Eliyawiso Liovanthu Vapopia Elaka Ekuavo Motelitoliu
1. Omphitilo patyi ihole okumoneka tyina tuundapa movilinga viokuivisa monotelitoliu mbetu tuapewa newaneno?
1 Jesus Kristu wapopile okuti onondaka onongwa mbuna okuiviswa kombanda yoohi aiho “pala oumbangi movilongo aviho.” Aveho vaundapa movilinga viokuivisa, nokulongesa vaimbuka okuti onondaka ombo mbakolela unene. (Mat. 24:14; 28:19, 20) Ovikando ovinyingi, putyina tuivisa nokulinga ovalongwa, tupondola okuvasa ovanthu vovilongo vielikalela vapopia elaka lielikalela nolietu. Ovo tupu, vatokala okupewa omphitilo yokutehelela onondaka Mbouhamba nokukala konthele yotyili putyina nkhele onthiki onene ya Jeova iheneye. (Mal. 3:18) Oityi tupondola okulinga opo tuvatele ovanthu vapopia elaka ekuavo moteletoliu yetu?
2. Omonkhalelo patyi tuhetekela Jeova tyina tupopia novanthu vapopia elaka ekuavo?
2 Kala Nolusoke Lua Jeova Konthele Yavana Vapopia Elaka Ekuavo: Opo tuhetekele ohole ya Jeova yokuhalingi okapungulula novanthu tuvasa motelitoliu yetu, tuna okukala nehando enene liokuvatela ovanthu opo vakale nenoñgonoko liafuapo liotyili konthele ya Jeova Huku, namphila vapopia elaka ekuavo. (Sal. 83:18; Atos 10:34, 35) Namphila tuesukisa tete okutala kuvana vapopia elaka lipopiwa mewaneno lietu, tupu tuesukisa okutala komasuka avana vapopia elaka ekuavo nokuovola ononkhalelo mbokuvepopila onondaka Mbouhamba wa Huku. Okulimbwa okuava oumbangi vana vapopia elaka ekuavo, katyelikuatele nehando lia Jeova liokuava oumbangi ovanthu vovilongo aviho. Oñgeni matuvatela ovanthu vahapopi elaka lietu?
3. Okamukanda patyi kalingwa pala onthue, iya oñgeni tupondola okulipongiya opo tukeundapese?
3 Undapesa Okamukanda Boas Novas Para Pessoas de Todas as Nações: Okamukanda aka, kalingwa opo tukeundapese tyina tuvasa ovanthu vapopia elaka lielikalela nolietu. Tyinda apeho okamukanda aka, noñgonoka nawa ononthele mbukahimo, nokulipongiya pala okukeundapesa. Opo uvase liwa ononthele, honeka pomalaka elikalela apopiwa motelitoliu yove. Inkha pena omikanda momalaka oo, upondola okuita omikanda vimue pala okuviavela omunthu tyina wamapopi nae konthele yonondaka mbukahi mokamukanda.
4. Oñgeni tupondola okuundapesa movilinga vietu viokuivisa okamukanda Boas novas para pessoas de todas as nações?
4 Inkha uvasa omunthu movilinga viokuivisa upopia elaka ekuavo iya ove kutyii elaka patyi apopia, mulekesa onondaka mbukahi konthyimbi yokamukanda. Mulekesa omapa ikahi pefo liotete, liyulika iya olekesa otyilongo tyove, iya olekesa okuti nove uhanda okunoñgonoka otyilongo tyae, nelaka apopia. Tyina wamanoñgonoka elaka liae, tala ponthele ilekesa omalaka aeho, ovola eefo apaka pekahi elaka liomunthu oo, omulekesa onondaka mbahonekwa nonthikovei yokuatwa vali mbukahi pombanda, iya omulekesa okuti ove uhanda oe atange onondaka mbukahi pefo olio. Tyina amamane okutanga, muavela otratadu melaka liae, ine umulekesa pana pahonekua okuti nahanda okukuetela omukanda umue melaka liove muene. Pahe omulekesa pana pati “enyina liange,” mbahonekwa nonthikovei yatwa vali iya omupopila enyina liove. Lekesa apa pati “enyina liove,” mbahonekwa nonthikovei yatwa vali iya okevelela ekumbululo. Lipongiya opo ukondoke okukemutalelapo.
