ONTHELE YOKULILONGESWA 30
OTYIIMBO 36 Tuyungei Omutima Wetu
Longokela Konohamba Mbo Isilayeli
“Onwe mamukamona vali okwelikalela kwou uviukisa nondingavivi, okwelikalela kwou ulingila Huku nou wahalingila Huku.”— MAL. 3:18.
ETYI MATYIPOPIWA-MO
Matulilongesila konohamba mbo Isilayeli opo tutale etyi tuna okulinga tuhambukiswe Siovaa.
1-2. Oityi Ombimbiliya yapopia pokwapopia onohamba mbumwe mbo Isilayeli?
OMBIMBILIYA yapopia ovalume valamba po 40 vali onohamba mo Isilayeli.a Pokwevepopia yapopia umwe novipuka valingai-le. Yapopia onohamba mbumwe mbukahi nawa, mahi mbalingile ovipuka ovivi. Umwe ponohamba ombo o Ndaviti. Siovaa wati: ‘Omuumbili wange Ndaviti, [waendelele] movitumino viange, etavela nomutima wae auho, okulinga vala etyi tyaviuka komaiho ange.’ (1 Oha. 14:8) Namphila Ndaviti apopiwa ngootyo, mahi walalele nomukai wehe-wae, omulume watyo emwipaesila movilwa. — 2 Sam. 11:4, 14, 15.
2 Tupu Ombimbiliya ipopia onohamba ononyingi onondingavivi, mahi mbalingile ovipuka oviwa. Umwe puvo o Lombowau. “Lombowau walingile etyi tyapenga.” (2 Ehi. 12:14) Namphila Lombowau apopiwa ngootyo, mahi wetavelele otyitumino tya Huku, komihoko atumina akupolwa omihoko 10. Tupu wapamekele omapunda-umbo opo aamene ovanthu va Huku konondyale mbavo. — 1 Oha. 12:21-24; 2 Ehi. 11:5-12.
3. Oityi tupondola okulipula? Ya oityi matulilongesa monthele ei?
3 Pahe tupondola okulipula atuti: Ine mo Isilayeli mwali onohamba mbulinga oviwa no ombu mbulinga ovivi, okutyi Siovaa atalelele atie Ohamba ei ilinga etyi tyaviuka komaiho ange? Ekumbululo liepulo olio malitukwatesako okunoñgonoka otyityi Siovaa atala mwoonthwe. Matupopi ovipuka vitatu oku Siovaa atalelele onohamba mbo Isilayeli: Tyotete, opi ankho kwayembela omutima wohamba. Tya vali, tyina yamalingi etyi tyapenga, ilivela umwe nomutima auho? Tya tatu, okwahayeke-po efendelo liotyotyili.
VALINGILILE SIOVAA NOMUTIMA WAVO AUHO
4. Okutyi onohamba mbahayekele-po Siovaa ankho mbelikalela no ombu mbayekele-po Siovaa?
4 Onohamba mbahambukisilwe Siovaa, ombombu mbemufendele umwe nomutima auho.b Ohamba Seosafaa walingile oviwa, watiwa ‘waovolele Siovaa nomutima wae auho.’ (2 Ehi. 22:9) Ombimbiliya pokwapopia Sosiya yati: “Kakwali ohamba naike yelifwa nae, yakondokele ku Siovaa nomutima wayo auho.” (2 Oha. 23:25) Pokwapopia Salomau walingile ovivi pweetyi akulupa, yati: “Omutima wae awahalingi vali wotyili auho ku Siovaa.” (1 Oha. 11:4) Ohamba Ambiyau nayo yayekelepo okufenda Huku, yatiwa: “Omutima wae ankho hamukwatyili-ko ku Siovaa.” — 1 Oha. 15:3.
5. Popia oityi tyitiwa okufenda Siovaa nomutima auho?
5 Oityi tyitiwa okufenda Siovaa nomutima auho? Omunthu wokufenda Siovaa nomutima auho, oyou umufenda mokonda umuhole, umulinga onthilo. Hayou umufenda tyokuti vala pahe ndyilinga ñgeni. Ya omunthu watyo oo, uhumba Siovaa, umulinga onthilo ononthiki ambuho ena omwenyo.
