Ove Wafuapo Pala Okuava Oumbangi Tyina Uhekahi Movilinga Viokuivisa?
1 Okuava oumbangi tyina uhekahi movilinga viokuivisa tyipondola okutuvatela unene. Ombimbiliya ipopia onongeleka ononyingi onongwa mbokuava oumbangi monkhalelo oyo. (João 4:7-15) Oityi tupondola okulinga opo tulipongiye pala okuava oumbangi monkhalelo oyo?
2 Omuvalo Nokulifiwisa: Okutala nawa apeho onkhalelo yetu yokuvala nokulifiwisa, matyitukuatesako okupopia navakuetu konthele yekolelo lietu. (1 Tim. 2:9, 10) Inkha tutala okuti ovikutu tuavala kaviaviukile, matulityilika okuava oumbangi. Mahi, inkha tuvala ovikutu vikahi nawa nokuasukuka, tyipondola okuhindila ovanthu okutupula omokonda yatyi tuavalela ngotyo. Mongeleka, ovalinepi vamue Onombangi vavala nawa, ankho vekahi nokulinga oungendi, iya avaumphama ponthele yomulume umwe o Musulumanu. Etyi omulume oo atala omuvalo wavo, wapula inkha ovo Ovakristau. Otyo tyatuala ketompho lio noola ononthatu konthele Yombimbiliya.
3 Okuhimbika Etompho: Etyi Jesus avasa omukai omu Samalitana ponyombo ya Jako, oe wahimbika etompho pokumuita omeva okunua. Tupu, tupondola okuhimbika etompho mokupopia otyipuka tyimwe ine okulinga epulo. Namphila pamwe tupondola okukala nowoma, tyitei kombatelo ya Jeova, onthue tupondola ‘okukala nomutima wakola’ pala okuhimbika etompho.—1 Tes. 2:2.
4 Ovola Onomphitilo Pala Okuava Oumbangi: Ovaivisi ovanyingi vehole okuvasa ononkhalelo mbokuava oumbangi tyina vehekahi movilinga viokuivisa. Tala nawa onkhalelo yove, nokusoka konthele yovanthu ulivasa navo komutenya. Tyinda omikanda viove Nombimbiliya onthutu. Tala nawa, nokulekesa esuko kovanthu vekahi ponthele yove. Tyina usoka tete konthele yonomphitilo mbokuava oumbangi mokueenda kuotyitenya, mokala tyafuapo pala okuava oumbangi ouwa.—Fil. 1:12-14; 1 Ped. 3:15.
5 Onthue tuna omahunga evali omawa pala okuovola onomphitilo mbokuava oumbangi tyina tuhekahi movilinga viokuivisa: Ohole tuna na Huku, navakuetu. (Mat. 22:37-39) Mokonda ovilinga viokuivisa vina okulingwa nondyanga, tuesukisa okulipongiya opo tukale tyafuapo pala okuava oumbangi tyina tuhekahi movilinga viokuivisa. Tuna okukala tyafuapo pala okuovola onomphitilo ambuho opo tupopile vakuetu onondaka onongwa Mbouhamba putyina nkhele pena omuwo.—Rom. 10:13, 14; 2 Tim. 4:2.
[Omapuko Elongeso]
1. Ongeleka patyi ilekesa okuti okuava oumbangi tyina tuhekahi movilinga viokuivisa tyipondola okutuvatela?
2. Oñgeni onkhalelo yetu yokuvala nokulifiwisa ipondola okutukuatesako okuavela oumbangi?
3. Okulandula ongeleka ya Jesus, oñgeni matuhimbika etompho?
4. Oñgeni tupondola okukala tyafuapo pala okuava oumbangi tyina tuhekahi movilinga viokuivisa?
5. Omokonda yatyi tuna okulipongiya pala okuavela oumbangi tyina tuhekahi movilinga viokuivisa?