Testemunhas de Jeová—Fé em Ação, Parte 1: Da Escuridão para a Luz
Mombimbiliya, otyimimi tyaelekwa notyili, iya enthiki liaelekwa nounkhembi. (Sal. 43:3; Isa. 5:20) Satanasi wanyingiya enthiki mouye puetyi akemba Eva, iya okuhulililako ayandyanesa enthiki enene ouye auho. (Rev. 12:9) Ovideo Testemunhas de Jeová—Fé em Ação, Parte 1: Da Escuridão para a Luz, ilekesa oñgeni otyimimi tyo Ndaka ya Huku tyahimbika okumoneka menthiki. (Isa. 60:1, 2) Tyina wamatale ovideo oyo, upondola okukumbulula omapulo aa?
(1) Oñgeni enthiki enene lieliyandyana konyima yononkhia mbo no apostolu? (2) Tunde menima 1.100, oityi tyakuatesako ovanthu okupunga okuti ongeleya yayapuka motyili? (3) Ovalie ovo Henry Grew na George Storrs? (4) Ovipuka patyi viapilulula unene onkhalelo yomuenyo wa Charles Russell? (5) Oñgeni Omukuatate Russell, na he, na vakuavo, ankho valinga elilongeso liavo Liombimbiliya? Iya avanoñgonoka tyi mo Vihonekwa? (6) Oñgeni ovalilongesi ovo Vombimbiliya veliwaneka notyikundyi tyovanthu va Nelson Barbour? Mahi oityi Omukuatate Russell ayapukilako? (7) Oityi tyaendeleko mu Kakwenye menima 1879, tyaeta onthyimbi yomuvo omupe wotyimimi tyo Ndaka ya Huku? (8) Konyima yotyo, oityi Ovalilongesi Vombimbiliya ankho veliyawisa valinga, opo vayandyanese onondaka onongwa? (9) Omanima omanyingi, Ovalilongesi Vombimbiliya ankho vakevelela okuti mo 1914 makueende tyi? (10) Ovitateka patyi viatumbukilile Ovalilongesi Vombimbiliya, etyi Omukuatate Russell anyima? (11) Oityi Ovalilongesi Vombimbiliya valinga etyi Omukuatate Rutherford navakuavo vayovoka mokaleya? (12) Oñgeni ovideo oyo, yekukuatesako okupandula eongano lia Jeova nokuyawisa enoñgonoko liove? (13) Oñgeni ovideo oyo yapameka etokolo liove liokutualako okuivisa nombili, namphila kumoneka ovitateka? (14) Oñgeni matuundapesa ovideo oyo, opo tukuateseko onombunga mbetu, novalongwa Vombimbiliya, na vakuavo vali?
Ovalilongesi ovo Vombimbiliya votete, vetusila epingo liakolela ngatyi liopaspilitu! Mouye wokuli menthiki liopaspilitu, Ovalilongesi ovo, vakalele nomutima wakola nombili yokuyandyanesa otyimimi. Nonthue tuhetekelei ongeleka yavo, ‘nokutualako okueenda ngovana votyimimi.’—Efé. 5:8.