6. Oityi tuna okulinga tufende apeho Siovaa nomutima auho? (Omihe 4:23; Mateusi 5:29, 30)
6 Oityi tuna okulinga tuhetekele onohamba mbokwafendele Siovaa nomutima auho, ambehemuyeke-po? Tuna okuliyunga kweevi vipondola okutunyona. Tyimwe tuna okuliyunga, ovitalukiso viahaviukile, mokonda vipondola okutunyona atukala nomitima vivali. Otyikwavo omapanga omavi, nokuhumba omalumono. Ine tutala ñgana komutima wetu kuna tyimwe povipuka ovio tyahanda okutendesa onthyole tuna na Siovaa, tuna okutyipola-ko liwa. — Tanga Omihe 4:23; Mateusi 5:29, 30.
7. Oityi tyesukisila unene okuliyunga kweevi vipondola okutunyona?
7 Tweheliyekei atukehika kokukala nomitima vivali. Ine katulunguka tupondola okusoka okuti, mokonda tulingila-le Siovaa ovilinga ovinyingi, katusukisa vali okuliyunga kovipuka vipondola okunyona oupanga wetu nae. Otyo tupondola okutyieleka ñgaa: Soka ñgeno uli pondye pena omphepo, patenda unene, pahe onyingila motyitunge. Tyina wamanyingila-mo movasi mwatokota, mahi ine unyingila vala pombundi ohayeila-po kapasete-ale ukatehela vala ñgana mokati mweyula omphepo, mwatenda. Oityi twahanda okupopia? Tuhanda okupopia okuti, tuna okulinga evi vitukwatesako tulinge ovanthu vatokota moupanga wetu na Siovaa, atuliyungu kweevi vipondola okutunyona, omphepo yatenda youye ou, novituwa viaava vehesukile na Huku. Tuna okulinga ngatyina uti twaika epito, ‘ovipuka ovio’ viahanyingile momutima wetu, avitukalesa nomitima vivali. — Efe. 2:2.
ETYI VALINGA ONONKHALI VELIVELELE
8-9. Oityi Ohamba Ndaviti, n’Ohamba Isekiya valingile etyi vaviyulwa? (Tala olutalatu lwo.)
8 Ngeetyi twapopia-le ponthyimbi, Ohamba Ndaviti yalingile onkhali imwe onene. Mahi etyi omuuli Nataa akapopia nae oñgeni onkhali alinga yakalesa Siovaa, Ndaviti elikondola umwe koututu elivele. (2 Sam. 12:13) Onondaka Ndaviti apopia m’Oviimbo 51, mbulekesa umwe okuti ankho welivela nomutima auho. Ndaviti kalingile vala omaandambeyo, opo Nataa asoke vala okuti welivela, opo ahaipawe. — Ovii. 51:3, 4, 1, onondaka mbokuhimbika.
9 Ohamba Isekiya nae walingile etyi tyapenga komaiho a Siovaa. Ombimbiliya yati: “Omutima wae wakala nomalityindailo. Huku anumanena Isekiya no Sundaa no Selusalei.” (2 Ehi. 32:25) Oityi tyatwaile Isekiya kokulipaka-ko? Tyipondola omokonda Siovaa wemupele olumono olunyingi, wemukwatesileko atilisa ova Asilia, emuhakula kouvela maa umwiipaa. Mokutala, okwelipaka-ko tyemutwaile kokulekesa ova Mbambilonia olumono aluho ena-lo. Omuuli Isaiya akapopia nae, emuti otyipuka otyo alinga, Siovaa tyemunumanesa. (2 Oha. 20:12-18) Nae alingi nga Ndaviti, elikondola koututu elivele. (2 Ehi. 32:26) Etyi pakala atiwa, “walingile etyi tyaviuka komaiho a Siovaa,” otyo tyilekesa okuti tyina ankho Siovaa emutala uti omunthu wae ehole. — 2 Oha. 18:3.
