Tunombangi Mba Jeova Omuvo Auho
1. Oityi tupondola okulilongesila kehipululo lia Jesus liokuava oumbangi omukai ponyombo?
1 Jesus ankho waenda ono ola ononyingi. Ankho waponua nokuna ohunga. Etyi ovalongwa vae vakalanda okulia, oe apumphama ponyombo kondye yepundaumbo lio Samaria opo apululukuepo. Jesus kaile ko Samaria okukaivisa, oe ankho ukahi vala nokulamba ondyila opo akatualeko novilinga viae viokuivisa ko Galileia. Mahi, oe waovola omphitilo pala okuava oumbangi omukai weile okatapa omeva. (João 4:5-14) Omokonda yatyi? Jesus nalumue ayekelepo okukala ombangi ya Jeova “yekolelo no yotyotyili.” (Rev. 3:14) Onthue tuhetekela Jesus pokukala Onombangi mba Jeova omuvo auho.—1 Ped. 2:21.
2. Oñgeni tupondola okulipongiya pala okuava oumbangi tyina tuhekahi movilinga viokuivisa?
2 Lipongiya: Tupondola okulipongiya pala okuava oumbangi tyina tuhekahi movilinga viokuivisa, pokutyinda omikanda. Ovaivisi ovanyingi vapaka omikanda pomphangu ovanthu vapondola okuvitala, nokuviavela vana vaundapa monovenda, valandesa ongasolina, navana velivasa navo mokueenda kuotyitenya. (Ecl. 11:6) Omphange umue ulinga apeho oungendi, utyinda Ombimbiliya onthutu nomukanda Ombimbiliya Ilongesa, alingi ononkhono pala okuhimbika etompho navana vapumphama ponthele yae.
3. Oñgeni tupondola okuhimbika etompho?
3 Okuhimbika Etompho: Tyina tuava oumbangi tyihekahi movilinga viokuivisa, katyesukisile okutanga otestu pala okuhimbika etompho. Etyi Jesus atomphola nomukai ponyombo, kahimbikile nokupopia okuti oe o Mesiya. Wemuita vala omeva pala okunwa, iya omukai akala nolumbwe. (João 4:7-9) Okupopia monkhalelo ngooyo, tyakuatesileko omphange umwe okuhimbika etompho etyi vemupula inkha ehole okulinga ovipito viomouye. Oe kapopile vala okuti kalingi ovipito ovio mokonda Ombangi ya Jeova, mahi, wapopia okuti: “Ame muene naholovona okuhalingi ovipito ovio.” Omunthu wokualinga epulo, ovikando ovinyingi upula omokonda yatyi, iya otyo atyivatela omphange okuava oumbangi.
4. Omokonda yatyi Mateus 28:18-20, ituavela ondundo?
4 Namphila Jesus amanene nombili ovilinga viae pano pohi, oe utualako nokulekesa esuko enene kovilinga viokuivisa vikahi nokulingwa ngetyi oe alingile. (Mat. 28:18-20) Moluotyo, ngetyi tyalingile Jesus Ongeleka yetu, onthue Nombangi mba Jeova tuafwapo pala okupopia apeho konthele yekolelo lietu.—Heb. 10:23.