Okuti Huku Ukutehelela?

Okuti ankho tyaviuka ku David okukevela Huku emutehelele? Okuti Huku ukutehelela? Ovanthu ovanyingi tyivepuiya okusoka okuti Huku wepondolo aliho wesuka navo. Omokonda yatyi?

Ehunga limwe omokonda Huku una omuenyo wavilapo unene ko wovanthu. Ngetyi tyamonwa, onkhalelo yae yakulama unene, iya ovanthu aveho “vekahi vala ngatyina eta liomaande mombaliti, iya vaelekwa nombuma yeheke kombanda yotyipeyalo.” (Isaías 40:15) Mononthiki mbuno, omunthu umwe uhetavela Huku, wahoneka okuti tyikahi unene kokule okutavela okuti “kuna Huku omukulami upondola okusuka netyi ove ulinga.”

Tupu, ovanthu vamwe velitehela okuti mokonda yovituwa viavo kavatokalele okupandwa na Huku. Mongeleka, omulume umwe utiwa Jim wati: “Ame apeho ndyilikuambela ku Huku opo ndyikale omuna mbembwa nokulikondola omutima, mahi pakala vala katutu, andyikala vali nonyengo. Konyima, andyisoko okuti ovivi viange viavilapo iya Huku kekahi nokunkhuatesako.”

Okuti Huku ukahi unene kokule novanthu ketyivili okututala? Oñgeni atala ovanthu ovakuankhali? Inkha Huku ketyipopi kutupu nawike upondola okutyipopia ine okukumbulula omapulo oo. Mahi Huku watuma okuhoneka Ombimbiliya opo itukuatesako okutala okuti kekahi kokule novanthu. “Tyotyili,” Ombimbiliya yati: “Huku kekahi kokule na kese umwe puonthue.” (Atos 17:27) Mononthele ononkhuana mambulandulako, matulilongesa etyi Huku etupopila konthele yesuko ena novanthu no ñgeni alekesa okuti wesuka novanthu ngove.