Oñgeni Ovo Mavatehelela?
1. Omokonda yatyi ovilinga viokuivisa pamue kaviapepukile? Iya omokonda yatyi tuna okutualako novilinga ovio?
1 Mokonda onthiki ya Jeova ikahi popepi, tuesukisa okukuatesako vakuetu nondyanga opo vakale nenoñgonoko liafuapo konthele ya Huku, nehando liae. (João 17:3; 2 Ped. 3:9, 10) Otyo pamue katyapepukile mokonda ovanyingi kavetavela ine pamue vetulinga omukuele mokonda yovilinga vietu viokuivisa. (2 Ped. 3:3, 4) Mahi, tuna omahunga omanyingi pala okutavela okuti motelitoliu yetu nkhele muna ovanthu mavetavela onondaka onongwa. Oñgeni ovanthu ovo mavatehelela inkha petupu ou wivisa?—Rom. 10:14, 15.
2. Oñgeni ongeleka ya apostolu Paulu ituavela ondundo?
2 Okuluisa Oundyale: Mokonda nkhele pena ovanthu ovanyingi vahanda okutehelela ondaka konthele Youhamba wa Huku, tuhayekei ovanthu vetutyilike. Filipu, epundaumbo liotete mo Europa apostolu Paulu aivisile onondaka onongwa Mbouhamba. Etyi Paulu na Sila vatendeleyua, ovo vavetelue novimuti, avapakua mokaleya. (Atos 16:16-24) Mahi, Paulu kakalele nowoma wokuivisa mokonda yononkhumbi ombo. Etyi akatalelapo epundaumbo lio Tesalonika, oe ‘wakalele nomutima wakola mu Huku.’ (1 Tes. 2:2) Ongeleka ya Paulu ilekesa omokonda yatyi katupondola ‘okuyekapo’ ovilinga vietu viokuivisa.—Gál. 6:9.
3. Oityi tyipondola okulunda vana ankho vahahande okutehelela, okupilulula onkhalelo yavo yokusoka?
3 Ovanthu ovanyingi vaanyene okutehelela kohale, pahe vekahi nokutehelela. Tyikahi nokueta omapiluluko oo, ovitateka konthele yonombongo, omauvela, ononkhia mombunga, ine onkhalelo youye uno. (1 Cor. 7:31) Vamue ankho valingilua oundyale novohe, pahe vekula iya vahanda okutehelela. Okutualako novilinga vietu viokuivisa, tyavela ovanthu ovo omphitilo yokutavela, opo navo vaivise enyina lia Jeova, putyina nkhele lihenetake.—Rom. 10:13.
4. Oityi tyituavela ondundo opo tutualeko novilinga viokuivisa “tyihatalama”?
4 “Okuivisa Tyihatalama”: Ohole tuna na Huku, no omunthele yetu, maituavela ondundo opo tutualeko okuivisa “tyihatalama,” nokulinga ovalongwa, ngetyi tyalingile ono apostolu kotyita tyotete. (Atos 5:42) Ovanthu ovanyingi, vekahi “nokukema, nokuepuila mokonda yovipuka vitoyesa” vilingwa hono. (Eze. 9:4) Ovanthu ovo, tyina vatehelela onondaka onongwa Mbouhamba, vakala nekevelelo, nokuyovoka! Namphila ovanthu ovanyingi kavahande okutehelela, Ovihonekwa vitupameka okuti Jeova upanda unene ononkhono mbetu.—Heb. 13:15, 16.