Longesa Monkhalelo Yapepuka
1. Otyipuka patyi tyakolela opo tulongese nawa?
1 Okulongesa monkhalelo yapepuka tyakolela unene pala okukuatesako ovanthu. Okutala nawa onkhalelo Yomulongesi Omunene, Jesus, tyipondola okutukuatesako okuyawisa “kounongo wetu wokulongesa.”—2 Tim. 4:2; João 13:13.
2. Okulongesa monkhalelo yapepuka tyakutikinya tyi? Iya oñgeni otyo, tyipondola okuvatela ovanthu?
2 Longesa Monkhalelo Yapepuka: Elongomona lio Komphunda lina onondonga mbumue mbakolela vali konondonga ambuho mbapopiwa novanthu. Ambuho mbapopiwa monkhalelo yapepuka. (Mat. Cap. 5-7) Ovanthu ovanyingi ankho vatehelela Jesus, “vakala tyahuva nonkhalelo yae yokulongesa.” Omasualali atuminwe okukemukuata, akalele tyahuva no nondaka mba Jesus a apopi okuti: “Katunemone omunthu upopia nga una.” (Mat. 7:28, 29; João 7:46) Opo ovanthu vetavele etyi tupopia katuesukisile okupopia onondaka mbatena, ine onongeleka mbokuepuiya. Opo tuhangunune nawa otyili tuesukisa okupopia onondaka mbuiwe.
3. Omokonda yatyi vamue vena eyembelo liokupopia unene na vana vevetehelela? Iya oñgeni tupondola okulityilika okulinga ngotyo?
3 Uhapopie Ovipuka Ovinyingi Momuvo Wike Vala: Jesus etyi ankho alongesa ovanthu kapopi ovipuka ovinyingi momuwo wike vala, ankho utala alopi ovateheleli vapondola okunoñgonoka. (João 16:12) Nonthue tuna okukala tyafuapo pala okulongesa ovanthu okutala kuetyi vesukisa, haunene tyina tuava oumbangi ko nombunga, novanthu ovape vokuesuka notyili, ine ovana. Onthue katupondola okuvelongesa ovipuka ovinyingi momuvo wike vala namphila vekahi nokututehelela. Aveho vena omutima waviuka mavatualako okunoñgonoka Huku yotyotyili Jeova.—João 17:3; 1 Cor. 3:6.
4. Omokonda yatyi tyina esilivilo okupopia ononthele mbakolela vali tyipona okupopia ovipuka ovinyingi?
4 Popia Ononthele Mbakolela Vali: Jesus kapopile ovipuka ovinyingi pala okunguanguanesa ovanthu netyi alongesa. Etyi apopia okuti: “Aveho vekahi momalangalo . . . mavatundumo,” kapopile vali ovalie mavatutiliswa mokonda omuvo pala okupopia ovipuka ovio ankho nkhele kaunehikepo. (João 5:28, 29) Tyina tulongesa ovanthu Ombimbiliya, tuesukisa okupopia ononthele mbakolela vali iya atuhapopi ovipuka vihesukisile vihekahi momukanda tukahi nokulilongesa.
5. Ouwa patyi tupondola okukala nao, inkha tulongesa monkhalelo yapepuka?
5 Tupandula Jeova moluetyi etulongesa monkhalelo yapepuka ovipuka aviho tuesukisa okunoñgonoka! (Mat. 11:25) Tuhetekelei Jeova okulongesa monkhalelo yapepuka, nokukala nehambu liokuundapa vali nombili movilinga viokuivisa.