Oñgeni Tupondola Okulekesa Okuti Tuhole Vakuetu?

Onthue atuho tumbunga, mokonda atuho tuatuka ku Andau, omunthu wo tete Huku atungile. Mokonda tumbunga, ñgeno ankho tulilinga-vo nawa. Mahi okuti otyo umwe tumona hono? Au. Otyo hatyoko Huku ankho ahandela ovanthu.

OITYI OMBIMBILIYA IPOPIA KONTHELE YOLUEMBIA

“Una okuhumba vakuenyi ngetyi ulihole ove muene.” — LEVÍTICO 19:18.

‘Tualeiko okukala noluembia nonondyale mbenyi.’ — MATEUSI 5:44.

OÑGENI TULEKESA OKUTI TUHOLE VAKUETU?

Momukanda 1 Ova Kolindu 13:4-7, Huku wapopia oñgeni omunthu wokuhole vakuavo ekahi.

Omunthu uhole vakuavo “wapua elundo, una onkhenda.”

Nkhele soka: Oñgeni ukala tyina vakuenyi vapwa elundo no ove, avekulingi nawa naapa wapengesa?

Omunthu uhole vakuavo “utupu onkhi.”

Nkhele soka: Oñgeni ukala tyina vakuenyi vehekuyumbu onthumbi? Utyihole tyina vakuenyi vekulwa onkhi?

Omunthu uhole vakuavo “kaovola vala ouwa wae.”

Nkhele soka: Oñgeni ukala tyina vakuenyi vetavela etyi upopia, avahasoko okuti etyi vapopia otyo vala tyaviuka?

Omunthu uhole vakuavo “kesuku nokulingwa omapita.”

Nkhele soka: Huku upolela-po ovanthu vokulivela ononkhali mbavo. Ombimbiliya ipopia okuti Huku “kawana-wana okupopia etyi tuapengesa, tupu kapake onkhongo.” (Salmo 103:9) Onthue tulitehelela nawa tyina vakuetu vetupolela-po oviponyo vietu. Ngotyo, no onthue tuesukisa okupolela-po vakuetu. — Salmo 86:5.

Omunthu uhole vakuavo “kahambukilwa etyi tyihaviukile.”

Nkhele soka: Onthue katukala nawa tyina vakuetu vahambukilwa ovitateka vietu. Tupu no onthue katupondola okuyola vakuetu tyina vena ovitateka, atee umwe vana vetulinga onya.

Opo Huku etukuateseko, tuesukisa okulinga nawa vakuetu, atuhatale ku etyi vekahi. Onkhalelo imwe yokulinga nawa vakuetu, okuvekuatesako tyina vesukisa.