mekukuavela ononkhono wesukisa.​—Filipenses 4:13.