Ovionge Vietu Viononthiki Ononthatu—Viava Oumbangi Omunene Konthele Yotyili
1. Ovipito ankho vilingwa apeho menima, ankho viavela ova Isilayeli omuvo wokupopia konthele yotyili patyi tyakolela?
1 Ova Isilayeli kohale ankho veliongiya tutatu menima pala ovipito ankho vilingwa apeho. Namphila ankho ovalume vala vena okuenda komaliongiyo oo, ovikando ovinyingi onombunga ambuho ankho valinga oungendi okuenda ko Jelusalei kovionge ovio viehambu. (Deu. 16:15, 16) Ovionge ovio, ankho viava omuvo wokusokolola nawa nokutomphola konthele yotyili. Otyili patyi? Tyimwe o tyokuti Jeova omukuatyali, Nomuavi wokuna oluembia. (Deu. 15:4, 5) Otyikuavo o tyokuti oe wayumbua onthumbi konthele yokuvehongolela nokuveamena. (Deu. 32:9, 10) Tupu, ova Isilayeli ankho vesukisa okusokolola nawa okuti mokonda vatyinda enyina lia Jeova, vena okuendesila omuenyo wavo mouviuki wae. (Deu. 7:6, 11) Hono, ovionge vietu viononthiki ononthatu, vituetela ouwa ngoo.
2. Oñgeni otyonge matyikahangununa nawa otyili?
2 Otyonge Tyihangununa Nawa Otyili: Movionge vietu viononthiki ononthatu, mulingwa omalongomona, no nondalama, nomalekeso, nomapulo etukuatesako okunoñgonoka nawa otyili tyo Mbimbiliya nokuendelamo. (João 17:17) Ovilinga ovinyingi viotyonge matyiya, vikahiale nokulingwa. Eongano lia Jeova likahi nokupongiya otyonge matyipopi haunene omasuka-suka ovanthu ouye auho. (Mat. 24:45-47) Okuti ove uhanda okukatala nokutehelela etyi matyikapopiwa?
3. Oityi tuna okulinga opo tupole esilivilo kotyonge?
3 Tyotyili, matupoloko vali unene esilivilo inkha tukalapo iya atutehelela nawa ononthiki ambuho ononthatu. Inkha nkhele kunepopie no muhona wove, popia nae liwa opo ekuyeke pomuvo oo. Uhalangalepo lietaka kese tyinthiki, opo utyivile okukala tyipahi mokueenda kuotyonge. Ovanyingi vaimbuka okuti okutala komulongomoni nokuhoneka ononthele mbehehi vesukisa, tyivekuatesako okutualako okutehelela nawa. Uhayeke otelefone yove ikutalule ine okunguanguanesa vakuenyi. Lityilika okutomphola, nokutotoveka, nokuhonekela vakuenyi, nokulia, ine okunwa mokueenda kuotyonge.
4. Oñgeni ovohe mavakuatesako ovana vavo okutehelela nawa mokueenda kuotyonge?
4 Movi Tyasapalo viomanima, tyina onombunga mbo va Isilayeli ankho veliongiya opo vatehelele etyi Ovitumino vitangwa mokueenda Kuotyipito Tyovikaka, ankho “novana” vavo vena vo, “opo vatehelele avalongoka.” (Deu. 31:12) Tyipameka ngatyi okutala onombunga vepumphi pamwe mokueenda kuotyonge, novana vavo vepahi vatehelela nawa! Oityi muhatalela etyi muahoneka iya amutomphola haunene konthele yononthele muapanda vali mbotyonge? ‘Momutima womona muna owova,’ moluotyo, ovohe vesukisa okuyunga nawa ovana vavo ovatutu, no vokuekula, pomuvo wokuomba nou mavakala mo hotele, ‘aveheveyeke vala.’—Pro. 22:15; 29:15.