Ohamba Ndaviti Nohamba Isekiya etyi vapopilwa okuti etyi valinga tyapenga velipakele koututu avelivele. (Tala opalangalafu 8-9)
10. Ohamba Amasiya yakalele ñgeni etyi yaviyulwa?
10 Ohamba Amasiya yo Sundaa, kayalingile ngeetyi tyalingile oo Ndaviti na Isekiya. Amasiya walingile etyi tyaviuka komaiho a Siovaa, “mahi ketyilingile nomutima auho.” (2 Ehi. 25:2) Oityi alingile tyekemupopisa ngootyo? Etyi Siovaa emukwatesako akalwisa ova Endoo avatiliko, Amasiya elipetamena kono huku mbavo ngambo afenda.c Etyi aendelwa nomuuli wa Siovaa emupopile okuti otyo alinga katyaviukile, ehemutehelela emutaata. — 2 Ehi. 25:14-16.
11. Omu mutyipopila 2 Kolindu 7:9, 11, oityi tuna okulinga opo tweevelwe? (Tala olutalatu.)
11 Etyi tyalingile Amasiya tyitulongesa-tyi? Tyina twalinga onkhali, tuna okulivela atulikwatehila umwe twahapaleke-po vali. Ine ovakulu vewaneno vetuviyula no motyipuka umwe tutala ngoti hatyinene-ko-ale, oityi tuna okulinga? Twahatiei hamwe twaviyulwa tupu omokonda Siovaa utuyele, novakulu vewaneno vetuyele. Nonohamba mbo Isilayeli mbalingaile ovipuka oviwa, nambo pamwe mbaviyulilwe. (Hemb. 12:6) Tyina twamaviyulwa tuna okulinga ovipuka evi vitatu: (1) okulikondola koututu atutavela, (2) okupiluluka, (3) okulipaka movilinga vya Siovaa nomutima auho. Ine tuti tyina twamalingi etyi tyapenga atulivele, Siovaa metweevela. — Tanga 2 Kolindu 7:9, 11.
Tyina twamaviyulwa tuna okulinga ovipuka evi vitatu: (1) okulikondola koututu atutavela, (2) okupiluluka, (3) okulipaka movilinga vya Siovaa nomutima auho. (Tala opalangalafu 11)f
KAVAYEKELE-PO EFENDELO LIOTYOTYILI
12. Okutyi haunene Onohamba mbahayekele-po Siovaa ankho mbelikalela noombu mbayekele-po Siovaa?
12 Onohamba Siovaa ati vali ovanthu vehemuyekele-po, ovava vahayekele-po efendelo liotyotyili. Onohamba mbatyo ombo, tupu mbapele ovanthu ondundo motyilongo, navo vahayeke-po efendelo liotyotyili. Onohamba ombo mbahula okuti mbalingaile ovipuka viahaviukile, mahi vali ovanthu velipakula ku Siovaa. Velikwatehilile umwe vasukule otyilongo kefendelo liomatutu.d
13. Oityi Siovaa atila Akambe wali ohamba ondingavivi?
13 Oityi Onohamba mbumwe Siovaa embupopilile okuti vemuyekele-po? Otyo katyilekesa okuti ovipuka aviho ankho valinga ovivi. Tala vala etyi tyalingile ohamba ondingavivi Akambe. Pweetyi aipaele Nambote, welikondolele umwe koututu, elivele. (1 Oha. 21:27-29) Tupu watungile omapunda-umbo, alwisa onondyale mbova Isilayeli. (1 Oha. 20:21, 29; 22:39) Mahi otyipuka otyinene vali Akambe alingile, okuhahanesa motyilongo efendelo liomatutu mokonda yokwahindilwa nomukai wae. Otyipuka otyo nii ketyiyekele-po. — 1 Oha. 21:25, 26.
14. (a) Oityi Siovaa atila ohamba yali ondingavivi? (b) Onohamba onondingavivi mbalingile-tyi?
