Ombrochula ei Omphe Yalingwa Opo Itukuateseko Okukatalelapo Ovanthu Nokuhimbika Okuvelongesa Ombimbiliya

1. Ombrochula patyi yawa motyonge “Yunga Vali Nawa Omutima Wove!” yalingwa pala okutalelapo ovanthu nokuhimbika okuvelongesa Ombimbiliya?

¹ Motyonge tyokuati “Yunga Vali Nawa Omutima Wove!”, tuatambula ombrochula omphe opo itukuateseko okukatalelapo ovanthu nokuhimbika okuvelongesa Ombimbiliya. Ombrochula Onondaka Onongwa Mba Huku! yapinga pombrochula Oityi Huku Ahanda Kuonthwe nayo ina omalongoso omasupi. Ombrochula ei maitukuatesako okuhimbika okulongesa ovanthu Ombimbiliya tyihasete. Anthi, Ombrochula Oityi Huku Ahanda ankho ipopia ovitumino vio Vakristau, ngotyo vimwe ankho vipuiya omulongwa okuvitavela, mahi Ombrochula omphe ipopia vali unene ovipuka oviwa vikahi Mombimbiliya.​—Atos 15:35.

2. Oityi ombrochula Onondaka Onongwa yalingilwa?

² Oityi yalingilwa? Ovakuatate vetu mouye auho vehole okulipula inkha pena otyipuka tyimwe tyapepuka vali tyipondola okukokela ovanthu motyili, tyina nkhele ehenelilongese omukanda Ombimbiliya Ilongesa, omukanda uundapeswa unene pokulongesa ovanthu Ombimbiliya. Ovanthu vehole omikanda haunene vahambukilwa okulilongesa Ombimbiliya nombrochula oyo. Tupu, ei yapepuka vali okupitiyua momalaka omanyingi.

3. Oñgeni Ombrochula ei yelikalela nomikanda omikuavo?

³ Oñgeni Yaonganekwa: Omikanda vietu tulongesa navio ovanthu, haunene viahonekwa monkhalelo omunthu apondola okutanga aike anoñgonoka otyili. Omukanda ou welikalela. Wahonekwa opo omulongwa alongeswe Ombimbiliya nomuivisi. Mahi, tyina wameyaavela omunthu, mupondola okutanga o palagrafu ike ine onombali nokutomphola konthele yotyo. Onopalagrafu ononthyupi, ngotyo, mbupondola okulilongeswa lutai nomunthu wavasa ine ukahi nokuundapa. Namphila elongeso 1 olio liaviuka pala okuhimbika okulongesa omunthu, mahi tupondola okuhimbika nelongeso ekuavo.

4. Oñgeni ombrochula itukuatesako okulongesa Nombimbiliya?

⁴ Momikanda vietu ominyingi, vialingwa nomapulo akumbululwa mo palagrafu. Mahi, mo mbrochula ei, omakumbululo haunene avasiwa Mombimbiliya. Ovanthu ovanyingi vahanda okulilongesa Ombimbiliya tyipona omikanda vietu. Moluotyo, onotestu mbukahimo haunene onondaka mbatyo kambahonekeluemo. Mbuna okutala Mombimbiliya. Otyo matyikuatesako omulongwa okunoñgonoka okuti etyi ekahi nokulilongesa tyatunda mondaka ya Huku.​—Isa. 54:13.

5. Omokonda yatyi omuivisi esukisila okupongiya nawa apeho tyina akalongesa?

⁵ Ombrochula kaihangununa onotestu ambuho. Omokonda yatyi? Yalingwa opo ilunde omulongwa okulinga omapulo, otyo tyikuatesako omuivisi okukala nounongo wokulongesa. Moluotyo, otyiwa okupongiya nawa kese tyikando ukalongesa. Lunguka: uhapopie unene. Onthwe tuhole okuhangununa Ovihonekwa. Mahi ovikando ovinyingi tukonga omulongwa opo ahangunune oityi asoka konthele yotestu imwe. Mokulinga omapulo nounongo, tukuatesako omulongwa okusokolola nawa kese testu.​—Atos 17:2.

6. Oñgeni tupondola okuundapesa ombrochula: (a) tyina ovanthu vehetavela ku Huku, Nombimbiliya? (b) tyina tukahi movilinga viokuivisa umbo-na-umbo? (c) tyina tuhimbika okulongesa omunthu ombimbiliya? (d) tyina tutalelapo ovanthu?

⁶ Ngetyi tulinga nomikanda omikuavo, ombrochula ei ipondola okuawa kese muvo, namphila ipondola okuholovonwa opo yaawe mohanyi imwe. Ovanyingi matuhambukilwa unene okuundapesa ombrochula ei okuhimbika okulongesa ovanthu Ombimbiliya. Tupu, ngetyi tyapopiwa motyonge, tupondola okulekesa omunthu onosapi mbukahi konyima yombrochula “opo aholovone iya atulingi ononkhono opo tumutalelepo!”​—Tala oukasa pomafo 5-7.

