Okuti Moyeke Omphitilo Ei Ikulambe?
Omuvo Wehinangelo Utukuatesako Okulekesa Olupandu
1. Omphitilo patyi ongwa Ehinangelo lituetela?
1 Mu 14 ya Tyikukutu pomuvo Wehinangelo, ovanthu mavakala nomphitilo yokulekesa olupandu mokankhenda okanene ka Jeova. Lucas 17:11-18 ilekesa oñgeni Jeova na Jesus vatala okupandula. Povanthu ekwi vahakulilwe otyilundu, wike vala weile okupandula. Komutwe, otyilikutila tyeyovo matyieta ehaku liomauvela aeho nokukuatesako ovanthu opo vakamone omuenyo wahapu! Tyotyili matukapandula Jeova ononthiki ambuho mokonda yoviwa ovio. Mahi oñgeni tupondola okulekesa olupandu mo nosimano ombu mambuya?
2. Oñgeni tupondola okukala nolupandu nofeto yeyovo?
2 Kala Omupanduli: Okulekesa olupandu tyitei komalusoke. Opo tukuatesueko okulekesa olupandu mofeto yeyovo, kualingwa ononthele ononyingi mbakolela pala okutanga Ombimbiliya, ngetyi o apendise B12 Mombimbiliya Tradução do Novo Mundo revisada no calendário no Examine as Escrituras Diariamente. Omokonda yatyi kulilongesila onthele oyo nombunga yove? Okulinga ngotyo, olupandu luetu notyilikutila maluliyawisa. Tupu, otyo matyitukuatesako okukala novituwa oviwa.—2 Cor. 5:14, 15; 1 João 4:11.
3. Omononkhalelo patyi tupondola okulesa olupandu pomuvo wehinangelo?
3 Lekesa Olupandu: Omunthu wolupandu utyilekesa. (Col. 3:15) Omunthu una wahakulilwe otyilundu walingile ononkhono opo avase Jesus opo emupandule. Tyotyili, tupu wapopile ehuviso olio nehambu etyi avasa vakuavo. (Luc. 6:45) Okuti matulekesa olupandu mofeto yeyovo, mokuundapa nombili okukonga ovanthu veye Kehinangelo? Okukala omukokoli-ndyila wapola pokati ine okuyawisa ovilinga vietu viokuivisa mokueenda Kuehinangelo, oyo onkhalelo onkhuavo yokulekesa okuti tuapandula. Motyinthiki Tyehinangelo, nomutima weyula olupandu matuyakula ovanthu veya nokukumbulula omapulo avo.
4. Oñgeni Pehinangelo tupondola okuundapa konyima atuhelivele?
4 Okuti eli olio Ehinangelo malihulilila? (1 Cor. 11:26) Katutyii. Mahi tutyii okuti oyo omphitilo yelikalela tuna yokulekesa olupandu. Ove mokuate nawa omphitilo oyo? Onondaka mbetu mbolupandu nokusokolola nomutima auho tyietela ehambu enene Jeova, Wetuavela otyali ofeto yeyovo.—Sal. 19:14.