Oityi Tuna Okulinga Tupole Ouwa Kolwembia Lwa Siovaa

1. Oityi tuna okulinga Siovaa ahambukwe?

SOKA ñgeno wapa omunthu otyipuka tyimwe tyati umwe otyo otyiwa, otyo tupu weete umwe okuti matyimukwatesako. Ine omunthu wapa otyipuka otyo, utyitambula vala etyipake nawa ehesuku vali natyo, mokala ñgeni? Matyikunumanesa. Mahi pahe ine utala ñgana omunthu wapa otyipuka otyo, usuka natyo tyimoneka umwe okuti wapandula, mokala ñgeni? Mohambukwa. Oityi tuhanda okupopia apa? Siovaa welipola Omona wae opo etuyovole. Tyina tulinga evi vilekesa okuti twapandula otyali otyo otyinene Siovaa etulinga, nolwembia lwae, Siovaa uhambukwa. Uhambukwa mokonda wayeka tupu ofeto yeyovo, okutuhole. ​— Swau 3:16; Loma 5:7, 8.

2. Oityi matulilongesa monthele ei?

² Mokweenda kwomuvo, pamwe tupondola okulimbwa-ko kotyali twalingwa, tyofeto yeyovo, atulingi ngatyina otyali otyo twetyipaka vala nawa. Otyili, twahambukwa umwe okwetyipewa, mahi otyo twetyipaka vala twehesuku vali natyo. Opo tuhehike kokulinga ngootyo, ononthiki ambuho tuna okulinga evi vilekesa okuti twapandula etyi Huku na Kilisitu vetulingila. Onthele ei ipondola okukukwatesako okutyilinga. Monthele ei, matupopi etyi tuna okulinga tupole ouwa kofeto yeyovo pehepano, no komutwe wandyila. Atutale vali etyi tuna okulinga tyimoneke okuti twapandula olwembia lwa Siovaa, haunene umwe momuvo uno Wehinangelo.

OITYI TUNA OKULINGA TUPOLE OUWA KOFETO YEYOVO PEHEPANO

3. Popiapo tyimwe tyilekesa okuti pehepano tuli-ale nokupola ouwa kofeto yeyovo.

³ Pehepano tuli-ale nokupola ouwa kotyilikutila tyeyovo tya Kilisitu. Siovaa utweevela tupu ononkhali mbetu omokonda yofeto yeyovo. Siovaa katilwe ngaliti pano una okutweevela, mahi utweevela mokonda utuhole. Omuhoneki umwe w’Oviimbo wapandulile aimbi ati: “Siovaa ove ukahi nawa, okupolela-po ovanthu oviponyo kusete.” ​— Ovii. 86:5; 103:3, 10-13.

4. Ovalie Siovaa ayekela ofeto yeyovo? (Luka 5:32; 1 Timotiu 1:15)

⁴ Vamwe vapondola okusoka avati kavatelemo-ale mokweevelwa na Siovaa. Ngwe tyili atuho vala petupu-ale ou watamo. Omutumwa Paulu nae wetyinoñgonokele otyipuka otyo, ati: “No mokutiwa omutumwa hatele-mo-ale.” Apopi vali ati: “Mahi mokankhenda okanene ka Huku, ame uno.” (1 Kol. 15:9, 10) Tyina tulivela ononkhali mbetu, Siovaa utweevela. Omokonda yatyi etweevelela? Hakuti omokonda twatamo mokweevelwa, mahi omokonda utuhole. Ine ove tyina ulitala ñgana usoka vala okuti kwatelemo-ale mokweevelwa, hinangela okuti Siovaa ofeto yeyovo, keiyekelele ovanthu vahalingi ononkhali, mahi weiyekela umwe ava valinga ononkhali, avelivele. ​— Tanga Luka 5:32; 1 Timotiu 1:15.

