Okulongesa Nombrochula Onondaka Onongwa
1. Oñgeni ombruchula Onondaka onongwa yalingwa?
1 Ngetyi tualongeswa mohanyi ya Kakwenye Movilinga Vietu Viouhamba, tyimwe poviti vietu viokulongesa, ombruchula Onondaka Onongwa mba Huku! Ombruchula oyo muvahiwa ono testu mbakolela, mahi mbehena onondaka, opo omulongwa embutange Mombimbiliya, etyimono okuti etyi ekahi nokulongeswa omo tyatunda. Namphila omikanda vietu aviho viokulongesa vialingwa ngombruchula oyo, pala okukuatesako ovatangi na vanoñgonoke aveke, mahi ombruchula oyo yalingwa opo omuivisi etyivile okukuatesako omulongwa. Moluotyo, putyina tuyaava, otyiwa tulekese omunthu oñgeni ililongeswa opo akale nehando liokunoñgonoka onondaka onongwa Mombimbiliya.—Mat. 13:44.
2. Oñgeni tupondola okulongesa nombrochula Onondaka onongwa, motyikando tyotete tuelivasa nomunthu?
2 Motyikando Tyotete Muelivasa: Upondola okupopia okuti: “Tuete okuti ovanthu vasukalala unene iya velipula okuti opi ouye ou maukahulila? Ove usoka okuti nthiki imwe ouye maukala nawa? [Yeka omunthu akumbulule.] Mombimbiliya muvahiwa onondaka onongwa mbutuavela ekevelelo. Tala omapulo aa akumbululwa Nombimbiliya.” Muavela ombruchula, omuyeke akoyepo epulo ahanda pomapulo ekahi konyima yombrochula. Tyina amakoyo, omulekesa oñgeni tyililongeswa ombruchula oyo, mokutanga o palagrafu yotete, yepulo akoya. Tupu upondola okumupula omapulo omakuavo ove waholovona, omulekesa oñgeni ombruchula ipondola okumukuatesako okuvasa omakumbululo Ombimbiliya. Ankho osapi akoya yelikuata no vidiu imwe ikahi mo jw.org, upondola okumulekesayo.
3. Hangununa oñgeni tupondola okulongesa nombrochula Onondaka Onongwa?
3 Oñgeni Molongesa Nayo Ovalongwa: (1) Tanga omapulo anthikoveleswa opo ukuateseko omunthu okunoñgonoka nawa. (2) Tanga ono palagrafu mbalandulako. (3) Tanga ono testu mbayendelekwa iya olingi omapulo ekahi nawa opo ukuateseko omunthu okunoñgonoka oñgeni onotestu mbukumbulula omapulo oo. (4) Ankho epulo lina ono palagrafu onombali, linga ngetyi tyapopiwa pombanda, ponthele 2 no 3. Ankho pena ovidiu imwe ikumbulula epulo liae, mulekesayo. (5) Linga omapulo opo utalele kuetyi apopia inkha wetyinoñgonoka nawa.
4. Oityi matyitukuatesako okukala omunongo pokulongesa nombruchula oyo?
4 Noñgonoka nawa otyiti otyo otyiwa. Longesa nombrochula oyo apeho tyina una omphitilo. Apeho putyina mamukelilongesa, tete soka komulongwa wove no ñgeni momukuatesako okusokolola. (Pro. 15:28; Atos 17:2, 3) Putyina wamakala omunongo otyivili okulongesa nayo, mokala nehando liokulongesa ovanthu otyili, nombrochula oyo!