Ovipuka Vitatu Maviyawisa Ounongo Wove Wokulongesa
1. Omokonda yatyi tuesukisila, okuyawisa ounongo wetu wokulongesa?
1 Ovakristau aveho vaivisa ovalongesi. Tyilinge tupopia nomunthu otyikando tyotete, ine tutalelapo vana vesuka, ine tulongesa omunthu Ombimbiliya, atyiho otyo okulongesa. Onondaka tulongesa mbakolela unene. Tukahi nokuava otyimimi tyo ‘vihonekwa vikola,’ vipondola okukalesa ovanthu “nonondunge pala eyovo.” (2 Tim. 3:15) Olio elao lihuvisa ngatyi! Pahe tala ovipuka vitatu maviyawisa ounongo wove wokulongesa.
2. Oñgeni matulongesa monkhalelo yapepuka?
2 Okulongesa Monkhalelo Yapepuka: Tyina twii nawa otyipuka, pamwe tulimbuako okuti ku una uhetyii tyipuiya unene. Moluotyo, tyina ulongesa omunthu Ombimbiliya, uhapopie ovipuka ovinyingi vihesukisile mavimunguanguanesa vala. Anthi, toneka okupopia vala ononthele mbavilapo vali. Okulongesa nawa, katyisukisa okupopia unene. (Prov. 10:19) Haunene otyiwa, okutanga onotestu mbavilapo. Tyina watanga otestu, popia vala onthele yelikuata netyi mukahi nokulilongesa. Melongomona lio Komphunda livahiwa mu Mateusi Kapitulu 5 alo 7, muna otyili tyaya kohi unene, mahi Jesus walongesile no nondaka mbuhehi monkhalelo yapepuka.
3. Onongeleka mbuna esilivilo patyi? Ovikando ovinyingi onongeleka patyi onongwa tupondola okulinga?
3 Onongeleka: Onongeleka, mbulunda omunthu okusoka, mbuhika komutima, nokumukuatesako okuhinangela. Uhasoke okuti una okukala omuhipululi omunongo, opo upopia onongeleka onongwa. Ovikando ovinyingi Jesus wapopile onongeleka ononthyupi, mbuhepuiya okunoñgonoka. (Mat. 7:3-5; 18:2-4) Okunthinda omalutalatu ehepuiya popapelo, tupu apondola okukuatesako unene. Okupongiya matyikukuatesako okuvasa onongeleka onongwa.
4. Oñgeni matulingi omapulo akuatesako?
4 Omapulo: Omapulo akuatesako omulongwa okusoka. Ngotyo, tyina walinga epulo pwa elundo. Inkha ukumbulula epulo ove muene, kumapungu oityi omulongwa anoñgonoka. Inkha aava ekumbululo liapenga, otyiwa okulinga omapulo omakuavo, maemukuatesako okuava ekumbululo liaviuka tyipona ove muene okukumbulula. (Mat. 17:24-27) Tyotyili, petupu omulongesi wafuapo nawa puonthue. Moluotyo, Ombimbiliya ituavela ondundo opo tutualeko okutala nawa onkhalelo yetu yokulongesa. Okulinga ngotyo, matyietela ouwa uhapu onthue na vana vetutehelela.—1 Tim. 4:16.