Tualako Okukevelela!

1, 2. Otyituwa patyi ovaumbili va Jeova vena?

OVAUMBILI va Jeova vakevelela noumphua-lundo okufuisuapo kuomaulo. Mongeleka, Jeremia wakevelele okuti ova Mbambilonia mavahanyeko o Juda, iya otyo atyimoneka mo 607 P.K.E. (Jeremias 25:8-11) Isaia waulile okuti Jeova mayovola ova Judeu veli koupika ko Juda etyi ati: “Aveho vakevelela mwe vena ehambu.” (Isaías 30:18) Tupu Mikeia wakevelele omilao via Jeova mavifuisuapo etyi ati: “Ame mandyitualako okukevelela ku Jeova.” (Miquéias 7:7) Mokueenda kuomanima omanyingi, ovaumbili va Jeova vena onthumbi yokuti Mesia ine o Kristu walaelue meya.​—Lucas 3:15; 1 Pedro 1:10-12.a (Tala pokatoi.)

² Hono, nonthue tupu tukevelela okufuisuapo kuomaulo apopia konthele Youhamba wa Jeova. Mokonda Jesus Ohamba Youhamba oo, apa katutu makayovola ovanthu va Huku movitateka viouye ou omukalavi. Jesus makahanyako ovanthu onondingavivi iya akamanako ononkhumbi ambuho. (1 João 5:19) Ngotyo tuna okutualako okukevelela onthiki ya Jeova maiya apa katutu iya tulinga atyiho tuvila opo tukale tyafuapo.

3. Inkha tukahi nokukevelela onthyulilo mokueenda kuomanima omanyingi, oityi tupondola okulipula?

³ Tukevelela unene onthiki ehando lia Huku malilingwa pano pohi. (Mateus 6:10) Mahi inkha tuakevelela onthyulilo omanima omanyingi tupondola okulipula okuti, ‘Omokonda yatyi tutuailako okukevelela okuti onthyulilo maiya apa katutu?’

OMOKONDA YATYI TUPONDOLA OKUTUALAKO OKUKEVELELA OKUTI ONTHYULILO MAIYA APA KATUTU?

4. Omokonda yatyi tyakolela “tutualeko tyalunguka”?

⁴ Jesus watuma ovalanduli vae opo “vatualeko okukala tyalunguka” “nokutualako tyipahi.” Ngotyo, tyakolela tutualeko okukevelela onthyulilo maiya apa katutu. (Mateus 24:42; Lucas 21:34-36) Tupu, eongano lia Jeova lituavela ondundo opo “tunoñgonoke nawa okuya kuonthiki ya Jeova” iya atutualako okutala komilao via Jeova viouye omupe.​—Tanga 2 Pedro 3:11-13.

5. Ehunga patyi ekuavo tuna opo tutualeko okukevelela onthiki ya Jeova?

⁵ Inkha ovalanduli va Jesus potyita tyotete ankho vesukisa okutualako okukevelela onthiki ya Jeova, tyakolela vali unene hono. Omokonda yatyi? Omokonda enyingilikilo Jesus avele, lilekesa okuti wakala Ohamba Youhamba wa Huku mo 1914 iya tukahi kononthiki mbahulilila ine “mbonthyulilo youye.” Mongeleka, ngetyi Jesus aulile, ovipuka ovivi vikahi nokuliyawisa iya onondaka onongwa Mbouhamba mbukahi nokuiviswa ohi yatyo aiho. (Mateus 24:3, 7-14) Jesus kanakele omuvo maukala ononthiki mbonthyulilo, moluotyo tuesukisa okulifuiika.

6. Oñgeni onthwe tutyii okuti ovitateka mouye mavivilipo vali tyina onthyulilo ikahi popepi?

⁶ Okuti “onthyulilo youye” ilekesa omuvo ouye maukala vali omuvi tyipona pehepano? Ombimbiliya yapopia okuti ovanthu “kononthiki mbahulilila” mavavilipo okukala ovakalavi. (2 Timóteo 3:1, 13; Mateus 24:21; Revelação 12:12) Mahi, namphila ouye hono ukahi omapita, onthue tutyii okuti mauvilipo.

7. Ngetyi tyipopia Mateus 24:37-39 ovipuka patyi vikahi nokumoneka mokueenda kuononthiki mbonthyulilo?

⁷ Vamwe vasoka okuti tyina “ononkhumbi ononene” mbehenehimbike movilongo ovinyingi mamukala ovilwa iya ovanthu ovanyingi mavakala nomauvela nondyala. (Revelação 7:14) Mahi inkha otyo tyimoneka matyifuisapo omaulo amwe Ombimbiliya. Otyo matyimoneka namphila ovanthu ovanyingi vehesukile netyi Ombimbiliya ipopia. Hinangela, Jesus wapopia okuti, kononthiki mbonthyulilo, ovanthu “kamavekesuka.” Mavekesuka vala novipuka via kese nthiki, avauhululwa tyina onthiki ya Jeova yamehikipo. (Tanga Mateus 24:37-39.) Tyotyili, onthwe katukevelela ovitateka vivilepo tyina nkhele “ononkhumbi onene” mbeheneye putyina ovanthu maveketavela kononkhono okuti onthyulilo ikahi popepi.​—Lucas 17:20; 2 Pedro 3:3, 4.

