Linga Omuvo Ou Wehinangelo Ukale Wehambu!
1. Oipi onkhalelo imwe yokuyawisa ehambu lietu pomuvo Wehinangelo lia Tatekulu?
1 Okuti upondola okuyawisa ehambu liove mu Tyitalale na Tyikukutu na Kapepo? Onkhalelo imwe upondola okulinga ngotyo, okuundapa unene movilinga viokuivisa, inkha tyitavela okukala omukokoli-ndyila wapola pokati. Oñgeni matyiyawisa kehambu liove?
2. Oñgeni okuyawisa ovilinga vietu tyitukalesa nehambu enene?
2 Yawisa Ehambu Liove: Jeova wetutunga nounongo wokukala nehambu, nokuhambukilwa okumufenda, nokufuisapo ehando lietu liopaspilitu. (Mat. 5:3) Tupu wetulinga opo tukale nehambu lituka kokuavela vakuetu. (Atos 20:35) Ovilinga viokuivisa vitukuatesako okulinga ovipuka vivali—okufenda Huku nokukuatesako ovanthu. Tyotyili okuundapa unene mononkhalelo ombo tyiyawisa ehambu lietu. Tyina tuivisa unene tukala ovanongo. Tyina tuamakala ovanongo tupu tukala vali nonthumbi, nokupopia tyehena owoma. Tuna onomphitilo ononyingi mbokuava oumbangi nokuhimbika okulongesa ovanthu Ombimbiliya. Okulinga ngotyo tyituetela ehambu enene.
3. Omokonda yatyi Tyitalale na Tyikukutu onohanyi onongwa pala okukala omukokoli-ndyila wapola pokati?
3 Tyitalale na Tyikukutu, onohanyi onongwa pala okuundapa movilinga vioukokoli-ndyila wapola pokati mokonda tupondola okulinga onovola 30 ine 50. Tupu okuhimbikila Motyasapalo, 22 ya Tyitalale alo Motyasikunda onthiki Yehinangelo, matukala nehambu liokukonga ovanthu opo veye Kehinangelo. Omawaneno mahambukwa unene tyina ovaivisi ovanyingi “mavaundapa aveho kumwe” okuivisa unene potyilongo tyavo, pomuvo opo.—Sof. 3:9.
4. Inkha tuhanda okuundapa movilinga vioukokoli-ndyila, oityi tuna okulinga?
4 Lifuiika Pahetyino: Ankho ulitehela kuafuilepo okulinga ngotyo, tala nawa omuvo wove opo utale opi wesukisa okuviukisa opo uyawise ovilinga viove mohanyi ike ine okuyawisako. Otyiwa okulikuambela konthele yotyo. (Tia. 1:5) Tyihipululei nombunga yove navakuenyi mewaneno. (Pro. 15:22) Ove upondola okukala nehambu lituka kovilinga vioukokoli-ndyila wapola pokati, namphila una ovitateka viekongoko ine ovilinga ovinyingi.
5. Okuundapa unene movilinga viokuivisa momuvo Wehinangelo tyieta tyi?
5 Jeova uhanda ovaundapi vae vakale nehambu. (Sal. 32:11) Okuundapa unene movilinga viokuivisa pomuvo Wehinangelo, katyietela vala ehambu onthue, mahi tupu tuhambukiswa Tate yetu keulu.—Pro. 23:24; 27:11.