5. Oityi tutila petupu-ale ou upondola okuti ame muhekulu watyo watamo mokankhenda ka Siovaa, ya mokonda yatyi?

⁵ Atuho vala, ngatukala-kala omanima omanyingi movilinga vya Siovaa, petupu-ale ou upondola okuti, ame umwe muhekulu watyo watamo mokankhenda kae. Otyili, Siovaa uhambukwa tyina atala omanima omanyingi twakala movilinga viae. (Hemb. 6:10) Siovaa welipola Omona wae, etwavela-e kotyali tyae, hakuti wetufeta mokonda tuna evi twemulingila. Ine tuti onthwe pahe twatamo mokankhenda ka Huku, hamwe atuti, onthwe vahekulu vatyo vokankhenda ka Huku, opo ongatyina tuli nokuti ononkhia mba Kilisitu mbutupu-ale etyi mbalinga. ​— Tala Ova Ngalasiya 2:21.

6. Oityi Paulu aundapelele unene movilinga vya Siovaa?

⁶ Paulu ankho utyii okuti utupu-ale etyi apondola okulinga atiwe watamo mokankhenda ka Huku. Naina, omokonda yatyi aundapelele unene movilinga vya Siovaa? Hakuti opala atiwe watamo, mahi ankho opala alekese okuti wapandula etyi alingwa okankhenda okanene na Siovaa. (Efe. 3:7) Noonthwe tulinga nga Paulu, tuundapa nombili movilinga vya Siovaa, hakuti opala tutiwe twatamo, mahi opala tyimoneke okuti twapandula okankhenda okanene etulinga.

7. Ouwa patyi vali tupola kofeto yeyovo pehepano? (Ova Loma 5:1; Tiaku 2:23)

⁷ Otyipuka otyikwavo otyiwa tupola kofeto yeyovo, okukala noupanga omuwa na Siovaa.a Ngeetyi twapopia-le monthele yokwalamba, petupu ou utyitwa epanga-le lya Siovaa. Mahi mokonda yofeto yeyovo, tupondola “okukala nombembwa na Huku,” nokukala noupanga omuwa nae. ​— Tanga Ova Loma 5:1; Tiaku 2:23.

8. Oityi tupandulila Siovaa mokwetwavela elao liokupopia nae melikwambelo?

⁸ Tala otyipuka tyimwe otyiwa tuna-tyo mokwakala noupanga na Siovaa, elikwambelo. Siovaa keivi vala omalikwambelo ovanthu vae tyina ovanyingi veliongiya, mahi wiiva umwe nomalikwambelo munthu na munthu alinga tyina eli vala aike. Elikwambelo litutulisa omutima, litukalesa nawa. Mahi hatyo vala otyo elikwambelo lilinga, tupu litukwatesako okukala noupanga omuwa na Huku, atulikwate-po nae. (Ovii. 65:2; Tia. 4:8; 1 Swau 5:14) Pweetyi Sesusi eli pano pohi, apeho ankho ulikwambela mokonda utyii okuti Siovaa memwiivi, ya elikwambelo vala ankho malimukwatesako vakale noupanga wapama na Siovaa. (Luka 5:16) Tupandula unene otyilikutila tya Sesusi, mokonda atyo tyetwikulila ondyila tukale noupanga na Siovaa, nokupopia umwe nae melikwambelo.

OITYI TUNA OKULINGA TUKAPOLE OUWA KOFETO YEYOVO

9. Ouwa patyi ovanthu va Huku vehemuyeke-po mavakapola kofeto yeyovo?

⁹ Ouwa patyi ovanthu va Huku vehemuyeke-po mavakapola kofeto yeyovo? Mavakapewa omwenyo wahapu. Ovanthu ovanyingi vasoka okuti otyo katyitavela-le, mokonda apa tyovanthu okunkhia tyahimbika okohale-ale. Mahi mwene ponthyimbi etyi Huku atunga ovanthu, ankho uhanda vakale-ko apeho. Ine Andau kalingile onkhali, ñgeno petupu-ale ou usoka okuti katyitavela omunthu okukala-ko apeho. Namphila vamwe pehepano momutwe wavo katyifu-mo tyomunthu okukakala-ko apeho, mahi tutyii okuti matyilingwa umwe, mokonda Siovaa welipolele tupu Omona wae opala aikulile ovanthu ondyila vakakale-ko apeho. ​— Loma 8:32.