8. Mokonda tuanoñgonoka nawa elondolo liomanyingilikilo a Jesus, oityi tuna okulinga?

⁸ Enyingilikilo Jesus aava ankho opala okukuatesako ovalanduli vae okunoñgonoka omuvo vekahi. Jesus weveavelele elondolo. (Mateus 24:27, 42) Tunde mo 1914, omanyingilikilo a Jesus ekahi nokufuiswapo. Onthwe tuna onthumbi yokuti tukahi kononthiki mbahulilila “mbouye uno wovivi.” Jeova watokolale onalupi mamaneko ouye omuvi wa Satanasi.

9. Omokonda yatyi tuesukisila okutualako okukevelela onthyulilo maiya apa katutu?

⁹ Omokonda yatyi tukevela nonthumbi yokuti onthyulilo maiya apa katutu? Omokonda tutavela ku Jesus Kristu. Tupu, tueete okuti enyingilikilo Jesus ava konthele yononthiki mbonthyulilo likahi nokufuisuapo. Onthwe tuna onthumbi yokuti onthyulilo ikahi popepi, hamokonda vala tutavela kuevi tuiva, mahi omokonda tutyii okuti omaulo Ombimbiliya ekahi nokufuisuapo. Tuesukisa okukala tyalunguka nokuafwapo tyina tukevelela onthyulilo.

MATUKEVELELA OMUVO ULIFUEPI?

10, 11. (a) Omokonda yatyi Jesus apopila ovalongwa vae “vakale tyalunguka”? (b) Oityi Jesus apopila ovalanduli vae valinge inkha onthyulilo kaiya liwa ngetyi vasoka? (Tala olutalatu pefo pahimbikila onthele.)

¹⁰ Ovanyingi puonthue vaumbila Jeova nekolelo vekahi nokukevelela onthiki ya Jeova omanima omanyingi. Tyakolela vali hamanima tukahi nokukevelela, mahi tuna okutualako okukevelela onthiki oyo maiya apa katutu. Onthwe tuesukisa okukevelela onalupi Jesus meya okuhanyako ouye wa Satanasi. Hinangela onondaka mba Jesus etyi ati: “Tualeiko tyalunguka, tualeiko tyipahi, mokonda omuvo wanakua kamuwii. Otyo tyelifwa nomulume walinga oungendi asipo eumbo liae, atepulila ovilinga ovapika vae, apopila omupika wokuyunga pombundi akale tyalunguka. Tualeiko okukala tyalunguka, mokonda kamutyii onalupi muene weumbo meya, tyilinge meya kekumbi ine omokati kotyinthiki, ine meya mokupopia kwekuandambolo ine okombimba. Opo ehemuvase mulele, tyina amemuuhulukila. Mahi etyi ndyimupopila ndyityipopila aveho, okuti tualeiko tyalunguka.”​—Marcos 13:33-37.

¹¹ Etyi ovalongwa va Jesus vanoñgonoka okuti Jesus wahimbika okutumina mo 1914, avaimbuka okuti onthyulilo ikahi popepi. Avalekesa okuti velipongiya etyi vaundapa unene movilinga viokuivisa. Jesus wapopia okuti kameya liwa etyi ati meya “mokupopia kwekuandambolo ine okombimba.” Inkha otyo tyamonekele oityi ovalanduli vae vesukisa okulinga? Jesus wati “Kalei tyalunguka.” Namphila pamwe tulitehelela okuti tuakevela omuvo omunyingi, mahi otyo katyihangununa okuti onthyulilo ikahi kokule ine kamaiya mononthiki mbetu.

12. Oityi Abakuke apula ku Jeova, iya oñgeni Huku emukumbulula?

¹² Omuuli Abakuke wakevelele noumphua-lundo putyina aivisa ehanyauno lio Jelusalei. Ovauli ovakuavo vatetekela kwe navo vaivisile onondaka ombo mokueenda kuomanima omanyingi. Abakuke ankho umona okuti onondingavivi novivi vieliyawisa vali tyipona kohale. Aiti Jeova emukuateseko, apulu okuti: “Alo nalupi Jeova ndyina okuliyavela okuita ombatelo?” Namphila Jeova kapopile onalupi onthyulilo maiya, walaa omuuli Abakuke okuti: “Kamalisete!” Jeova tupu apopila Abakuke opo “atualeko okukevela.”​—Tanga Habacuque 1:1-4; 2:3.

13. Oityi Abakuke ñgeno ankho apondola okusoka, iya omokonda yatyi ñgeno tyakala otyiponga?

¹³ Soka ñgeno Abakuke wayekelepo okukevela onthyulilo iya apopi okuti: “Ame nakevelela ehanyauno lio Jelusalei omanima omanyingi. Onthyulilo nkhele ikahi kokule unene. Hesukisile vali okuivisa konthele yehanyauno olio. Ovilinga ovio vipondola okulingwa navakuetu.’ Oityi ñgeno tyamoneka inkha wasokele ngotyo? Ñgeno kapandelwe vali na Jeova. Iya inkha kafuilepo etyi onthyulilo yeya, ñgeno wankhia.

