Olie Utumonesa Ononkhumbi?

Inkha Huku haeko weetako ononkhumbi, opo omokonda yatyi kukalela ovita, noluhepo, novinimawe iya noungangala? Ondaka ya Huku Ombimbiliya, ipopia ovipuka vitatu, vilekesa omokonda yatyi ovanthu valambela mononkhumbi:

1. Elungavi, Okuvakela Momatutu iya Noundyale. “Omunthu utumina omunthu mukuavo pala okulimonesa ononkhumbi.” (Eclesiastes 8:9) Ovanthu vamona ononkhumbi mokonda yovanthu ovakalavi, noukuankhali iya nelungavi.

2. Omuvo Novitateka Viuhuluka. Ovanthu vamonene ononkhumbi, “omokonda omuvo novitateka viuhulukila vala ovanthu aveho.” (Eclesiastes 9:11) Pamwe omokonda ovanthu veli pomphangu yapenga no momuvo wapenga, iya apamoneka otyiponga, ine hamwe okuapengesa.

3. Omutumini Wouye Omukalavi. Ombimbiliya ipopia nawa-nawa omokonda yatyi ovanthu vamonena ononkhumbi. Yati: “Ouye auho ukahi pomaoko ondingavivi.” (1  João 5:19) Ukahi “pomavoko ondingavivi” ondingavivi oyo o Satanasi Eliapu una epondolo enene. Potete ankho oandyu ya Huku, mahi “aihatuailako okukala motyili.” (João 8:44) Onoandyu mbumwe tupu ambutyitukila-po Huku ambuhulu ku Satanasi, mokonda yelungavi ambulingi omahando ambo muene iya konyima ambuihanwa okuti ovilulu. (Gênesis 6:1-5) Okutuka opo, Satanasi no vilulu viae vehole okuundapesa epondolo vena opo vahongiliye ovanthu okulinga ovivi. Haunene mononthiki mbetu mbuno. Pahetyino, Eliapu lina onyengo onene iya “likahi nokuyondya ovanthu aveho,” iya mokonda yotyo ‘ovanthu vekahi nokumona ononkhumbi.’ (Apocalipse 12:9, 12) Tyotyili, Satanasi omukalavi unene. Oe uhambukwa tyina ovanthu vamona ononkhumbi. Huku haeko weetela ovanthu ononkhumbi, o Satanasi.

NKHELE SOKA: Satanasi omukalavi, kumwe novilulu viae ovo vekahi nokuetela ovanthu ononkhumbi. Tala etyi Ombimbiliya ipopia: “Huku ohole.” (1 João 4:8) Ngotyo mokonda ohole otyituwa tyae “nalumwe malingi etyi tyahaviukile, Wepondolo Aliho nalumwe malingi etyi tyapenga!”—Jó 34:10.

Mahi, upondola okulipula okuti: ‘Alo-pi Huku Wepondolo mayeke Satanasi atualeko nokutumina?’ Onthue tutyii okuti, Huku uyele ovivi, iya ononkhumbi mbetu mbumuetela oluihamo olunene. Tupu, ondaka yae yati: “Pakulei omasukalalo enyi aeho ku Huku, mokonda oe wasuka no onwe.” (1 Pedro 5:7) Huku una ohole nonthue iya una epondolo liokumanako ononkhumbi ambuho, novivi, ngetyi tyipopia onthele mailandulako.a