Oñgeni Matulekesa Olupandu Luetu Mokonda Yotyiawa Otyinene Tya Huku
1. Omokonda yatyi tupandulila unene Jeova?
1 Poviawa ‘ovinyingi oviwa’ via Jeova tyavilapo vali ofeto yeyovo yaawa Nomona wae onthyolwa. (Tia. 1:17) Otyo tyaeta ononkhano onongwa, okukutikinyamo eevelo liononkhali mbetu. (Efé. 1:7) Moluotyo, tupandulei apeho. Mokueenda kuomuvo Wehinangelo, tuovolei omuvo pala okusokolola nawa kotyiawa otyo tyakolela.
2. Oñgeni onthue kumwe nombunga yetu tupondola okupameka olupandu kofeto yeyovo?
2 Oñgeni Matuvatela Ombunga Yetu Ikale Vali Nolupandu Kofeto Yeyovo: Putyina ukuatesako ombunga yove okukala nolupandu, monosimano tyina muhenehike mu 30 ya Tyitalale onthiki Yehinangelo, omokonda yatyi kuovolela omuwo mokueenda Kuelilongeso liove Nombunga pala okupitulula ononthele mbupopia ofeto yeyovo? Tupu, kumwe nombunga landulei o programa yokutanga Ombimbiliya pala Ehinangelo. Soka oñgeni ofeto yeyovo yekuetela ouwa nokukuvatela okutala Jeova, okulitala ove muene, navakuenyi, nokomutue wandyila. Tupu, mopoloko esilivilo okulilongesa okuimba oviimbo 8 no 109 ovipe, mavikaimbwa monthiki Yehinangelo.—Sal. 77:12.
3. Oñgeni tupondola okulekesa olupandu luetu?
3 Okulekesa Olupandu: Okupandula ofeto yeyovo, tyituhindila okutolela vakuetu konthele ya Jeova, nohole yae onene yetyi atuma Omona wae. (Sal. 145:2-7) Mokueenda kua Tyitalale, Kupupu na Kapepo, onombunga mbumwe mbulekesa olupandu luavo mokulinga epongiyo opo umwe mombunga aundape ngomukokoli-ndyila wapola pokati. Inkha otyo katyitavela, okuti upondola ‘okulanda omuvo’ opo uundape vali unene movilinga viokuivisa? (Efé. 5:16) Tupu, olupandu malutuhindila okukuatesako vakuetu opo veye nonthue Kehinangelo. (Rev. 22:17) Himbika okuhoneka pokamukanda ovanthu mokongo opo veye Kehinangelo, vana uhole okutalelapo, ovalongwa vove Vombimbiliya, ombunga, vana uundapa navo, ovomunthele, iya olingi ononkhono opo uvekonge.
4. Omononkhalelo patyi tupondola okuundapesa nounongo omuvo Wehinangelo?
4 Omuvo Wehinangelo utuavela onomphitilo onomphe mbokulekesa ku Jeova okuti tuapandula unene otyiawa tyae aavela ovanthu aveho. Tuundapesei omuvo oo pala okuyawisa nokulekesa ulupandu luetu kofeto yeyovo ‘nomalumono aeho ahaelekwa a Kristu.’—Efé. 3:8.