Onkhuta Imwe Pala Ovakristau
1. Epongiyo patyi epe liahimbikile menima lio 1938, iya ankho lialingilwa tyi?
1 Mo 1938 eongano lia Jeova liahimbikile nepongiyo limwe epe. Omawaneno ankho akongwa opo aye ko assembléias regionais, pahe iihanwa okuti ovionge viononthiki onombali. Ankho vilingilwa tyi? Onthele imwe yo Informanto ya Janeiro yo 1939 (pahe itiwa Ovilinga Vietu Viouhamba) yakumbulula: “Ovionge ovio ankho vilinga onthele Yeongano lia Jeova pala okuhongolela ovilinga viae Viouhamba. Elongeso ankho vapewa liakolela pala kese munthu opo valinge nawa ovilinga vapewa.” Tyina tutala eliyawiso liovaivisi ankho mo 1938 vena vala 58.000, pahe mo 2009 valamba po 7.000.000, otyo tyilekesa okuti ovionge viononthiki onombali, vikahi nokufuisapo etyi vialingilwa, okukuatesako ovakristau ‘okulinga ovilinga vapewa’!
2. Oityi matukatehelela motyonge tyetu tyononthiki onombali tyenima maliya?
2 Osapi Yenima Maliya: Tukahi nokukevelela otyonge tyononthiki onombali matyihimbika mu Tungonkhe nepameko otyonge otyo matyavela. Osapi yati: “Onwe Kamulingi Onthele Youye” yapolua mu João 15:19. Oepi omalongomona amwe maavatela Ovakristau okupolako esilivilo? Tyasapalo matutehelela elongomona liati: “Ovilinga Viomuwo Auho Vituamena —Ñgeni?” Tupu matutehelela elongomona liononthele ononthatu: “Uhayeke Okuhongiliyua no . . .” “Enyama,” “Ekunga Enene,” iya “Onongendi Ovakuavitanda.” Tyalumingu matutehelela elongomona liayapaulua ononthele lina osapi yati: “Kala Nohole na Jeova, Uhakale Nohole Nouye.” Tupu matutehelela omalongomona omakuavo, “Tutualeiko ‘Okukala Ngatyina Tunongendi,’” iya “Kalei Nomutima Wakola! Onwe Mupondola Okufinda Ouye.”
3. Ouwa patyi matupoloko inkha tuenda kotyonge otyo?
3 Konyima yokutehelela otyonge tyononthiki onombali tyokualamba, omphange umwe ankho uhaundapa apeho movilinga viokuivisa wahonekele okuti otyonge tyemulunda okutala nawa onkhalelo yae iya atokola “okutunda movilinga viae opo aundape vali movilinga viokuivisa!” Tyotyili, otyonge tyononthiki onombali tyenima maliya matyitukuatesako atuho okukala nohole na Jeova tyipona okukala nohole nouye. (1 João 2:15-17) Okulipongiya opo ukalepo, nokutehelela nawa mopoloko ouwa konkhuta oyo yapongiyua pala Ovakristau!