10. Oityi ovalembulwa no vonongi ononkhwavo vakevelela?

¹⁰ Namphila omwenyo wahapu matukeumona vala komutwe, mahi Siovaa uhanda pehepano tusoke ngatyina omotuli-ale momwenyo wahapu. Ovalembulwa, vakevela okukatumina ohi na Kilisitu, mavakamona omwenyo wahapu, omwenyo omuwa keulu. (Ehol. 20:6) Onongi ononkhwavo, vakevelela okukala pano pohi tyayovoka komalwihamo, no kweevi vivetokotesa omutwe. (Ehol. 21:3, 4) Okuti noove u wonongi ononkhwavo, ukevelela okukala nomwenyo pano pohi? Ondyambi oyo mokapewa, hakuti opala vala utule omutima, mahi otyipuka umwe ovanthu ankho vapangelwa-le. Okukala pano pohi matyikahambukiswa unene.

11-12. Ovipuka patyi oviwa matukamona Mouye Omupe tuna okusoka pehepano? (Tala omalutalatu.)

¹¹ Pahe soka vala oñgeni mokakala Mouye Omupe pano pohi. Kumakakala vali notyiho tyonombela, nononkhia. (Isa. 25:8; 33:24) Siovaa mekekupa umwe oviwa aviho wesuka navio, okululuka. Oityi uhanda okukanoñgonoka vali nawa? Okuti wahanda okukanoñgonoka vali nawa ovinyama noviila? Wahanda okukelilongesa okuhika otyihumba novikwavo vali? Ine uhanda okukelilongesa okuyoa? Tutyii okuti Mouye Omupe mamukesukisa ovanthu vokutyivila okutunga, no vokulima. Tupu mamukesukisa ovanthu vokutyivila okuviukisa nokupangiya evi viateka-teka, nokuteleka, nokunthila ovipuka, nokutwika omiti nokuvitapelela. (Isa. 35:1; 65:21) Mokonda mokakala-ko apeho, ine una etyi wahanda okukelilongesa, mokelilongesa-tyo umwe atee utyivila.

¹² Nkhele soka vala kehambu malikakala-po pokuyakula ava vatutiliswa. (Ovil. 24:15) Tupu soka ovipuka ovinyingi mokelilongesa viayemba ku Siovaa mokutalela kweevi atunga. (Ovii. 104:24; Isa. 11:9) Mahi otyipuka otyiwa vali matyikahambukiswa, okukakala tyihalingi vali onkhali, pahe ofende umwe vala nawa Siovaa ohemwiiti-ale vali okuti ndyevele. Ñgana upondola umwe okukapumbwa oviwa ngo ovio ohande vala okuhambukilwa “vionkhali vilamba vala ondyila?” (Hemb. 11:25) Tutyii okuti kuhande okukapumbwa. Atyiho tuli nokulinga pehepano tukamone oviwa ovio, hanonkhono-pwila-ko. Wahalimbwe-ko okuti Ouye Omupe mauya umwe, hatyipuka matukevailila vala otyo tyiheya. Apa katutu matukati umwe ñgana tuli Mouye Omupe. Mahi Ouye Omupe matukeumona vala, mokonda yolwembia olunene Siovaa ena-lo, lwemutwala umwe kokulipola Omona wae etuyovole.

PANDULA SIOVAA MOKONDA YOLWEMBIA LWAE

13. Oityi tuna okulinga tyimoneke okuti twapandula Siovaa mokonda yolwembia lwae? (2 Ova Kolindu 6:1)

¹³ Oityi tuna okulinga tyimoneke okuti twapandula etyi Siovaa ayeka ofeto yeyovo? Okupaka tete komutwe ovilinga viae. (Mat. 6:33) Otyo tuna okulinga otyo, mokonda Sesusi “wankhila umwe aveho opo ava vena omwenyo vahalinge vala tyavo mwene, mahi valingile ou wevenkhila apindulwa-po.” (2 Kol. 5:15) Tyotyili onthwe katuhande okupumbwa oviwa matukamonena mokankhenda okanene ka Siovaa. ​— Tanga 2 Ova Kolindu 6:1.