7. Oñgeni tupondola okulongesa omunthu Ombimbiliya nombrochula?

⁷ Oñgeni Matulongesa Ombimbiliya: Tupondola okuhimbika etompho nomapulo onondaka mbanthikoveleswa vali. Konyima amutange o palagrafu no notestu mbayendelekwa. Linga omapulo makuatesako omunthu okunoñgonoka etyi otestu ihangununa. Tyina muhenende kelongeso ekuavo, pula omunthu opo akumbulule omapulo anthikoveleswa, opo ukale nonthumbi yokuti wetyinoñgonoka. Mononthiki mbotete mupondola okuhasete, amulingi vala epulo like pomapulo anthikoveleswa. Mokueenda kuomuwo, tupondola okutomphola vali omuwo omunyingi hamwe okumana elongeso aliho.

8. Oñgeni tupondola okupopia tyina tutanga onotestu , iya omokonda yatyi?

⁸ Ono testu mbalandulwa ondaka “tanga” ombo mbukumbulula epulo liahonekwa nonondaka mbanthikoveleswa vali. Tyina tuita opo omunthu atange otestu tulityilikei okupopia okuti: “Apostolu Paulu wahoneka okuti” ine “Tala etyi Jeremia aula.” Omunthu upondola okusoka okuti tukahi vala nokutanga onondaka mbovanthu. Otyiwa okupopia okuti, “Ondaka ya Huku yati” ine “Tala etyi Ombimbiliya yaula.”

9. Okuti pokulilongesa nomulongwa tupondola okutanga onotestu ambuho?

⁹ Okuti tupondola okutanga onotestu ambuho ine tutanga vala mbuna mbahonekwa okuti “tanga”? Tyitei komunthu ukahi nokulongeswa. Onotestu ambuho mbahonekwa mbesukisa. Kese testu yelikalela nonkhuavo. Mahi mononkhalelo ononyingi tyitalelwa komulongwa, no komuwo wae, nesuko ena ine ounongo wae wokutanga tyipondola okutukuatesako inkha tutanga vala mbuna mbahonekwa okuti “tanga.”

10. Onalupi tupondola okuenda momukanda Ombimbiliya Ilongesa?

¹⁰ Onalupi Mamuhimbika Okulilongesa Omukanda Ombimbiliya Ilongesa: Tyina tuamelilongesa ononthiki ononyingi tupondola pahe okulilongesa nomulongwa omukanda Ombimbiliya Ilongesa ine okutualako okulilongesa ombrochula Onondaka Onongwa alo ipwa. Omuivisi oe una okutala onalupi tyesukisa okulongesa omunthu momukanda omukuavo. Mahi, inkha tuehimbikale okulongesa omunthu nomukanda Ombimbiliya Ilongesa? Petupu etyi tyipondola okulandulwa, otyo tyitei komuivisi. Kese munthu welikalela. Moluotyo, ovalongwa ovanyingi vapolako ouwa tyina vapitulula vali nawa omalongeso amwe momukanda Ombimbiliya Ilongesa.

11. Omokonda yatyi tupondola okuundapesa nawa ombrochula ei omphe?

¹¹ Mouye uno muhena ovipuka oviwa, onthue tuna elao enene liokupopia ovipuka oviwa, konthele Youhamba wa Huku iya apa katutu maukaeta ouye omupe muna mamukakala ouviuki! (Mat. 24:14; 2 Ped. 3:13) Tuna onthumbi yokuti ovanthu ovanyingi mavatehelela onondaka ombu mba Huku mbati: “Onomphai mba una wenda kombanda yo nomphunda no nondaka onongwa, mba una wivisa ombembwa onongwa unene! Mba una watyinda onondaka onongwa mbovipuka oviwa, mbomuivisi weyovo, mba una upopila Siau okuti: ‘Huku yove walinga ohamba!’” (Isa. 52:7) Tupondola okuundapesa ombrochula ei omphe muvahiwa oviwa viatunda ku Huku pala vana vankhia ohunga potyilongo tyetu!

[Okakasa pefo 5]

Tyina Ovanthu Vehetavela ku Huku Nombimbiliya:

● Kovilongo vimwe, ovaivisi vatala okuti ovanthu kavahande okuiva ondaka “Huku” ine “Ombimbiliya”. Moluotyo, monthiki yotete tyina utomphola nomunthu otyiwa okupopia etyi ovanthu potyilongo vehole, okupopia okuti tuesukisa outumini omupe, etyi tyikuatesako onombunga, nondyambi matukapewa komutwe wandyila. Ombrochula Onondaka Onongwa tupondola okuhimbika nayo etompho nomunthu tyina tuatompholale nae ononthiki ononyingi, opo tupopie oñgeni tutyii okuti Huku oko ekahi nomokonda yatyi tyesukisila okuyumba onthumbi Mombimbiliya.