5. Oityi tuna okulinga opo tuvatele vana vokulekesa esuko vapopia elaka ekuavo?
5 Landula Onondonga: Linga ononkhono pala okukatalelapo ovanthu valekesa esuko konondaka Mbouhamba, namphila vapopia elaka ekuavo. Tyina tuatala okuti pena umue wesuka na Huku, Nondaka yae Ombimbiliya, tuesukisa okuundapesa o formulariu Queira Visitar (S-43-T) iya atuiavela omuhoneki weuaneno eitumikise ko Filiyale, opo omunthu wokualekesa esuko akataleluepo nomuivisi upopia elaka liae. Iya o Filiyale maitumikisa o formulariu ko grupu yelaka olio. Tyina vameitambula, omunthu una okukatalelwapo liwa. Omuhoneki weuaneno upondola okuavela okopiya imue komukulu wovilinga opo anoñgonoke esuko likahi nokulekeswa no grupu ipopia elaka ekuavo. O formulariu oyo ina vala okuundapeswa tyina omunthu alekesa esuko liotyotyili.
6. Inkha tuvasa omunthu walekesa esuko mahi upopia elaka ekuavo, otyilinga patyi tuna?
6 Mapalambe omuvo umue pala okutuma o formulariu S-43 alo omunthu wokuesuka akatalelwapo nomuivisi upopia elaka liae. Moluotyo, pala okuvatela omunthu wokualekesa esuko, omuivisi watuma o formulariu S-43, upondola okutualako okukemutalelapo alo pehika omuivisi umue upopia elaka liae. Ovikando vimwe, omuivisi upondola okulilongesa nae Ombimbiliya. Mokueenda kuomuvo oo vakevelela omuivisi upopia elaka liae, oñgeni omuivisi apondola okuvasa omikanda melaka liomunthu oo walekesa esuko?
7. Oityi matyitukuatesako okuvasa omikanda omalaka avana tupondola okuvasa movilinga viokuivisa?
7 Omikanda Pala Omalaka Omakuavo: Omawaneno kaapondola okukala nomikanda ominyingi viomalaka omakuavo. Moluotyo, inkha omukulu wovilinga atala okuti ovanthu vomalaka omakuavo vekahi nokulekesa esuko kotyili, oe upondola okuovola okukala nomikanda vimwe mewaneno omalaka oo, opo ovaivisi veviundapese. Inkha petupu omukanda nawike mewaneno, mupondola okuita. Tyipondola okuseta katutu opo omikanda vihike. Mahi, upondola okupola omikanda mo Internete www.watchtower.org. Omo, muna omikanda momalaka omanyingi elikalaila, iya omuivisi ine omunthu wokualekesa esuko upondola okukatalamo. Tyotyili, onthele oyo mo Internete maikukuatesako unene tyina uvatela omunthu walekesa esuko upopia elaka ekuavo.
