“Etyi Otyiawa Otyiwa Vali Napewa”

Otyo tyapopia omukainthu umwe una omanima 13 etyi apewa ombuneka yotyimbwa. Omukai umwe omuhona wati, puetyi ankho ekahi mosikola apewa o computadore, otyo atyikala otyiawa tyimwe tyapilulula omuenyo wae. Omulume umwe wanepa pahe wati, etyi vatuula enima like tyelinepa apewa okamukanda. Kwe otyo, otyo otyiawa otyiwa vali apewa.

Omanima atyo aeho ovanthu vapesela omuvo omunyingi wokuovola otyiawa “otyiwa vali,” pala vaavele omapanga avo ine ombunga yavo monthiki imwe yakolela. Iya ovanthu vamwe vehole okuava, vetyihole unene tyina ovanthu vaavela velitehelela ngovanthu vapopiwa pombanda. Oñgeni ove ulitehelela? Nove uhanda okupewa ine okuava otyipuka tyimwe omunthu etyipande?

Otyo otyipuka tyimwe tyikahi nawa, ha mokonda vala yonkhalelo omunthu waavela melitehelela, mahi tupu omokonda yonkhalelo omunthu wokuaavela otyiawa elitehelela. Tyihe otyo vala, Ombimbiliya yati: “Okuava tyihambukiswa vali tyipona okupewa.” (Atos 20:35) Tyotyili, ehambu lituka kokuava litei konkhalelo omunthu watambula otyiawa elitehelela.

Ngotyo, oityi upondola okulinga opo otyipuka waava tyietele ehambu ove na una waavela? Iya inkha kuetyivilile okuava otyiawa “otyiwa vali,” oityi upondola okulinga opo waave otyiawa matyipandwa?