Ove Utomphola Na Huku?

Ovanthu ve vali omapanga apeho vatomphola tyilinge veli mphangu ike, ine oko telefone ine o e-mail, ine ovidiu ine omukanda, tyina tyitavela. Opo tukale omapanga a Huku tuesukisa okutomphola nae apeho. Oñgeni tyilingwa?

Onthue tupondola okupopia na Jeova melikuambelo. Mahi, okulikuambela ku Huku katyilingwa vala okulihakamo ngetyi tupopia na vana tulongeswa navo kosikola. Onthue tuna okunoñgonoka okuti tyina tulikuambela, tukahi nokupopia Nomutungi wetu, Omukulami wouye auho. Otyo tyituavela ondundo yokulikuambela ku Huku nonthilo nehumbilo enene. Opo Huku atehelele nawa omalikuambelo etu, tupu tuna ovitumino tuesukisa okufuisapo. Vimwe ovievi.

Tete, tuna okulikuambela vala ku Jeova Huku, ha ku Jesus no “kovakuaukulu” ine ovilolo. (Êxodo 20:4, 5) Ombimbiliya nokuayandyuluka yati: “Muhakalei notyiho notyipuka natyike, mahi, mu aviho, itei unene ku Huku nomalikuambelo kumwe nolupandu.” (Filupeses 4:6) Vali, omalikuambelo ena okulingwa menyina lia Jesus Kristu, Omona wa Huku. Jesus muene wati: “Nawike uya ku Tate ahapiti puame.” (João 14:6) Tatu, omalikuambelo ena okulikuata nehando lia Huku. Ombimbiliya yati: “Kese etyi tuita inkha tyelikuata nehando liae, metutehelela.”a​—1 João 5:14

Tyotyili, oupanga kaukala ehimbwe inkha apeho wike vala utomphola. Ngetyi ovanthu vevali omapanga vesukisa okutomphola aveho, nonthue tuesukisa okuyeka Huku apopie nonthue iya atumutehelela tyina apopia. Ove utyii oñgeni Huku apopia nonthue?

Hono, Jeova Huku “upopia” nonthue Nondaka yae, Ombimbiliya. (2 Timoteo 3:16, 17) Oityi tupopila ngotyo? Mongeleka, soka ñgeno watambula omukanda watunda kepanga liove. Tyina wameutange, upondola okupopila vakuenyi okuti “neiva etyi tyapopia epanga liange!” Kamuatompholele komulungu, mahi wekuhonekela vala. Tyelifwa notyo, tyina utanga Ombimbiliya, ngotyo wayeka Jeova apopie noove. Gina wapopiwa monthele yotete wati, “ame ndyisoka okuti inkha nahanda Huku akale epanga liange, ndyina okutanga ‘omukanda’ etuavela,Ombimbiliya.” Ayawisako okuti: “Okutanga Ombimbiliya ononthiki ambuho tyinthikiya vali ku Huku.” Okuti uyeka Jeova apopie noove mokutanga Ondaka yae Ombimbiliya, ononthiki ambuho? Inkha ulinga ngotyo matyikukuatesako okufuena ku Huku.