Omapulo Akumbululwa

◼ Onombangi mba Jeova vapondola okuavela vakuavo omalongomona angalavalwa ine ana ahangalavalelwe?

Omalongomona Ombimbiliya etuavela ondundo nokutupameka. (Atos 15:​32) Moluotyo, tyaviuka okuhanda okupopia konthele yepameko olio navana veheile keliongiyo. Mokonda hono kuna ovipuka ovinyingi ovanthu vaundapesa pala okungalavala, tyapepuka okungalavala elongomona pala okuavela vakuetu. Vamue vapaka nawa omalongomona angalavalwa, okukutikiyamo ana alinguale omanima omanyingi okualamba, iya nomutima omuwa ovo vaundika omalongomona oo ine okuengalavalela omapanga. Vakuavo veepaka mo Internete opo kese umwe uhanda akapolemo.

Tyotyili, inkha tungalavala omalongomona pala onthue muene ine pala ombunga yetu katyapengele. Tupu, ovakulu vewaneno vapondola okungalavala omalongomona pala ovakuatate mewaneno vokuavela nokuhetyivili okuenda komaliongiyo. Mahi, kuna omahunga omawa opo onthue tuhaave omalongomona angalavalwa ine ana ahangalavalelwe.

Mokonda omalongomona alingwa okutala kuetyi tyesukisa mewaneno, tupondola okusoka monkhalelo yahaviukile konthele yomalongomona angalavalwa, mokonda katuanoñgonokele nawa omokonda yatyi elongomona olio lialingilwa. Tupu, kamatutyivili okutala olie waava elongomona iya onalupi etyilinga, mahi tupondola okukala nonthumbi yokuti onondaka tuatolelwa ombotyili nokuaviuka. (Luc. 1:​1-4) Tyotyili, okuavela vakuetu omalongomona angalavalwa ine ana ahangalavalelwe tyipondola okulingisa omunthu okutavela ine okuavela enkhimano.​—⁠1 Cor. 3:​5-7.

Omupika wekolelo nokualunguka ukahi nokuundapa unene opo etuavele “kese nthiki” okulia kuopaspilitu. (Luc. 12:​42) Otyo tyakutikinya omalongomona alingwa momawaneno Onombangi mba Jeova, novipuka ovikuavo viangalavalwa tupondola okupola mo saite yeongano jw.org. Onthue tupondola okukala nonthumbi yokuti omupika wekolelo nokualunguka no Nonkhalamutue mbo Nombangi mba Jeova mavetuavela etyi tuesukisa opo tukale nekolelo liapama.​—⁠Atos 16:​4, 5.