Otyonge Tyimue Tyononthiki Onombali Matyituvatela Okuyunga Nawa Oupanga Wetu na Jeova
1. Oityi Jeova apongiya opo etukuateseko okufuisapo ovilinga vietu viokuivisa onondaka onongwa?
1 Jeova utuavela nohole elongeso, nepameko tuesukisa pala okufuisapo ovilinga viokuivisa onondaka onongwa. (Mat. 24:14; 2 Tim. 4:17) Onkhalelo imue tupondola okupewa elongeso, nepameko, omotyonge tyetu tyononthiki onombali tulinga kese enima. O programa omphe yenima lio 2010, maikapopia osapi yati: “Yunga Nawa Oupanga Wove na Jeova,” yapolwa mu Romanos 8:5 na Judas 17-19. Otyonge otyo, matyihimbika mosimano 31 ya Kwenye Kunene yo 2009.
2. (a) Omononkhalelo patyi otyonge tyononthiki onombali matyitukuatesako? (b) Oñgeni ovionge viononthiki onombali vialingwa omanima okualamba viekukuatesako movilinga viove viokuivisa?
2 Oñgeni Otyonge Tyononthiki Onombali Tyitukuatesako: Otyonge otyo matyitulondola konthele yotyiponga tyokupesela omuvo wetu atuhasuku novipuka viakolela. Matulilongesa oñgeni tupondola okulityilika otyituwa tyokuliyekelela, nokutala oityi tyakutikinya okukala omunthu wopaspilitu. Elongomona liokuayapaulwa ononthele malilingwa Tyalumingu, malilekesa oityi kese umue no nombunga vapondola okulinga opo vapameke oupanga wavo na Jeova putyina vapita movitateka vilola ekolelo liavo. Otyonge matyitukuatesako okuyunga nawa omutima wetu, nokutualako noupanga wetu na Jeova, nokusoka apeho kononkhano onongwa mavakapewa vana vayunga nawa oupanga wavo na Jeova.
3. Otyonge tyove tyononthiki onombali matyilingwa nalupi, iya oityi ove una okutokola okulinga?
3 Putyina wanoñgonoka onalupi na apa mamukalingila otyonge tyenyi tyononthiki onombali, lipongiya nawa opo ukalepo ononthiki ambuho onombali, nokutehelela nawa ononthele ambuho. Kala nonthumbi yokuti Jeova wavela ononkhano onongwa una ulinga ovipuka nombili.—Pro. 21:5.
4. Oityi matukalongeswa motyonge tyetu tyononthiki onombali tyikahi popepi?
4 Tyotyili, Jeova Omuavi wotyaua otyo otyiwa. Otyonge otyo tyapongiyua nomupika wekolelo, otyo umue tuesukisa opo tufuisepo ovilinga vietu viokuumbila Huku. Tupandula unene Jeova mokonda yovipuka ovio aviho etuavela nohole vitukuatesako “okukuatelela mekevelelo lietu tualekesa kounyingi tyihatengauka.”—Heb. 10:23-25; Tia. 1:17.