8. Otyilinga patyi ewaneno lina konthele yokuvatela vana valekesa esuko mahi vapopia elaka ekuavo?
8 Otyilinga Tyewaneno: Ovikando vimwe, tyina ovanthu vapopia elaka ekuavo vekahi nokuliyawisa unene potyilongo tyimwe, hamwe petupu ewaneno popepi lilinga omaliongiyo melaka olio. Moluotyo, mupondola okukonga momaliongiyo enyi ovanthu vapopia elaka ekuavo. Okuliepesa nohole, nokulekesa esuko kovanthu ovo vokualekesa esuko, tyipondola okuveavela ondundo opo veye apeho komaliongiyo. Okupopia elaka ekuavo tyipondola okuvetyilika okuenda komaliongiyo, mahi, meongano lio Nombangi mba Jeova petupu etyi tyityilika omunthu okuenda komaliongiyo mokonda vena ohole yotyotyili novanthu. (Sof. 3:9; João 13:35) Ove upopia nawa elaka ekuavo? Inkha upopia iya wafuapo pala okukavatela ovanthu vapopia elaka olio, tyitolela omuhoneki weuaneno liove opo oe etyipopile o Filiyale. Otyo matyivatela unene tyina o Filiyale yovola omuivisi opo akuateseko omunthu wokualekesa esuko.
9. Onalupi papondola okuonganekwa osikola pala ovaivisi vahanda, iya oñgeni otyo tyina okulingwa?
9 Okulilongesa Elaka Ekuavo: Tyina uvatela vana vokupopia elaka ekuavo, veavela ondundo opo vaye komaliongiyo mewaneno mupopiwa elaka liavo, inkha pena ewaneno popepi. Mahi, inkha tyitavela, ovaivisi vamwe vapondola okutokola okulilongesa elaka ekuavo opo vetyivile okuvatela vana valekesa esuko. Inkha petupu ewaneno popepi, o Filiyale ipondola okuonganeka osikola pala okuvatela ovanthu ovanyingi vapopia elaka ekuavo vekahi nokulekesa esuko. Inkha ongotyo, o Filiyale ipondola okutolela omawaneno ekahi popepi konthele yesuko olio, iya avalingi eiviso liokuti kukahi nokuonganekwa o sikola. Vana vaya mosikola oyo, vesukisa okukala tyafuapo pala okuilukila ko grupu ine kewaneno opo vakavatele ovanthu vapopia elaka olio.
10. Onalupi o grupu yelaka ekuavo ina okuonganekwa, iya oñgeni otyo tyitokolwa?
10 Okuonganeka o Grupu: Pala okuonganeka o grupu pena, (1) okukala ovanthu vatuuka vokualekesa esuko vapopia elaka. (2) Pena okukala ovaivisi vamwe vei nawa elaka ine vokuelilongesa elaka. (3) Omukulu umwe weuaneno wafuapo ine omukuatesiko wovakulu vewaneno opo aendese eliongiyo melaka olio Motyasapalo ine Tyalumingu. (4) Ovakulu vamwe vewaneno vena okukala tyafuapo pala okuvatela o grupu. Tyina ovakulu vewaneno vamafuisapo ononthele ombo ononkhuana, vahonekele ko Filiyale konthele yo grupu, iya avaiti opo ewaneno livatele o grupu oyo yelaka ekuavo. (Tala omukanda Organizado, pp. 106-107.) Omukulu weuaneno ine omukuatesiko wovakulu vewaneno wendesa o grupu una okuihanwa okuti “omukulu weuaneno wo grupu” ine “omukuatesiko wovakulu veuaneno wo grupu.”
11. Omokonda yatyi elao okuvatela ovanthu vapopia elaka ekuavo motelitoliu yetu?
11 Eliyawiso liovanthu vapopia elaka ekuavo motelitoliu yetu, onthele yakolela yovilinga viokuivisa ouye auho vialingilwe na Jesus Kristu, Ongeleka yetu. Tulingei ovilinga vietu nombili, nokutala oñgeni Jeova atualako okuteketesa ovilongo nokueta kwe vana vakolela. (Ageu 2:7) Ehambu limue enene okuundapa nombili movilinga ovio! Jeova aavele ononkhano onongwa ononkhono mbetu mbokuvatela ovanthu vapopia elaka ekuavo monotelitoliu mbetu, putyina tuhinangela apeho okuti katyasukisile elaka ovanthu vapopia, Huku upondola okuvekulisa!—1 Cor. 3:6-9.