Tehelela Nokulilongesa
1. Omokonda yatyi tyesukisila okulinga ononkhono mbokutehelela nokulongeswa motyonge tyononthiki ononthatu?
1 Apa katutu otyonge tyononthiki ononthatu tyo 2013 matyihimbika. Kualingwa ovilinga ovinyingi viokupongiya otyonge matyipopi haunene omasuka-suka ovanthu ouye auho. Okuti welipongiya ine welifuiika opo ukalepo ononthiki ambuho ononthatu mbotyonge? Povionge viononthiki ononthatu muna ovipuka ovinyingi vipondola okututalula, mahi tuesukisa okulinga ononkhono opo tukale potyonge nokutehelela nawa. Mokonda movionge ovinene tukala vali omuvo omunyingi tyipona mewaneno, okuhatalukwa tyesukisa unene. Tupu, oungendi tualinga novipuka ovikuavo vipondola okutuponeswa. Oityi matyitukuatesako opo tutualeko tyipahi tyina tutehelela nokulongeswa?—Deu. 31:12.
2. Oñgeni tupondola okupongiya omutima wetu pala otyonge tyononthiki ononthatu?
2 Putyina Otyonge Tyononthiki Ononthatu Tyihenehimbike: O site yetu, www.pr2711.com, muapakwa oprograma yotyonge tyononthiki ononthatu, muna onosapi mbomalongomona aeho mbalandulua notestu ike ine onombali Mombimbiliya. Inkha tuna o Internete, okumbutala tyitukuatesako opo tupongiye omutima wetu pala etyi matyikapopiwa. (Esdras 7:10) Okuti mokueenda Kuefendelo Liombunga, upondola okuovola omuwo wokupopia konthele yotyonge otyo opo mulifuiike?
3. Otyityi matyitukuatesako okutehelela nawa?
3 Mokueenda Kuotyonge: Inkha tyitavela, otyiwa okukatalamenako tyina onthele tyenehimbike. Tupu, otyiwa okuika onotelefone opo mbuhatalule ovanthu ine okulihonekela motelefone navakuenyi mokueenda kuotyonge. Inkha una okukala notelefone yaikuka, otyiwa okuipaka monkhalelo ihayuele. Inkha uundapesa okomputadole ine omakina onkhuavo, linga monkhalelo yahatalula vakuenyi. Lityilika okulia nokunwa mokueenda kuotyonge. (Ecl 3:1) Tala nawa ku una ukahi nokupopia. Tyina otestu itangwa, landula Mombimbiliya yove. Honeka ononthele wesukisa okuhinangela.
4. Oñgeni ovohe vapondola okukuatesako ovana vavo opo vatehelela nokulongeswa?
4 Onthue tupu tuhanda ovana vetu vatehelele nokulongeswa. Provérbios 29:15 yati: “Omona uyekwa vala ukundisa ina.” Tupu, otyiwa ovohe vapumphame kumwe novana vavo, ngotyo mavetyivili okutala inkha ovana vekahi nokutehelela nawa tyipona okutomphola, nokuhonekela vakuavo, ine okuenda-enda. Alo umwe inkha nkhele ovatutu mahi vetyivila okunoñgonoka etyi tyipopiwa, vapondola okulongeswa opo vakale tyipahi nokuahiliya.
5. Omokonda yatyi okupitulula otyonge tyeta ouwa, iya oñgeni tupondola okutyilinga?
5 Konthyulilo ya Kese Nthiki Yotyonge: Uhasete. Langalapo omutenya opo upululukwe nawa. Okupitulula etyi weiva matyikukuatesako opo uhinangele etyi walongesua. Moluotyo, otyiwa okuhipulula nombunga onominutu mbehehi konthele yotyonge kese nthiki. Inkha ove nomapanga ove muenda mombale, omokonda yatyi uhapopila otyipuka tyike ine vivali wapanda vali unene motyonge? Tyina wakondoka keumbo, upondola okuovola omuwo mokueenda Kuefendelo lienyi Liombunga nokupopia oñgeni onwe mupondola okuundapesa onondonga ombo nombunga. Mupondola tupu okuovola omuvo kese simano pala okupitulula ononthele mbumwe nomikanda ovipe muatambula.
6. Okuti tyituuka okuya vala kotyonge tyononthiki ononthatu? Hangununa.
6 Okulia kukalesa vala nekongoko tyina kuliwa nokunthiakinwa nawa. Otyipuka tyike nokulia kuopamphepo makukaawa motyonge tyononthiki ononthatu. Tyipondola okutuetela ouwa tyina tukala ononthiki ambuho, nokutehelela nawa, nokuundapesa etyi tualongeswa.