5. Oñgeni ovituwa vietu oviwa putyina tukahi mo hotele vifiwisa otyili?
5 Ovituwa Vietu Oviwa Vifiwisa Otyili: Ovituwa vietu oviwa putyina tukahi mepundaumbo liotyonge, vifiwisa otyili. (Tito 2:10) Ovaundapi vo Hotele vetyimona tyina ovaenda vehikilamo vetavela ovitumino viavo, na tyina valekesa oumphua-lundo nokupopia nawa novaundapi. (Col. 4:6) Etyi ofiliyale imwe yapopia no hotele enima liokualamba onkhalamutwe yamo wati: “Tyina ovanthu venyi veya mo hotele yetu tutyihole, mokonda vekahi nawa. Vena ovituwa oviwa neholelo, vahumba ovaundapi vetu novityuma vietu.”
6. Oñgeni matufiwisa otyili tyina tukahi mepundaumbo liotyonge?
6 Tyina tuvala ovikalatau vietu viotyonge, katyilondola vala ovanthu konthele yotyonge, nokuimbukwa navakuetu, mahi tupu tyiava oumbangi ku vana vetutala. Ovanthu mepundaumbo liotyonge, mavamono okuti vana vavala ovikalatau viotyonge, vefiwa nokuavala nawa, kavavale omapita ngovanthu vouye. (1 Tim. 2:9, 10) Moluotyo, tuesukisa okutala nawa onkhalelo yetu yokuvala nokulifiwisa, tyina tukahi mepundaumbo liotyonge, na tyina tuovola o hotele. Okuvala ovikutu ovisupi novikamisola katyilekesa onthilo. Namphila ovionge vimwe vilingilwa poluhandya, tuesukisa okuvala ovikutu vikahi nawa. Inkha tuhanda okuvala ovikutu ovikuavo konthyulilo ya kese nthiki yoprograma, opo tuende kombale, tuesukisa okuhinangela okuti nkhele otyonge katyinepwe. Moluotyo tuesukisa okuvala monkhalelo ikahi nawa.
7. Oityi tuna okulinga opo tupole ouwa kewaneko lietu Lioukristau potyonge?
7 Povipito viavo, ova Isilayeli ankho velipameka novafendeli vakuavo, ankho vatunda kononthele ononkhuavo mbo tyilongo no mbouye, iya otyo ankho tyivewaneka. (Atos 2:1, 5) Mokueenda kuovionge, ewaneko lietu novakuatate vetu Ovakristau ouye auho, limoneka nawa. Otyituwa otyo otyiwa tyomphangu yetu yombembwa yopaspilitu, tyihuvisa ovanthu vetutala. (Sal. 133:1) Otyiwa okutyinda okulia kuetu opo tulile pomphangu yotyonge, tyipona okukalanda okulia. Mokonda ngotyo tukala nomuvo wokulivasa nokutomphola novakuatate no nomphange!
8. Omahunga patyi tuna okuliava movilinga viotyonge, inkha tyitavela?
8 Vana vetutala apeho vahuva nonkhalelo ovionge vietu viaonganekwa nawa, haunene tyina vanoñgonoka okuti ovilinga aviho vialingwa novanthu veliava. Okuti uhanda okuliava opo uundape motyonge? (Sal. 110:3) Ovikando ovinyingi onombunga veliava aveho pala okuundapa, opo valongese ovana vavo okukuatesako vakuavo. Inkha ove una ohonyi, okuundapa motyonge, onkhalelo ongwa yokulinga oupanga na vakuenyi. Omphange umwe wati: “Ame ankho hiimo ovanthu ovanyingi, ankho ndyiimo vala ombunga yange nomapanga ehehi. Mahi etyi nakuatesako okusukukisa omphangu yotyonge, andyilingi oupanga novakuatate no nomphange ovanyingi. Andyihambukwa unene!” Tyina tukala potyonge tuyawisa komapanga etu, iya otyo tyituetela ehambu enene. (2 Cor. 6:12, 13) Inkha ove kuneliave movilinga ovio, pula kovakulu vewaneno oityi wesukisa okulinga opo uundapemo.
