Oñgeni Motange Ombimbiliya Monkhalelo Ihambukiswa?

Okuti onkhalelo utanga iponeswa? Ine ihambukiswa? Onalupi ove mohimbika okutanga Ombimbiliya? Atyiho tyitei kuove, onalupi, noñgeni mohimbika okutanga. Matutale oityi upondola okulinga opo uyawise ehambu liove tyina utanga Ombimbiliya.

Holovona Ombimbiliya yapitiyua monkhalelo yapepuka. Inkha utanga omukanda umwe una onondaka mbalema ine hamwe mbuhapopiwa unene hono ine mbahanoñgonokelwe nawa, ove kumakala nehambu liokutanga. Ngotyo, holovona Ombimbiliya yapitiyua monkhalelo ovanthu vapopia hono opo wiinoñgonoke vali nawa iya aikuhiki komutima. Apeho holovona nounongo Ombimbiliya yapitiyua nawa iya iivala nawa.a

Undapesa oviti ovipe vikahi-ko hono. Hono upondola okukala Nombimbiliya mononkhalelo mbelikalaila. Ono Mbimbiliya mbumwe mbupondola okutangelwa mo internet, mono kombutador, nomo tablete ine omono telefone. Mono Mbimbiliya mbumwe muakutikinya oviti ove upondola okuovolola vali liwa tyina utanga ono versikulu ononkuavo uhanda okueleka nono Mbimbiliya ononkhuavo. Inkha ove uhanda vala okutehelela, Ombimbiliya tupu yangalavalwa. Ovanthu ovanyingi vena ehambu liokutehelela Ombimbiliya yangalavalwa tyina vekahi moungendi, na tyina vakoha ovikutu, ine tyina veli potyilinga tyimwe tyivekuatesako okutehelela. Omokonda yatyi uhahetekela onkhalelo imwe puombo?

Undapesa oviti viokulilongesa Ombimbiliya. ­Oviti viokulilongesa Ombimbiliya vipondola okukuatesako vali unene tyina utanga. Mo Mbimbiliya tuvasamo omapa ovilongo, apondola okutukuatesako okuvasa omphangu imwe oku kuaenda ehipululo limwe tukahi nokutanga. Ononthele mbumwe, ngaina yati “Omalongeso Ombimbiliya” ivasiwa no site jw.org, ipondola okukukuatesako okunoñgonoka vali nawa ononthele ononyingi mbo Mbimbiliya.

Hetekela okuundapesa ononkhalelo ononkuavo mbelikalela. Inkha okutanga Ombimbiliya okuhimbikila konthyimbi alo konthyulilo utyitala ngatyina tyipuilisa, omokonda yatyi wahatangela ononthele mbelikalaila mambukuavela ondundo yokukala vali nehando liokutanga Ombimbiliya? Inkha ove uhanda okuvasa omunthu wo kohale ankho wankhimana mo Mbimbiliya, upondola okutanga omukanda upopia konthele yomunthu oo. Onkhalelo yapepuka ivasiwa mo kakasa kati: “Noñgonoka Ovanthu Vankhimana Vapopiwa Mombimbiliya.” Ine hamwe uhanda okutanga Ombimbiliya monkhalelo ovipuka vielilandulila.Omokonda yatyi wahakoyelapo imwe?