14. Omokonda yatyi matukapandula Jeova mokonda yomalondolo etuavela opo tutualeko nokukevelela onthyulilo?

¹⁴ Soka ñgeno ove ukahi mouye omupe. Ovipuka aviho viaulwa konthele yononthiki mbahulilila viamoneka umwe ngetyi Jeova apopia. Onthumbi una mu Jeova iliyawisa vali unene tyipona kohale, iya ukala vali nonthumbi yokuti ovipuka alaa mevifuisapo. (Tanga Josué 23:14.) Ove upandula Jeova mokonda yokuaeta onthyulilo momuvo watyo, netyi alondola ovanthu vae opo vatualeko nokukevelela.​—Atos 1:7; 1 Pedro 4:7.

TUTUALAKO OKUIVISA PUTYINA TUKEVELELA

15, 16. Omokonda yatyi tulingila atyiho tuvila opo tuundape movilinga viokuivisa mokueenda kuomuvo uno wonthyulilo?

¹⁵ Eongano lia Jeova litualako okutulunda opo tupakule omuenyo wetu movilinga via Jeova. Ondundo oyo itukuatesako okuundapa vali unene movilinga via Huku nokutala okuti onondaka tuivisa mbalumbana. Onthwe tuna onthumbi yokuti enyingilikilo lia Jesus likahi nokufuisuapo iya onthyulilo maiya apa katutu. Ngotyo tupaka Jeova tete momuenyo wetu iya tutualako okuivisa onondaka onongwa Mbouhamba.​—Mateus 6:33; Marcos 13:10.

¹⁶ Tyina tuiivisa onondaka onongwa kuvakuetu, tuvekuatesako opo vahupe kehanyauno liouye wa Satanasi ukahi popepi unene. Mo 1945 kuamonekele otyiponga tyimwe etyi o ombapolo itiwa Wilhelm Gustloff yanyingila kohi yomeva. Ovanthu ovanyingi avankhi. Omphange umwe nomulume wae avayovolwa mombapolo oyo. Omphange oo uhinangela okuti etyi ombapolo ikahi nokunyingila kohi, omukai umwe eliyavelela peulu okuti: “Onopasita mbange! Onopasita mbange! Omalumono ange! Omalumono ange aeho ekahi mombuelo yokambina. Mandyipeseka kovipuka ovinyingi!” Mahi ovakuavo ankho vekahi mowato avanoñgonoka oityi tyakolela vali iya avalingi atyiho opo vayovole omienyo viovanthu. Hono, omienyo vikahi motyiponga. Nonthue hono tukahi ngovanthu ovo, iya tuundapa unene movilinga viokuivisa. Onthue tuesukisa okulinga atyiho tuvila opo tukuateseko ovanthu vahupe konthyulilo youye uno.

17. Omokonda yatyi tutavelela okuti onthyulilo maiya apa katutu?

¹⁷ Tyimoneka nawa okuti omaulo Ombimbiliya ekahi nokufuiswapo iya onthyulilo youye uno ikahi unene popepi. Tukevelela “onombinga ekwi” “nenyama” tyina vakautukila onongeleya mbomatutu, Ombambilonia Onene. (Revelação 17:16) Onthue katufanyeka omuvo patyi wesukisa tyina ovipuka ovio vihenemoneke. Katupondola okulimbuako okuti Huku oe “makapaka olusoke momitima viavo” opo vautukile onongeleya mbomatutu iya otyo matyikaenda momuvo wehehi! (Revelação 17:17) Onthyulilo youye wa Satanasi ikahi popepi. Ngotyo onthue tutavela elondolo lia Jesus liokuati: “Liyungei nawa opo omitima vienyi vihakale nelelele liokulia unene, nokunwa unene, no kusukalala novipuka viomuenyo, iya onthiki oyo aimuhupula ngeliva.” (Lucas 21:34, 35; Revelação 16:15) Tukalei tyalunguka nokutualako movilinga via Jeova, nonthumbi yokuti “ukuatesako vana vatualako okukevelela kwe.”​—Isaías 64:4.

18. Epulo patyi matukelilongesa monthele mailandulako?

¹⁸ Tyina tukevelela onthyulilo youye uno wovivi, tuesukisa okutavela elondolo lia Judas liati: “Onwe, nonthyolwa, lipamekei mekolelo lienyi esukuke, nokulikuambela nospilitu sandu. Tualeiko okukala mohole ya Huku, putyina mukevelela okankhenda ka Tatekulu yetu Jesus Kristu, pala okupewa omuenyo wahapu.” (Judas 20, 21) Oñgeni matulekesa okuti tukahi nokukevelela ouye omupe wa Huku mauya apa katutu? Matukelilongesa-tyo monthele mailandulako.