Hetekela Ongeleka Yovauli—Naum
1. Oityi omukanda wa Naum utulongesa?
1 Ehanyauno lio Ninive yokohale lilekesa nawa etyi Naum aulile, Jeova wakoyesa onondyale Mbae iya otyo tyalekesa okuti onondyale Mbae kavetyivili okukala lutai kolupala Lwae. (Naum 1:2, 6) Okutala nawa eulo lia Naum lituavela onondonga movilinga vietu viokuivisa.
2. Oñgeni tupondola okuivisa monkhalelo ipameka?
2 Utupameka Nokutuavela Ekevelelo: Tyina utala omukanda wa Naum, ngoti wahonekelwa vala okukoyesa ova Ninive, o Asilia yokohale otyilongo tyomalityindailo. (Naum 1:1; 3:7) Mahi, ekoyeso olio liapandelwe unene novanthu va Jeova. Naum, enyina olio lihangununa okuti “okupameka,” wapamekele ova Judeu vakuavo okuti onondyali mbavo apa katutu kamambukakalako vali! Naum walekesile nawa okuti Jeova “ondyakulilo yapama monthiki yononkhumbi.” (Naum 1:7) Tyina tuivisa, tupopia onondaka onongwa nokupameka vakuetu opo vaholame mu Jeova.—Naum 1:15.
3. Oñgeni tupondola okuhetekela nawa Naum waundapesile nawa onongeleka ine ononthengele-popia?
3 Undapesa Onongeleka no Nonthengele-popia: Jeova watuma omuuli Naum okueleka onthyulilo yo Ninive no Egitu epundaumbo lio Tebes (Nô-amon), lina liahanyuninueko no Asiria. (Naum 3:8-10) Tyina tupopia konthele yonthyulilo youye uno, tupondola okupopia omaulo Ombimbiliya alekesa okuti Jeova ufuisapo nawa etyi apopia. Mongeleka, etyi ova Mbambilonia nova Medo valwisa epundaumbo lio Ninive mo 632 P.K.E., kualokele ombila imwe onene aiyulisa Ondongi Tigres, yateyelepo ovimato viepundaumbo olio ankho muhanyingilua. O Ninive aihanyuapo liwa-liwa, ngetyi Jeova aulile.—Naum 1:8; 2:6.
4. Oñgeni tupondola okupopia etyi tyayandyuluka nokuapepuka tyina tuivisa?
4 Popia Etyi Tyayandyuluka Nokuapepuka: Naum wahoneka monkhalelo younkhengela nokuhambukiswa. Etyi apopia tyayandyuluka. (Naum 1:14; 3:1) Tyelifwa notyo, nonthue tuna okupopia onondaka mbapepuka okumbunoñgonoka. (1 Cor. 14:9) Pokuhimbika etompho, popia onondaka mbapepuka mbulekesa etyi weila. Tyina ulilongesa Ombimbiliya novanthu, vekuatesako okupameka ekolelo mu Jeova no Mondaka yae nokulekesa oñgeni vapondola okuendela muetyi valongeswa.—Rom. 10:14.
5. Epameko patyi tuvasa meulo lia Naum?
5 Onthumbi ya Naum monondaka mbahaponyo mba Jeova imoneka nawa momukanda Wombimbiliya una enyina liae. Tyina ouye wa Satanasi ukahi nokuhika konthyulilo, onthue tupamekwa nonondaka mba Huku mbati: “Ononkhumbi kambukeya vali otyivali.”—Naum 1:9.