Okuti Mokala Omukokoli-Ndyila Wapola Pokati?
1. Omokonda yatyi Pehinangelo omuwo omuwa wokuyawisa ovilinga vietu viokuivisa?
1 Pehinangelo lia Tatekulu omuvo omuwa wokuyawisa ovilinga vietu viokuivisa. Oo omuvo wokulekesa olupandu mokonda yohole onene Jeova akala nayo nonthwe etyi aava Omona wae ngotyilikutila. (João 3:16) Olupandu luetu lutunda komutima, lulunda ehando lietu liokupopila vakuetu konthele ya Jeova netyi ekahi nokulingila ovanthu. (Isa. 12:4, 5; Luc. 6:45) Oo tupu omuwo wehambu liokukonga vakuetu opo veye okuliongiya nonthue Pehinangelo lia tatekulu. Konyima, tuna okulinga ononkhono mbokukuatesako vana veile Pehinangelo. Okuti tupondola okuyawisa ovilinga vietu viokuivisa pokuundapa ngovakokoli-ndyila vapola pokati mohanyi ya Tyitalale na Tyikukutu na Kapepo?
2. Omokonda yatyi ohanyi ya Tyitalale yakolela pala okuundapa ngomukokoli-ndyila wapola pokati?
2 Tyitalale Ohanyi Yakolela: Tyitalale maikala ohanyi ongwa yokukala omukokoli-ndyila wapola pokati, mokonda tupondola okuholovona okuundapa ono ola 30 ine 50. Inkha mohanyi ya Tyitalale ewaneno lienyi litalelwapo nomutalelipo womauaneno, ovakokoli-ndyila wapola pokati, vapondola okukala peliongiyo aliho malingi novakokoli-ndyila. Otyilinga tyokukonga ovanthu opo veye kehinangelo matyihimbika monthiki 1 ya Tyitalale atyitualako alo motyinthiki yehinangelo, Muvali 26 ya Tyitalale yo 2013. Tupu, Tyitalale ina onosimano ononthano. Ngotyo, oityi uhelifuikila opo ukale nehambu liokuundapa vali mohanyi oyo yakolela vali menima?
3. Oityi tuesukisa okulinga opo tuyawise vali ovilinga vietu viokuivisa?
3 Lifuiika Pehepano: Ou omuwo wokutala nawa nokulinga omapiluluko esukisa pala okuundapa ngomukokoli-ndyila. Okulikuatesako mombunga tyakolela, omokonda yatyi Melilongeso lienyi Liombimbiliya Mombunga, muhapopila oñgeni ombunga ipondola okuyawisa ovilinga viokuivisa. (Pro. 15:22) Inkha ove kumetyivili okukala omukokoli-ndyila wahasoye. Okuti ove upondola okuovola okulinga omapiluluko opo onthiki wenda movilinga viokuivisa uundape vali unene? Okuti upondola okuenda movilinga viokuivisa monthiki imwe mokati kosimano?
4. Ouwa patyi utundilila kokuyawisa ovilinga vietu viokuivisa mohanyi ya Tyitalale na Tyikukutu na Kapepo?
4 Tyina tuyawisa ovilinga vietu viokuivisa mohanyi ya Tyitalale na Tyikukutu na Kapepo, tuyawisa ehambu lietu, nolupandu movilinga via Jeova nokukuatesako vakuetu. (João 4:34; Atos 20:35) Tyesukisa vali, okulinga ononkhono mbokuhaundapela-ndyambi, tyihambukiswa Jeova.—Pro. 27:11.