14 Ohamba onkhwavo yayekele-po Siovaa, o Lombowau. Ponthyimbi Lombowau walingile ovipuka ovinyingi oviwa pweetyi atumina. Etyi atala ovipuka vina nokumweenda nawa, ayeke-po ovitumino vya Siovaa akafenda ono huku mbomatutu. (2 Ehi. 12:1) Pamwe ankho pahe uti vala hono akafenda Siovaa, hono akafenda ono huku mbomatutu. (1 Oha. 14:21-24) Oo na Akambe havo vala vayekele-po efendelo liotyotyili. Onohamba ononyingi-ale mbetyilingile, ambukahula kefendelo liomatutu, ambuhiki umwe kokuhindila ovanthu navo vayeke-po efendelo liotyotyili. Siovaa ohamba ati yali ondingaviwa, oyei yahayekele-po efendelo liotyotyili. Mahi ou wayekele-po efendelo liotyotyili, oo wemuti ondingavivi.
15. Oityi Siovaa esukila unene nomunthu okuhatundu mefendelo liotyotyili?
15 Oityi Siovaa ankho esukila unene nefendelo ohamba ili nokulandula? Tyimwe omokonda, onohamba ombo mbuna otyilinga tyokululika ovanthu va Huku vahatunde mefendelo liotyotyili. Otyikwavo, omokonda efendelo liomatutu litwala omunthu kokulinga ononkhali ononkhwavo ononene, no kokulinga onya ovanthu. (Ose. 4:1, 2) Tupu otyikwavo omokonda Onohamba ombo, novanthu ankho mbutumina, vali ovanthu vakola va Siovaa. Otyo Ombimbiliya ipopila okuti etyi ova Isilayeli velipaka mefendelo liomatutu, ngootyo valinga oumbalehi. (Sele. 3:8, 9) Omunthu okukala nombalehi, tyiihama komutima wou velinepa nae. Nomunthu wokwelipakula ku Siovaa elipake mefendelo liomatutu, ngootyo walinga onkhali onene ku Siovaa, ya tyimwihama unene komutima.e — Epal. 4:23, 24.
16. Okutyi Siovaa atalela ati omunthu ou ondingaviwa ou ondingavivi?
16 Otyo tyitulongesa-tyi? Tyitulongesa okuti tuna okulunguka twehelipake mefendelo liomatutu. Mahi tupu tuna okukakatela mefendelo liotyotyili, atulipake movilinga vilingwa-mo. Omuuli Malakiya wayandyulula umwe nawa omunthu patyi Siovaa ati ulinga oviwa, oupi ati ulinga ovivi. Wahoneka okuti: “Onwe mamukamona vali okwelikalela kwou uviukisa nondingavivi, okwelikalela kwou ulingila Huku nou wahalingila Huku.” (Mal. 3:18) Naina twahayekei otyipuka natyike, nii oukwankhali wetu, novipuka pamwe tulinga viahaviukile vitusoyese atuhiki kokuyeka-po okulingila Siovaa. Okuyeka-po okulingila Siovaa onkhali imwe onene.
17. Oityi tyihandela okukoya nawa ou matulinepe nae?
17 Ine kunenepe hamwe tupu kunenepwe pahe uli nokusoka okwovola ou mulinepe nae, okuti onondaka ombo mbapopia Malakiya mbuyemba kokufenda Siovaa mbuna etyi mbukulongesa una okulinga pokwovola ou mulinepa nae? Ine omunthu ukahi umwe nawa una ovituwa oviwa, mahi kafende Siovaa, okuti ngootyo omunthu oo ondingaviwa komaiho a Siovaa? (2 Kol. 6:14) Okuti ine haa mulinepa mekukwatesako okukala noupanga omuwa na Siovaa? Ovakai vohamba Salomau ankho vafenda ono huku ononkhwavo, mahi tyipondola ankho ovanthu ovawa vena ovituwa oviwa. Mahi mokonda ankho kavafende Siovaa, katutu-katutu avateye umwe omutima wa Salomau nae pahe ayembe kefendelo liomatutu. — 1 Oha. 11:1, 4.
