Soka Pahetyino opo Uyawisa Ovilinga Viove Viokuivisa
1. Oityi tyakolela tupondola okulinga pomuvo Wehinangelo lia Tatekulu, oñgeni matulipongiya?
1 Kese nima pomuvo Wehinangelo lia Tatekulu, tukala no nomphitilo ononyingi ‘mbokuhivilika unene Jeova.’ (Salmo 109:30) Okuti ove moyawisa ovilinga viove viokuivisa mokueenda kuohanyi ya Tyitalale, okulekesa okuti wapandula Huku Waava ofeto yeyovo? Pahe ou omuvo wokuhimbika okusoka etyi molingi.—Pro. 21:5.
2. Oñgeni ove na vakuenyi muakumbulula epongiyo liomuvo wovakokoli-ndyila vapola pokati watepululua mohanyi ya Tyikukutu yokualamba?
2 Oukokoli-ndyila wapola pokati: Enima liokualamba omawaneno ahambukilwe unene, etyi veiva okuti vapondola okukala ovakokoli-ndyila vapola pokati, avaave onoola mbatepululwa mohanyi ya Tyikukutu. Omukuatate umwe ahoneka okuti: “Ame nkhele ndyikahi mosikola yapola pokati iya hinekale omukokoli-ndyila. Ame mandyiholovona onoola 30, mahi andyilikuatesila opo ndyituukise onoola 50 mohanyi ya Tyikukutu.” Omphange umwe uundapa omuvo auho kukaputu wahoneka okuti: “Onoola omakwii etatu, ndyimbuvila unene!” Etyi ewaneno liapopilwa eonganeko olio, omukuatate umwe wokuali omukokoli-ndyila, pahe una omanima 80, wati: “Ou ankho oo omuvo ndyikevelela! Jeova utyii okuti oukokoli-ndyila ankho omuvo omuwa momuenyo wange!” Ovakuavo vehevilile okukala ovakokoli-ndyila vapola pokati, avayawisa vali kovilinga viavo viokuivisa.
3. Omahunga patyi tuna okukala ovakokoli-ndyila vapola pokati mu Tyitalale na Tyikukutu na Kapepo?
3 Tyitalale maikala ohanyi ongwa yokukala omukokoli-ndyila wapola pokati, mokonda tupondola okuholovona okuundapa onoola 30 ine 50. Tupu, okuhimbikila mo Tyasapalo 17 ya Tyitalale, matulingi otyilinga tyokukonga vakuetu opo veliongiye nonthue Pehinangelo lia Tatekulu, monthiki 5 ya Tyikukutu. Ovanyingi mavayawisa unene ovilinga viavo viokuivisa, atyivelundu okukala ovakokoli-ndyila vapola pokati mu Tyikukutu na Kapepo, opo vaave onoola 50.
4. Oñgeni matuyawisa ovilinga vietu viokuivisa, iya tyieta ouwa patyi?
4 Melilongeso lienyi Liombimbiliya Mombunga, oityi muhapopila oñgeni kese umwe mombunga apondola okuyawisa ovilinga viae viokuivisa, mokueenda kuomuvo Wehinangelo lia Tatekulu? (Pro. 15:22) Itei ku Jeova emukuateseko. (1 João 3:22) Putyina muyawisa ovilinga vienyi viokuivisa, kamuyawisa vala enkhimano lia Jeova, mahi tupu nehambu lienyi liliyawisa.—2 Cor. 9:6.