Tualako Okuivisa Tyahatalama
1 Ovikando vimue, hamue tutala okuti potyilongo tyetu paundapwale unene, mahi, ovanthu vokuetavela kavehi. Moluotyo, nkhele pena omahunga omanyingi opo tutualeko nokuivisa.—Mat. 28:19, 20.
2 Okuava Oumbangi: Jesus wapopile okuti okuivisa Ouhamba wa Huku ankho onthele imue yakolela yenyingilikilo ‘yonthyulilo youye.’ Tupu wapopile okuti onondaka onongwa Mbouhamba wa Huku mambuiviswa ‘pala oumbangi wovilongo aviho.’ (Mat. 24:3, 14) Tyiava oumbangi umue omunene, tyina ovanthu vetutala okuti tukahi nokuundapa movilinga viokuivisa onondaka onongwa Mbouhamba wa Huku. Tyina tuamatundu pomphangu apa ankho tukahi nokuivisila, ovanthu vamue vapondola okupopia konthele yonthue ono ola ononyingi ine ononthiki, namphila ovo vehetavelele onondaka onongwa Mbouhamba wa Huku tuevetolela. Okunoñgonoka omahunga ovilinga vietu viokuivisa, tyitukuatesako okukoleleya. Onthue tuhambukiswa Jeova tyina tuava oumbangi konthele yomaulo Ombimbiliya afuiswapo, nokuvetolela konthele yekoyeso lia Huku.—2 Tes. 1:6-9.
3 Tyesukisa Okukoleleya: Mokonda yovitalukiso ovinyingi, novipuka ovikuavo ovanthu vasukalala navio, tuesukisa okukoleleya opo tutualeko nokuovola ovanthu vokuna esuko liokutehelela Ondaka ya Huku. Mokueenda kuenima, omukai umue ankho utaleluapo onosimano ambuho no Nombangi mba Jeova, iya petupu onthiki naike eveyekele vanyingile meumbo liae pala vapopie konthele Yombimbiliya. Mahi, etyi evetehelela, omukai ahambukwa unene netyi eiva iya etavela okulilongesa Ombimbiliya, ahimbika okuenda komaliongiyo, iya alekesa ehando liokumbatisalwa.
4 Onkhalelo youye ikahi nokupiluluka, tupu, ovituwa viovanthu vikahi nokupiluluka. Ovanthu ovanyingi vehetavelele kohale, pahe vapondola okukala tyafuapo pala okutehelela. Inkha omunthu wike vala etavela, ononkhono mbetu mbokukoleleya kambapesekele.
5 Mouye auho, ovanthu ‘vekahi nokukema nokuepuila mokonda yovipuka vitoyesa vilingwa.’ (Eze. 9:4) Etyi tyitundilila kovilinga vietu viokuivisa, elekeso liokuti vana vokuna omutima waviuka vekahi nokutavela onondaka onongwa Mbouhamba wa Huku. (Isa. 2:2, 3) Moluotyo, tutualeiko okuivisa tyahatalama, nokukoleleya nohole tyina ‘tutuaila ovanthu onondaka onongwa mbovipuka oviwa.’—Isa. 52:7; Atos 5:42.