Kuaholovonwa Onthiki Imue Yakolela Pala Okulongesa Ovanthu Ombimbiliya
1 Okupolelela mu Kupupu, kese hanyi omawaneno aeho ena okuholovona onthiki ike pala okuhimbika okulongesa ovanthu Ombimbiliya. Mupondola okuholovona osimano yotete yohanyi, Motyasapalo ine Tyalumingu. Monthiki oyo, inkha ovanthu muvasa vaanya okulilongesa Ombimbiliya, ovaivisi vapondola okuava omukanda Ombimbiliya Ilongesa ine Omutala Womulavi no Despertai! omipe. Ovakulu aveho vomawaneno, novakuatesiko vovakulu vewaneno, vena okuovola omuvo opo vaundape nombili movilinga ovio, nokuvatela ovaivisi okuhimbika okulongesa ovanthu Ombimbiliya.
2 O Komisau Yovilinga Yewaneno, vena okutokola onthiki patyi mavaholovona pala ikale vala yokuhimbika okulongesa ovanthu Ombimbiliya. Hinangelesei apeho ovaivisi opo velipongiye, nokulinga ononkhono pala okuhimbika okulongesa ovanthu Ombimbiliya umbo na umbo na tyina vakatalelapo vana vokualekesa esuko.
3 Oñgeni Molipongiya: Tupondola okuvasa onondonga pala okuhimbika okulongesa ovanthu Ombimbiliya mo suplemendu yo Nosso Ministério do Reino ya Janeiro yo 2006, no momukanda Raciocínio pefo 12. Vamue vapondola okuholovona okuundapesa otratadu yati, Okuti Ove Uhanda Okunoñgonoka Otyili? Tupu, pefo 3 yo Nosso Ministério do Reino ya Agosto yo 2007, yaava onondonga pala okuhimbika okulongesa Ombimbiliya tyina tukatalelapo vana vetavela Omutala Womulavi no Despertai! Ovakulu vewaneno, novakuatesiko vovakulu vewaneno, mavaholovonwa pala okuendesa eliongiyo liokutunda movilinga viokuivisa mono minutu 10 alo 15. Mokueenda kueliongiyo olio, avelei onondonga mbakolela pala okulekesa oñgeni tyihimbikua elilongeso Liombimbiliya ine okulinga elekeso.
4 Tyotyili, haavehoko mavetavela okulilongesa Ombimbiliya ine okutualako nelilongeso liavo. Otyo kamatyitutyilika okutualako okulongesa ovanthu Ombimbiliya, mokonda Jeova oe ukoka ovanthu velifwa nonongi mewaneno liae. (João 6:44) Otyilinga tyetu, hakukuna vala onombuto mbotyili, mahi tupu tuna okuhondyuela nokutapela vana vokualekesa esuko, nokulilongesa navo Ombimbiliya. Inkha tulinga ngotyo, matukala nelao liokuundapa kumue na Huku.—1 Cor. 3:9.