Tualako Okukevelela Noumphua-Lundo

Omuvo ulifuepi ukahi nokukevelela Ouhamba wa Huku? Okuti ukahi nokukevelela noumphua-lundo namphila tyihapepukile? (Loma 8:25) Ovakuatate ovanyingi veyelwe, valingwa onya, vapakwa movikaleya alo umwe vamwe vaipawa. Vamwe vena omauvela ahaveluka, ovakuavo vakulupa.

Oityi matyitukuatesako okukevelela noumphua-lundo namphila tuna ovitateka? Tuna okupameka ekolelo lietu, mokutanga Ombimbiliya ononthiki ambuho, nokusokolola kuetyi tutanga. Tuna okusoka vala kekevelelo lietu. (2 Kol. 4:16-18; Heb. 12:2) Tupu tuna okulikuambela ku Siovaa okuita ononkhono mbae mbutukuateseko. (Luka 11:10, 13; Heb. 5:7) Tate yetu woluembia, metukuatesako “okukoleleya movipuka aviho noumphua-lundo nehambu.” — Kolo. 1:11.

TALA OVIDIU YATI: “OKUHATEKA TYIKOLELEYA” — NONTHUMBI YOKUVASA KONDYAMBI, KONYIMA AMUKUMBULULA OMAPULO AA:

• Oityi tyipondola “okutuuhulukila” vala? (Ecl. 9:11)

• Oñgeni omalikuambelo apondola okutukuatesako tyina tulambela movitateka?

• Inkha pahe katutyivili vali okuundapa movilinga vya Siovaa ngo kohale, omokonda yatyi tuesukisila okuhambukilwa etyi nkhele tuvila?

• Oityi tyikukuatesako okutualako nonthumbi yokuti mokavasa ondyambi?