14. Oityi tuna okulinga tyimoneke okuti tuyumba onthumbi mu Siovaa, tutavela tyina etululika?

¹⁴ Otyikwavo tuna okulinga tyimoneke okuti twapandula Siovaa molwembia lwae, okumuyumba onthumbi atutavela tyina etululika. Otyo matutyilingi ñgeni? Movipuka ngeevi, pokusoka matulongesiwa atee-pi kosikola, ovilinga patyi matutavela, tuna okusoka kweetyi Siovaa etuhandela. (1 Kol. 10:31; 2 Kol. 5:7) Tyina tulinga evi vilekesa okuti tuyumba onthumbi mu Siovaa, matumono oviwa, onthumbi yetu mwe maikulu aipame, atulikwate-po vali Nae. Neevi tukevela, komutima mavikala-ko vali. ​— Loma 5:3-5; Tia. 2:21, 22.

15. Oityi tuna okulinga momuvo uno Wehinangelo tyimoneke okuti twapandula?

¹⁵ Otyipuka otyikwavo tuna okulinga tyimoneke okuti twapandula Siovaa mokonda yolwembia lwae, omokulinga evi mavilekesa okuti twapandula ofeto yeyovo momuvo uno Wehinangelo. Tuna okuti onthwe tukala nomphango yokwenda Pehinangelo, onthwe tupu tukonga vakwetu navo veye-po. (1 Tim. 2:4) Ava mokongo vepopila umwe nawa evi vilingwa Pehinangelo. Tyimwe matyikukwatesako, okuvelekesa ovindiu ili mo jw.org yokwati, Omokonda Yatyi Sesusi Ankhila? no yokwati, Okuhinangela Ononkhia Mba Sesusi. Ovakulu vewaneno vena okwovola vokwayeka-po okwivisa, avevekongo. Soka vala ehambu likala keulu na pano pohi, tyina ongi imwe ya Siovaa yavombele ikondoka vali motyunda. (Luka 15:4-7) Monthiki Yehinangelo, pokulikukwinya apa, tukukunyei haunene umwe vana veya-po vala liotete, na vana vetyihula-le kohale tyokuya Kehinangelo. Twahanda navo vetyimone umwe okuti vayakulwa nawa. ​— Loma 12:13.

16. Oityi twesukisila okuundapa vali unene movilinga viokwivisa momuvo Wehinangelo?

¹⁶ Okuti momuvo Wehinangelo upondola okuundapa vali unene movilinga vya Huku? Okulinga ngootyo otyiwa, opo matyimonekela okuti wapandula Huku na Kilisitu ovipuka aviho veli nokutulingila. Tyina tulipaka vali unene movilinga vya Siovaa matulimonena-ko okuti uli nokutukwatesako, onthumbi yetu mwe aipame. (1 Kol. 3:9) Otyipuka otyikwavo tuna okulinga, okutanga onotesitu mbutangwa pomuvo Wehinangelo mbuli momukanda Tanga Ovihonekwa Ononthiki Ambuho, okuti hatyo, otange onotesitu mbuli pokakasa komukanda wovilinga weliongiyo liomokati kosimanu. Tupu upondola okulinga omphango yokulilongesa vali nawa onotesitu mbatyo ombo.

17. Oityi tyihambukiswa Siovaa? (Tala okakasa kati: “Evi Mavipopi Okuti Twapandula Etyi Siovaa Etulinga Olwembia.”)

¹⁷ Otyili, pamwe ove kumetyivili okulinga ovipuka aviho viapopiwa monthele ei. Mahi wahalimbwe-ko okuti, opo Siovaa atie walinga atyiho wevila, etyi ulinga ketyieleka neetyi vakwenyi valinga. Siovaa utala vala etyi tyili komutima wove. Siovaa uhambukwa tyina ekutala uli nokulinga etyi wevila tyilekesa okuti wapandula otyali otyinene ekupa, ofeto yeyovo. ​— 1 Sam. 16:7; Malu. 12:41-44.

18. Oityi twesukisila okupandula Siovaa Huku na Sesusi Kilisitu?

¹⁸ Ofeto yeyovo yetwiikulila ombundi tweevelwe ononkhali mbetu, tukale noupanga omuwa na Siovaa, nokukevelela okukakala nomwenyo wahapu. Apeho tulingei evi vilekesa okuti twapandula Siovaa mokonda yolwembia lwae lwemutwala kokutwetela oviwa ovio aviho. (1 Swau 4:19) Tupu tulingei evi vilekesa okuti twapandula Sesusi mokonda yolwembia lwae lwemutwala umwe kokwaava omwenyo wae, etuyovole. ​— Swau 15:13.