Kwenye Kunene Maikala Ohanyi Yovilinga Tuhalimbwa!
Otratadu Omphe Maiyawa Mouye Auho
1. Otyipito patyi tyomanima 100 Ouhamba, matyilingwa ouye auho?
1 Tyina Ouhamba wa Huku watuukisa omanima 100, otyiwa tulinge otyipito tyokuhilivika Jeova notyilinga tyokuava otratadu omphe ouye auho! Mu Kwenye Kunene matukala notyilinga tyokuava otratadu omphe ouye auho ina osapi yati: “Opi Tupondola Okuvasa Omakumbululo Omapulo Omanene Omuenyo?” Otratadu oyo omphe maulundu ovantangi okuovola omakumbululo Ombimbiliya nokuhangununa oñgeni o jw.org maivekuatesako.
2. Oñgeni matulipake “mondaka yokuhilivika Jeova” maiivaleswa mu Kwenye Kunene?
2 Ondaka Yehiviliko: Pala okukuatesako ovaivisi okuyawisa ovilinga viavo viokuivisa, kualingwa otyiawa tyimwe otyiwa matyiavela omphitilo kese umwe yokukala omukokoli-ndyila wapola pokati mu Kwenye Kunene. Mohanyi oyo, ovaivisi mavetavelua okukala ovakokoli-ndyila vo noola 30. Kwenye Kunene ina o Otano ononthano, novi Tyasapalo vitano, novi Tyalumingu vitano, ovaivisi ovanyingi vekahi movilinga na vana vekahi mosikola vapondola okukala ovakokoli-ndyila vapola pokati. Inkha una omulongwa Wombimbiliya wii nawa otyili ine omona wove uhanda okukala omuivisi, popia nonkhalamutwe yovakulu vewaneno konthele yotyo. Matyitulundu unene okuliwaneka novaivisi ovape mokueenda kuohanyi oyo! Namphila ovakokoli-ndyila ovanyingi tyina Kwenye Kunene yamapu vapululukuapo tyina vatuula onovola mbavo konthyulilo yenima, vapondola okusoka nawa opo vaundape unene mohanyi oyo yelikalela. Pahe ou omuwo onombunga vesukisa okutomphola oñgeni mavelipake “mondaka yokuhilivika Jeova” maiivaleswa mu Kwenye Kunene.—Esd. 3:11; Pro. 15:22.
3. Oityi tukevela konthele yotyilinga etyi otyinene matukala natyo?
3 Namphila kohale tuhole okukala notyilinga ngotyo, mahi tukevela okuti etyi matyikala otyilinga matuhalimbwa. Oñgeni tupondola okuyawisa ombalulo yo noola, novaivisi novakokoli-ndyila vapola pokati? Tyina tuvitula enima liovilinga lio 2014, Jeova upondola okuyamba ononkhono mbovanthu vae ouye auho mokuava oumbangi omunene mu Kwenye Kunene!—Mat. 24:14.