Oprograma Yotyonge Tyononthiki Onombali
Okuti tyitavela okutualako tyapama opo tuhasoyesue navana veyele efendelo liotyotyili? Oñgeni tupondola okufinda ononkhono mbuovola okutukondola mouye muhena ekolelo? Otyonge tyononthiki onombali, tyo 2009, matyituavela omakumbululo akolela konthele yomapulo oo. Osapi yati, “Tualako Okufinda Otyivi Notyiwa.” (Rom. 12:21) Tutalei etyi matyikapopiwa motyonge otyo.
Omukulu wo distritu, malingi omalongomona ena onosapi, “Tupewa Ononkhono pala Okufinda Otyivi Notyiwa,” “Uheliyumbe Unene Onthumbi!,” “Apa Katutu Ovipuka Aviho Ovivi Mavikapwako!,” iya “Tupamekei Ekolelo Lietu opo Tufinde Ouye.” Omukulu omutalelipo womauaneno malingi elongomona lina osapi, “Pahe Ou Omuvo Wokukala Tyalunguka!,” liapolwa mu Romanos 13:11-13, nekuavo lina osapi, “Wahakale Tyasoya Monthiki Yononkhumbi,” liapolwa mu Provérbios 24:10. Tupu matutehelela onthele yomutalelipo womauaneno yati, “Tutehelelei Nawa Etyi Tyesukisa Momawaneno.” Onthele onkhuavo maitupameka unene yati, “Upondola Okuundapa ‘Movilinga Evi Viokuivisa’ Pokukala Omukokoli-ndyila?” Elongomona liotete lina ononthele ononkhuana, ina osapi yati, “Tualako Tyapama Oliyakulila Komatutu Eliapu.” Malitukuatesako okuimbuka nokuanya omaliva Eliapu konthele younongo womouye, ovipito novitalukiso, nokulilongesa mo nosikola ononene. Elongomona ekuavo lina ononthele ononkhuana, ina osapi yati, “Kala Nononkhono Pala Okuanya Satanasi Mononthiki Mbuno Onondingavivi,” malitulekesa oñgeni tupondola okuundapesa nawa elondolo likahi mu Efésios 6:10-18.
Okutetela otyivi pomui, tyelikuata kumue nokuivisa onondaka Mbouhamba. (Rev. 12:17) Tyotyili, Satanasi matualeko okulinga ononkhono ononene opo ayapule Onombangi mba Jeova! (Isa. 43:10, 12) Mahi, Eliapu kamalityivili mokonda onthue tuatokola “okutualako okufinda otyivi notyiwa.” Lipongiya opo upoleko esilivilo kononthele ambuho mbotyonge etyi tyononthiki onombali.