9. Oñgeni matukongo vakuetu opo veye kotyonge?
9 Konga Vakuenyi opo Veye Okutehelela Otyili:, Tyina kuakamba onosimano ononthatu pala okuhimbika otyonge tyetu, matulingi ovilinga viokukonga vakuetu opo veye kotyonge, ngetyi tuhole okulinga omanima okualamba. Omawaneno esukisa okuundapa motelitoliu yavo aiho, nokamukanda kokukonga ovanthu. (Tala okakasa kati “Oñgeni Matuave Okamukanda Kokukonga Ovanthu?”) Oumukanda mauhupupo tuesukisa okutyinda kotyonge. Opo tukewavele ovanthu putyina tukahi mepundaumbo liotyonge.
10. Popia onongeleka mbulekesa okuti ovilinga vietu viokukonga ovanthu kese enima vihole okuava ovinyango.
10 Okuti ovanthu vetavela tyina tuvekonga kese enima? Motyonge tyimwe, omunthu umwe wakuatesako ovalinepi vamwe okuvasa apa mavapumphama. Avemupopila okuti etyi vatambula okamukanda oko “avasoko okuti otyonge etyi tyafuile tyakolela.” Ovalinepi ovo vaenda onokilometulu 320 opo veye kotyonge! Tupu, omphange umwe waile umbo na umbo, aave okamukanda kokukonga omulume umwe wakala nolumbwe luotyonge. Moluotyo, omphange atomphola nae onominutu mbumwe konthele yotyonge. Mononthiki mbehehi puetyi ekahi motyonge, omphange oo wamona omulume una nepanga liae vekahi motyonge, vatyinda omukanda omupe waawa motyonge!
11. Okukala povionge vietu viononthiki ononthatu kese nima tyakolela mokonda yatyi?
11 Ovipito ankho vilingwa no va Isilayeli, ankho o Jeova uvetuma opo evekuatesako ‘okumuumbila nouviuki notyili.’ (Jos. 24:14) Tupu, okuenda kotyonge tyetu tyononthiki ononthatu kese nima, tyitukuatesako ‘okutualako okueenda motyili,’ tupu onthele yakolela yefendelo lietu. (3 João 3) Jeova uyamba vana vehole otyili nokulinga ononkhono opo veye kotyonge, nokupolako esilivilo enene!
[Onondaka Mbavilapo pefo 4]
Ovituwa vietu oviwa tyina tukahi mepundaumbo liotyonge, vifiwisa otyili
[Onondaka Mbavilapo pefo 5]
Tyina kuakamba onosimano ononthatu pala okuhimbika otyonge tyetu, matulingi ovilinga viokukonga vakuetu opo veye kotyonge
[Okakasa omafo 3-6]
Omahinageleso Otyonge Tyononthiki Ononthatu Tyo 2012
◼ Oola Otyonge Matyihimbika: Otyonge matyihimbika 8h20 ononthiki ambuho ononthatu. Omapito maaikulwa 6h00. Tyina otyiimbo tyihimbika okuhika, atuho tuesukisa okuenda povipundi vietu, opo otyonge tyihimbike nonthilo, nokuaongana nawa. Mutano, no Tyasapalo otyonge matyimanuhuka 15h55, mo Tyalumingu tyimanuhuka 14h40.
◼ Apa Patalamena Omatuku-tuku: Onomphangu ambuho mapatalamena omatuku-tuku a vana veya kotyonge kambufetelwa, mahi omatuku-tuku maakala omu ehikila. Omatuku-tuku atyinda ovilema, oo vala mayekwa okukala pomphangu vapakelwa. Mokonda omphangu yokutalamena omatuku-tuku onthutu, ombunga ike ipondola vala okuendela metuku-tuku like inkha vafuamo aveho.
◼ Okupakela Vakuetu Ovipundi: Upondola okupakela vala ovipundi vana ukala navo meumbo ine weenda navo metuku-tuku liove, ine vana ulongesa Ombimbiliya.—1 Cor. 13:5.
