Okuti Ukahi Nokutambula “Okulia Momuvo Wanakua”?

TUKAHI mononthiki mbepuiya vali unene tyipona kohale. (2 Tim. 3:1-5) Ohole tuna na Jeova, netokolo lietu liokuendela movitumino viae viaviuka, vikahi nokulolwa ononthiki ambuho. Jesus ankho utyiyale okuti ononthiki mbuno mambupuiya unene, moluotyo walaele okuti mapameka ovalanduli vae opo vakoleleye alo konthyulilo. (Mat. 24:3, 13; 28:20) Opo Jesus evepameke, waholovona omupika wekolelo opo aave “okulia kuopaspilitu momuvo wanakua.”​—Mat. 24:45, 46.

Omupika wekolelo waholovonwa mo 1919. Tunde opo, omupika ukahi nokuava okulia kuopaspilitu momalaka omanyingi pala ovanthu va Huku. (Mat. 24:14; Rev. 22:17) Mahi, omikanda vimwe kaviapitiyilwe momalaka aeho. Mongeleka, ovanyingi vetupu ono video nononthele mbumwe mbukahi vala mo Internete mo jw.org. Okuti otyo tyilekesa okuti Ovakristau vamwe kavekahi nokutambula okulia kuopaspilitu vesukisa opo vatualeko okupameka oupanga wavo na Huku? Opo tuvase ekumbululo, matukumbulula omapulo ekuana akolela unene.

1. Oityi haunene Jeova apaka mokulia aava?

Etyi Satanasi alolele Jesus opo alinge omamanya akale onombolo, Jesus wakumbululile okuti: “Omunthu kakala vala nomuenyo mokonda yombolo, mahi omokonda yondaka aiho itunda momulungu wa Jeova.” (Mat. 4:3, 4) Etyi Jeova apopia tyikahi Mombimbiliya. (2 Ped. 1:​20, 21) Ngotyo, Ombimbiliya oyo haunene ikahi mokulia Jeova etuavela.​—2 Tim. 3:16, 17.

Eongano lia Jeova lialinga o Tradução do Novo Mundo das Escrituras Sagradas. Ombimbiliya oyo, yapitiyua aiho ine onthele imwe momalaka alamba po 120, iya kese enima kukahi nokuyawisa vali omalaka omakuavo. Tyehe Tradução do Novo Mundo vala, kuna vali Onombimbiliya ononkhuavo momalaka omanyingi. Otyo tyelikuata kumwe nehando lia Jeova mokonda “uhanda ovanthu vatyo aveho vayovolwe iya avakala nenoñgonoko liafuapo konthele yotyili.” (1 Tim. 2:3, 4) Mokonda Jeova wii omitima viovanthu aveho, tupondola okukala nonthumbi yokuti maeta meongano liae vana “vaimbuka okuti vesukisa okulongeswa na Huku,” opo vatambule okulia eveavela.​—Heb. 4:13; Mat. 5:3, 6; João 6:44; 10:14.

2. Oñgeni omikanda vietu vikuatesako unene okuava okulia kuopaspilitu?

Opo omunthu akale nekolelo, kesukisile vala okutanga Ombimbiliya, mahi tupu una okunoñgonoka etyi atanga, nokuendela muetyi elilongesa. (Tia. 1:22-25) Otyo omulume umwe omu Etiopia pomuvo wono apostolu ankho esukisa okulinga. Etyi Filipe omuivisi amona omulume oo ankho ukahi nokutanga Ondaka ya Huku, emupulu okuti: “Utyii umwe etyi ukahi nokutanga?” Omulume oo ati: “Tyotyili, oñgeni ame mandyityinoñgonoka inkha petupu ou unthyongolela?” (Atos 8:26-31) Moluotyo, Filipe akuatesako omulume oo okukala nenoñgonoko liafuapo konthele Yondaka ya Huku. Etyi omulume oo elilongesa atyimuavela ondundo onene, atokola okumbatisalwa. (Atos 8:32-38) Tupu, omikanda vietu vitukuatesako okukala nenoñgonoko liafuapo konthele yotyili. Etyi tutangamo tyituhika komutima, nokutulunda okuendela muetyi tuelilongesa.​—Col. 1:​9, 10.

Ovaumbili va Jeova vena omikanda vina ovipuka ovinyingi oviwa pala “okulia” “nokunwa.” (Isa. 65:13) Mongeleka, Omutala Womulavi ukahi nokupitiyua momalaka alamba po 210. Omukanda oo uhangununa omaulo Ombimbiliya, utukuatesako okunoñgonoka otyili tyakolela, nokutulunda okueendela movitumino via Huku. O Desper­tai! ikahi nokupitiyua momalaka ehungi po 100. Omukanda oo utukuatesako okulilongesa vali konthele yovipuka oviwa Jeova atunga, nokunoñgonoka oñgeni tuna okuendela momalondolo omawa avasiwa Mombimbiliya. (Pro. 3:21-23; Rom. 1:20) Omupika wekolelo ukahi nokulinga omikanda viapolwa Mondaka ya Huku momala alamba po 680! Okuti ononthiki ambuho wovola omuvo pala okutanga Ombimbiliya? Okuti utanga Omutala Womulavi nomikanda omikuavo omipe vikahi melaka liove?

