Liepesa Ovaenda

Monthiki 23 ya Tyitalale, ovanthu valamba po nomiliau 12 maveya Pehinangelo Liononkhia mba Tatekulu. Ovanthu ovo aveho mavakanoñgonoka ovipuka ovinyingi, tyina vamatehelela elongomona malipopi konthele yotyilikutila tyeyovo, tuapewa na Jeova, tupu mavanoñgonoka ovipuka oviwa ovanthu aveho mavakapewa! (Isa. 11:6-9; 35:5, 6; 65:21-23; João 3:16) Namphila maveya okutehelela elongomona, mahi omulongomoni hae vala aike maave oumbangi pomuvo oo wakolela. Onthue atuho tupondola okuava oumbangi, mokuliepesa nawa ovaenda. (Rom. 15:7) Tala etyi upondola okullinga:

• Uhapumphame vala okevela eliongiyo lihimbike, liepesa nawa ovaenda, na vana vayekapo okuivisa veya kehinangelo

• Namphila wesukisa okukevela vana ove muene wakonga, mahi tupu liepesa vana muakongele etyi mualinga okambanya. Muita upumphame nae mphangwa-ike na mutale amuho Mombimbiliya yove, amuimbila kumwe momukanda wove woviimbo

• Tyina elongomona liamapu, kala tyafuapo pala okukumbulula omapulo hamwe vapondola okulinga. Ankho katyitavela mokonda hamwe pena ewaneno ekuavo maliya, mupondola okulilaa amulivasi onthiki onkhuavo, mahi, wahakale ononthiki ononyingi otyo wahaende-ko. Ankho utupu ombalulo yotelefone yae, upondola okumupopila okuti: “Nahanda okutehela etyi ove usoka konthele yetyi weiva meliongiyo. Oñgeni tupondola okulivasa?”