18. Oityi vokuna ovana vena okuvelongesa?
18 Onwe vokuna ovana, mupondola okutomphola novana venyi evi vialingaile onohamba ombo, muvekwateseko okusuka novilinga vya Siovaa. Vekwateseiko okunoñgonoka okuti ohamba Siovaa atile ondingaviwa oyei yahayekele-po okumufenda, ei yapele ovanthu ondundo vatwaleko okumufenda. Evi mupopia neevi mulinga tyimoneke okuti musuka vali unene no vya Huku, mupaka komutwe okulilongesa Ombimbiliya, nokwenda komaliongiyo, no movilinga viokwivisa. (Mat. 6:33) Ine kamulingi ngootyo, ovana mavasoko okuti tuna vala okukala Onombangi mba Siovaa mokonda “okapela koo tate.” Ine vasoka ngootyo, efendelo liotyotyili kamavelipake komutwe, ya vapondola umwe aveliyeke-po.
19. Okuti omunthu nga ayekapo okulingila Huku ngootyo tyakala-po umwe kakondoka vali? (Tala okakasa kati: “Upondola Okukondoka ku Siovaa!”)
19 Okuti omunthu nga ayeka-po okulingila Huku ngootyo tyakala-po umwe kakondoka vali? Au katyakalele-po mokonda ine ulivela, ukondoka vali mefendelo liotyotyili. Opo etyivile okukondoka, una okunthiamo omakamo, etavela tyina akwateswako novakulu vewaneno. (Tia. 5:14) Mahi ine ulikwatesila akala vali noupanga omuwa na Siovaa, kamekelivela!
20. Ine tuhetekela etyi tyalingile Onohamba mbahayekele-po Siovaa, Siovaa metutiwi?
20 Oityi twelilongesila konohamba mbo Isilayeli? Matukala vala ngonohamba mbahayekele-po Huku, putyina tukala apeho nomutima ukakatela vala mu Siovaa. Tyina twamalingi etyi tyahaviukile, otyiwa tulondokele-ko atulivele, atwahapaleka-po vali. Tupu twahalimbwei-ko okuti, tyesukisa unene okwahayeke-po okufenda Huku wike wotyotyili, Siovaa. Ine ukakatela vala mu Siovaa ohemuyeke-po mati tyina ekutala ati ove ulinga oviwa.
OTYIIMBO 45 Ovipuka Ndyisokolola Momutima Wange
a Monthele ei onondaka “onohamba mbo Isilayeli,” mbupopia onohamba ambuho mbatuminine ovanthu va Siovaa, tyilinge ombu mbatuminine omihoko aviho 12, tyilinge ombu mbatuminine vala omihoko vivali vyo Sundaa, no ombu mbatuminine omihoko 10 vyo Isilayeli.
b ONONDKA MBAHANGUNUNWA: Tyina Ombimbiliya ipopia ondaka “omutima,” ipopia etyi omunthu ekahi mokati, evi ahanda, neevi asoka, etyii atuwa, neevi evila, neetyi tyimutwala kokulinga ovipuka, nonomphango ena-mbo.
c Mokutala onohamba ankho mbahafende Huku, tyina mbamatilisa ovanthu votyilongo tyimwe, mbufenda ono huku mbatyo mbotyilongo otyo.
d Asa walingile ovipuka ovinyingi ovivi. (2 Ehi. 16:7, 10) M’Ombimbiliya watiwa wali omunthu ulinga etyi tyaviuka komaiho a Siovaa. Namphila potete ehetavelele okuviyulwa, mahi konyima welivelele. Oviwa alingaile avinyimi-po ovivi aviho alingile. Asa watutumbile umwe nokufenda vala Siovaa nokuhanya ovilolo aviho motyilongo. — 1 Oha. 15:11-13; 2 Ehi. 14:2-5.
e Tutyimona umwe nawa okuti efendelo ku Siovaa liesukisa unene, mokonda ovitumino viotete vivali povitumino viapelwe Mwisesi, viilika omunthu okufenda ovipuka ovikwavo, ou una okufendwa o Siovaa vala kwapwa. — Oku. 20:1-6.
f ONONDAKA MBOKUHANGUNUNA OLUTALATU lwo kondye: Omukwendye omukulu wewaneno uli nokutomphola nomunthu omukulu vali kwe uhole okulambesa pokunwa, omukulu oo elikondola koututu etavela etyi apopiwa etyiyeke-po tyokulambesa pokunwa, pahe utwalako okulingila Siovaa.