◼ Omuvo Wokulia: Mbambavo tyinda okulia kuove, opo uhatunde pomphangu yotyonge okalanda okulia pomuvo wokuomba. Upondola okukutyinda metisela etutu litavela okupaka mombuelo yotyipundi tyove. Ovipuka ovinene, na vina vityatyuka, novikunwa vikoleswa, kavipondola okuetwa pomphangu yotyonge. Mutavelwa vala omapindi onongasosa mbulandeswa potyonge.
◼ Oviawa: Tupondola okulekesa okuti tuapandula otyonge tyetu, mokuava tyihakuluminyua onombongo mewaneno lietu potyonge pala okuvatela ovilinga via Huku mouye auho. Kese umwe uhanda okuava otyiawa mo cheque, wesukisa okuihoneka menyina lio “Associação das Testemunhas de Jeová.” Okuhimbikila enima lino, movionge aviho matutavela oviwa vio vikalatau vio credito nonombongo nono cheque.
◼ Vana Veliveta ine Vatumbukilwa Nouvela Inkha motyonge umwe utumbukilwa nouvela, akapopie nomukuatate umwe wokulekesa ovanthu kovipundi. Omukuatate oo, makapopila liwa Oseketa Yokuvatela vana vavela, opo ovakuatate vafuapo vaundapa moseketa oyo veye okukukuatesako.
◼ Ovihemba: Inkha ukahi nokunwa ovihemba, mbambavo vityinda mokonda motyonge kamamukala ovihemba ovio.
◼ Ononkhaku: Kese enima kuhole okumoneka ovitateka ovinyingi mokonda yononkhaku. Tyaviuka okuvala ononkhaku mbutavela okueenda, tyilinge metapalo, no monosikata, no monondyila ononkhuavo.
◼ Ovimpholo: Otyonge matyilingwa mononthiki 6-8 ya Kakuenye yo 2012 Mondyuo Yovionge ko Viana, matyipitiyua melaka lia vana vahapopi, (Língua de Sinais).
◼ Outuku-tuku Wokutyinda Ovana: Outuku-tuku oo kaupondola okutyindwa pomphangu yotyonge. Mahi tyitavela okutyinda okaula kovana opo vakale ponthele yenyi, opo muveyunge nawa. Elondolo eli o pala vana mavalingila ovionge ponomphangu mbokusana ombola.
◼ Omuniko: Ovionge ovinyingi vihole okulingilwa monondyuo mbaikwa, iya opo mufile omphepo mupakwa ovifilamphepo (ventoinha) ine muna vala oundyanena oututu. Moluotyo, otyiwa okuhawave omilela vinika unene, no noperfume mbupondola okulinga omapita vakuetu.—1 Cor. 10:24.
◼ Ono Formulariu Queira Visitar (S-43): Tuesukisa okuundapesa o formulariu oyo pala okupopia konthele ya kese munthu tuaavela oumbangi iya alekesa esuko, mokueenda kuotyonge. Ovaivisi vesukisa okutyinda o formulariu ike ine onombali tyina vaya kotyonge. Tyina wamahoneka o formulariu oyo, upondola okukeavela vo Seketa Yomikanda, ine omuhoneki weuaneno lienyi tyina wamatundu kotyonge.—Tala Movilinga Vietu Viouhamba via Kapepo yo 2011, pefo 3.
◼ Okuliava Movilinga Viotyonge: Kese umwe uhanda okuvatela motyonge aye Koseketa yo Vokueliava Movilinga viotyonge. Ovana nkhele vehena omanima 16 navo vapondola okuvatela movilinga ovio, mahi vesukisa okuundapa no vohe ine omukulu omukuavo uveyunga.
[Okakasa pefo 6]
Oñgeni Matuave Okamukanda Kokukonga Ovanthu?
Opo tuundape otelitoliu yetu aiho, tyesukisa okuhapopi unene. Tupondola okupopia vala ngetyi: “Okamene. Tukahi movilinga vikahi nokulingwa ouye auho, pala okuava okamukanda aka. Kove okaka. Movasimo ononthele ononyingi.” Popia noundyandyi. Tyina tuundapa movilinga ovio mo Tyasapalo, no Tyalumingu tupu tupondola okuava Omutala Womulavi no Despertai! tyina tyitavela.