Tupu, eongano lia Jeova lipongiya omalongomona apolwa Mombimbiliya alingwa momaliongiyo etu, no movionge. Okuti ove uhole omalongomona, no nondalama, nomalekeso, nomapulo alingwa movionge omo? Tyotyili, Jeova utuavela okulia okunyingi!​—Isa. 25:6.

3. Inkha melaka liove mutupu omikanda aviho, okuti otyo tyilekesa okuti utupu okulia kuopaspilitu kutuuka?

Au. Katuesukisile okusukalala inkha ovaumbili vamwe va Jeova vena vali okulia okunyingi kuopaspilitu tyipona vakuavo. Omokonda yatyi? Tala ongeleka yono apostolu. Pononthiki mba Jesus, ono apostolu ankho valongeswa vali ovipuka ovinyingi tyipona ovalongwa ovakuavo. (Mar. 4:10; 9:35-37) Mahi no ngotyo, ovalongwa ovakuavo ankho vatambula okulia kuopaspilitu vesukisa.​—Efé. 4:20-24; 1 Ped. 1:8.

Otyiwa okuhinangela okuti ovipuka ovinyingi Jesus apopile, nevi alingile etyi ankho ekahi pano pohi, kaviahonekelwe mono Evandyeliu. Apostolu João wahoneka okuti: “Tyotyili, tupu kuna ovipuka ovinyingi Jesus alinga, inkha viahonekelwe aviho ngo omu viaendela, ñgeno omikanda viatyo mouye kaviafuilemo.” (João 21:​25) Ovakris­tau votete ankho vei vali ovipuka ovinyingi konthele ya Jesus tyipona onthue. Mahi nongotyo katuakalele tyihei natyike. Omokonda yatyi? Mokonda Jeova wetuavela etyi tuesukisa opo tukale nenoñgonoko lituuka konthele Yomuhona wetu Jesus, opo tutyivile okulandula ongeleka yae.​—1 Ped. 2:21.

Tupu soka komikanda ono apostolu vatumine komawaneno pomuvo Wovakristau votete. Pena omukanda umwe Paulu ahonekele wahapakelue Mombimbiliya. (Col. 4:16) Okuti otyo tyilekesa okuti tutupu okulia kuopaspilitu kutuuka mokonda pakamba omukanda oo? Au. Jeova wii etyi tuesukisa iya utuavela etyi tyituuka opo tutualeko okupameka oupanga wetu nae.​—Mat. 6:8.

Hono, ovaumbili vamwe va Jeova vena vali okulia okunyingi kuopaspilitu tyipona vakuavo. Okuti elaka upopia lina vala omikanda viehehi? Inkha ongotyo, noñgonoka okuti Jeova ukahi nokukutekula. Lilongesa omikanda una, nokuenda komaliongiyo alingwa melaka ove unoñgonoka. Inkha ulinga ngotyo, oupanga wove na Jeova mautualako tyapama.​—Sal. 1:2; Heb. 10:24, 25.

4. Inkha utupu omikanda aviho vikahi mo jw.org, okuti ekolelo liove malitende?

Ononthele mbumwe Mbomutala Womulavi no Despertai! nomikanda omikuavo, vikahi mo site yetu mo Internete. Mo site oyo, tupu muna ononthele mbukuatesako ovalinepi, novohe, novakuendye, novana ovatutu. Onombunga mbupolako ouwa putyina mbuundapesa ononthele ombo Mefendelo liavo Liombunga. Mo site yetu tupu muna omahipululo ono programa mbakolela, ngetyi onthiki yokumanuhula osikola yo Gileade, neliongiyo lilingwa kese enima, nomahipululo konthele yoviponga, no nomphela mbulingwa monombonge konthele yovanthu va Jeova. (1 Ped. 5:8, 9) O site yetu tupu otyiti tyimwe otyiwa pala ovilinga vietu viokuivisa. Ikuatesako opo onondaka onongwa mbuhike movilongo omu ovilinga vietu viokuivisa viailikwa.

Tyotyili, ove upondola okutualako okupameka oupanga wove na Huku, tyilinge una o Internete opo unyingile mo site yetu ine utupu. Omupika ukahi nokuundapa unene opo alinge omikanda opo Ovakristau aveho vakale nokulia kuopaspilitu vesukisa. Ngotyo, kuesukisile okusoka okuti una okulanda okomputadole ine otelefone opo unyingile vala mo jw.org. Vamwe vehole okupola ononthele mbumwe mbukahi mo jw.org opo vaavele vana vehena o Internete. Mahi omawaneno kaaitilwe okulinga ngotyo.

Tupandula Jesus mokonda ukahi nokufuisapo omulao wae wokutuavela etyi tuesukisa opo tutualeko okupameka oupanga wetu na Huku. Tupondola okukala nonthumbi yokuti Jeova matualako okuava “okulia kuopaspilitu momuvo wanakua” alo ouye uno wovivi uhanyuako.