[Okakasa pefo 6]

Tyina Tuivisa Umbo-na-Umbo:

● “Ame neya meumbo liove opo ndyikulekese okuti katyipuiya okunoñgonoka etyi Huku ahandela ovanthu komutwe wandyila. Welipulale inkha Huku makamanako ononkhumbi mbetu? [Yeka omunthu akumbulule.] Ombrochula ei ilekesa opi Mombimbiliya tupondola okuvasa ekumbululo liepulo olio. [Mulekesa ombrochula, amutange elongeso 1, na Jeremias 29:11.] Ngetyi watala, kuove katyaviukile okusoka okuti Huku utuhandela oviwa komutwe? [Yeka omunthu akumbulule.] Inkha uhanda, ame ndyipondola okukuavela omukanda ou. Onthiki onkhuavo amulilongesa o palagrafu yavali muna muvasiwa ekumbululo Liombimbiliya liepulo liati: ‘Oñgeni Huku makayovola ovanthu kononkhumbi?’” (Inkha omunthu una omuvo, mupondola okutanga o palagrafu yavali nono testu ononthatu mbukahipo nokutomphola konthele yotyo. Amulilae onthiki mamuya okulilongesa epulo lia vali melongeso.)

● “Ovanthu ovanyingi vehole okulikuambela, haunene tyina vena ovitateka. Noove uhole okulikuambela? Ove usoka okuti Huku utehelela omalikuambelo aeho? Ine omalikuambelo amwe kaemuhambukiswa? Ame ndyina omukanda muna omakumbululo Ombimbiliya konthele yomapulo oo. [Muavela ombrochula, “amutange” amuho o palagrafu yotete pelongeso 12, no notestu mbukahipo.] Katyihambukiswa okunoñgonoka okuti Huku uhanda okutehelela omalikuambelo etu? Mahi opo etavele omalikuambelo etu, tuesukisa okumunoñgonoka nawa. [Ikula pelongeso 2 omulekesa omapulo anthikoveleswa vali.] Inkha ove uhanda, ame ndyipondola okukusila omukanda ou, iya onthiki onkhuavo tupondola okutanga omakumbululo omawa Ombimbiliya konthele yomapulo oo.”

● “Ame nahanda okupopia noove mokonda ovanthu hono vasukalala unene nopi ouye ukahi nokuenda nako. Ove usoka okuti ouye nthiki imwe maukala nawa? [Yeka omunthu akumbulule]. Ovanthu ovanyingi vahuva tyina vamanoñgonoka okuti Mombimbiliya muna ovipuka oviwa vituetela ekevelelo. Tala omapulo amwe Ombimbiliya yakumbulula.” Muavela ombrochula, omuiti aholovone epulo esuka vali nalio pefo lio konyima. Amuende pelongeso aholovona, omulekesa oñgeni lililongeswa. Amulilae onthiki mamuya okulilongesa epulo lialandulako melongeso.

[Okakasa pefo 7]

Hetekela Onkhalelo Yapepuka Yokuhimbika Etompho:

● “Ame nahanda tutomphole katutu konthele yonkhalelo omphe yokulilongesa Ombimbiliya. Ombrochula ei ina omalongeso 15 alekesa opi movasi omakumbululo konthele yomapulo aa Mombimbiliya yove. [Mulekesa omapulo ekahi konyima yombrochula. Ove wahetekelelale okulilongesa Ombimbiliya? Eta ndyikulekese oñgeni okulilongesa Ombimbiliya tyapepuka. [Tangei pelongeso 3, o palagrafu yotete pepulo 3, nokutanga Revelação 21:4, 5. Inkha tyitavela, “tangei” o palagrafu yalandulako no notestu mbukahipo.] Ame nahanda okukusila omukanda ou. Tukuavela ondundo opo ulilongese Ombimbiliya monkhalelo omphe. Mahi inkha kuhande, tupondola okuhulila apa. Monthiki onkhuavo tupondola okulilongesa elongeso liotete. Tala likahi vala pefo like.”

[Okakasa pefo 7]

Himbika Nayo Tyina Ukatalelapo Omunthu:

● Tyina tukatalelapo omunthu wesuka notyili tupondola okuti: “Napandula etyi tuelivasa vali. Ame nekuetela ombrochula ei ikumbulula omapulo omanyingi omawa Ombimbiliya. [Muavela ombrochula, omuiti atale omapulo ekahi konyima.] Olipi pomapulo aa wesuka vali nalio? [Yeka omunthu akumbulule. Konyima amuende pelongeso aholovona.] Eta ndyikulekese oñgeni ombrochula ei ipondola okuundapeswa pala okuvasa omakumbululo Ombimbiliya.” Amulilongesa o palagrafu ike ine onombali nokutanga onotestu yatiwa “tanga.” Ngotyo wahimbika okulongesa omunthu Ombimbiliya! Muavela ombrochula amulilae onthiki moya okumutalelapo. Tyina muamamane elongeso, mupondola okuyapukila pelongeso ekuavo omunthu aholovona ine okuhimbikila kelongeso liotete liombrochula.