Yakulila Onondunge Mbove
1. Oipi osapi yotyonge tyononthiki onombali tyenima liovilinga lio 2013, iya tyalingilwa tyi?
1 Jesus walongesile ovalongwa vae okukala nohole na Jeova nomutima wavo auho, nomuenyo wavo auho nonondunge mbavo ambuho. (Mat. 22:37, 38) Otyonge tyononthiki ononthatu no tyononthiki onombali, no tyonthiki ike vienima eli, viapongiyua ine viafuiikwa opo vitukuateseko okupameka onkhalelo tuatuwa mokati. Ngetyi uhinangela, osapi yotyonge tyononthiki ononthatu yati: “Pakala Vali Nawa Omutima Wove!” Otyonge tyonthiki ike tyenima liovilinga lio 2013 tyina osapi yati: “Yakulila Ombungo Yove.” Otyonge tyononthiki onombali matyihimbika mohanyi maiya, tyina osapi yati: “Yakulila Onondunge Mbove,” yapolwa mu Mateus 22:37. Otyonge otyo tyalingwa opo tyikuateseko kese umwe puonthue okutala nawa omalusoke etu, opo apandwe vali na Jeova.
2. Mokueenda kuotyonge tuesukisa okuovola omakumbululo omapulo patyi?
2 Matyipopi Konthele Yatyi: Putyina tutehelela otyonge tyononthiki onombali, tuesukisa okuovola omakumbululo omapulo aa, maalekesa ononthele mbavilapo:
• Oñgeni tupondola okulityilika omalusoke ovanthu?
• Oñgeni matukuatesako okupola enthiki liatuikisa omitima via vana vehetavela?
• Onkhalelo patyi yokusoka tuhanda okukala nayo?
• Okusokolola nawa monkhalelo yaviuka tyeta ouwa patyi?
• Oñgeni matuyeke Jeova aviukise onkhalelo yetu yokusoka?
• Oñgeni ovalume, novakai, novohe, novana vapondola okukuatesako ombunga okukala nehambu?
• Oñgeni matukala tyelipongiya pala onthiki ya Jeova?
• Okupameka omitima vietu pala ovilinga tyilekesa tyi?
• Vana vaendela muetyi valongeswa vapolako ouwa patyi?
3. Okukala potyonge otyo ononthiki ambuho onombali, nokutehelela nawa, nokuendela muetyi matulongeswa, tyakolela mokonda yatyi?
3 Satanasi ukahi nokulwa nomitima vietu okuovola okuvinyona. (2 Cor. 11:3) Ngotyo, tuesukisa okuyakulila omitima vietu nokuyunga omalusoke etu. Tuesukisa okutualako okusoka nga Kristu nokulwa nouye ou uhena ovitumino. (1 Cor. 2:16) Moluotyo, lipongiya ine lifuiika opo ukale potyonge etyi ononthiki ambuho onombali. Tehelela nawa. Okuendela monondonga mbakolela matukapewa, matyitukuatesako okupameka omitima vietu opo tuundape nombili movilinga Viouhamba wa Huku.—1 Ped. 1:13.