OMWENYO WETU WOUKILISITAU
Siovaa Utukuatesako Tyina Tuli Nokulambela Movitateka
Mononthiki mbuno mbonthyulilo tuhole umwe okulambela movitateka vimwe ovinene, pamwe atusoko okuti kamatutyivili-ale okulambela movitateka ovio tuna-vio. Mahi ine tulikuatehila umwe atukala omapanga a Siovaa, ovitateka viatyo nga vilema-lema umwe, metukuatesako. (Isa 43:2, 4) Mahi oñgeni matukala omapanga omanene a Siovaa?
Elikuambelo. Ine tulikuambela ku Siovaa atumupopila umwe atyiho tyili momutima wetu, ngwe metuavela ombembwa yae nononkhono tutyivile okukoleleya. — Fil. 4:6, 7; 1 Tes. 5:17.
Omaliongiyo. Onthwe tuesukisa umwe unene okulongesiwa na Siovaa nokukala na vakwetu momaliongiyo, haunene umwe mokonda tuli konthyulilo. (Heb. 10:24, 25) Ine tulilongesa etyi haa matulongesiwa meliongiyo, atuende komaliongiyo, nonthwe atuave omakumbululo, Siovaa metukuatesako, etuavela ononkhono mbae. — Ehol. 2:29.
Okuivisa. Ine tulipaka umwe unene movilinga viokulongesa ovanthu ondaka ya Huku, kamatusoko vala kovitateka vietu, matusoko koviwa matukamona. Tupu matukala omapanga a vakwetu tufenda navo Siovaa, na Siovaa akala epanga lietu. — 1 Kol. 3:5-10.
TALA OVIDIU YATI: SIOVAA MEKUKUATESAKO, OKUMBULULA OMAPULO AA:
Oityi tyakuatesileko Malu movitateka akalele navio, ahayeke-po epanga liae Siovaa?
Oñgeni etyi tyipopia Salmo 34:18 tyipondola okututulisa omutima tyina tulambela movitateka?
Oñgeni etyi tyaendele na Malu tyilekesa okuti tyina tuna ovitateka Siovaa ketutale vala, utuavela ononkhono? — 2 Kol. 4:7.