Tulingei Omapanga a Vakwetu Tufenda Navo!

1-2. Oityi Siovaa esuka unene natyo, ya uhanda tulinge-tyi?

SIOVAA usuka unene notyipuka tutekula vakwetu. Sesusi wetulongesa tuhumbe vakwetu ngeetyi tulihole onthwe mwene. (Mat. 22:​37-39) Otyo tyilekesa okuti tuna okutekula nawa ovanthu vatyo aveho, na vana umwe vahafende Siovaa. Tyina tutekula nawa vakwetu, atuvelingi okankhenda, tuhetekela Siovaa Huku, “utundisila ekumbi onondingavivi nonondingaviwa, ulokesila ombila vokuviukisa no vokupengesa.” — Mat. 5:45.

² Namphila tyili Siovaa ehole ovanthu vatyo aveho, mahi ava ehole vali unene ovava valinga etyi tyaviuka, ava vemufenda. (Swau 14:21) Ngwe uhanda noonthwe ñgeno otyo tulinga. Huku wetupopila okuti tuna “okutokota molwembia” na vakwetu tufenda navo atulingi “ovanthu vokulihole umwe tya ava velikwai.” (1 Pet. 4:8; Loma 12:10) Okutokota molwembia nokulinga ovanthu vokulihole umwe tya ava velikwai tyapopiwa apa, o ngeetyi tulihole nepanga lietu enene aa oyou tukala nae meumbo.

3. Oityi tuna okuhinangela tyiyemba kolwembia?

³ Tyina twatwika omuti, opo omuti oo ukule tusukisa okuutapelela. Nolwembia tuna okukala nalo na vakwetu o ngootyo, opo lukule tusukisa okulinga ngatyina uti tulutapelela. Otyo omutumwa Paulu apopilile Ovakwa-Kilisitu okuti: “Twaleiko tyilihole umwe lwaava velikwai.” (Hemb. 13:1) Siovaa uhanda tutwaleko okuhumba vakwetu. Monthele ei matutale omokonda yatyi twesukisila okukala omapanga a vakwetu tufenda navo ya oñgeni matutyilingi.

OITYI TWESUKISILA OKUKALA OMAPANGA A VAKWETU

4. Omu mutyipopila Oviimbo 133:​1, oityi tuna okulinga tupande vali otyipuka twelikwata-po na vakwetu tufenda navo? (Tala omalutalatu.)

⁴ Tanga Oviimbo 133:1. Etyi omwiimbi oo apopia tyokuti okulinga oupanga na vana vehole Siovaa “otyiwa,” otyili umwe. Omunthu una otyipuka otyiwa, okukalela vala okutyitala apeho pahe upondola okutyilovola. Noonthwe mokonda tukala apeho na vakwetu tufenda navo, pamwe katutyimono-ale vali okuti otyipuka twelikwata-po otyiwa. Tulimona apeho na vakwetu tufenda navo ya pamwe tulimona umwe ehimbwe mosimanu. Oityi tuna okulinga tuhayeke-po okupanda otyipuka twelikwata-po na vakwetu tufenda navo? Onthwe matuhumbu vali unene vakwetu tufenda navo, ine tusoka umwe nawa kweevi valinga mewaneno, neevi vehole okutulingila.

5. Tyina tulikwata-po na vakwetu tufenda navo tyitwala ovanthu kokulinga-tyi?

⁵ Vamwe onthiki yotete veya keliongiyo vahuva unene tyina vatala otyipuka tulihole. Otyo vala vamona otyo, avetyimono okuti vavasa otyili. Sesusi watile: “Ovanthu aveho mavetyimono vala okuti muvalongwa vange — tyina mulilinga olwembia na vakwenyi.” (Swau 13:35) Tala etyi tyalingile umwe utiwa o Chaithra, ankho uli nokulongeswa mosikola onene, oku tupu otyo alongeswa Ombimbiliya n’Onombangi mba Siovaa. Nthiki imwe wokumulongesa Ombimbiliya ati tweende kotyonge, Chaithra etavela. Monthiki yotete, etyi otyonge tyapwa apopila ou wokumulongesa Ombimbiliya ati: “Ame ovo tate kavenenthyumbakane, mahi motyonge muno nahumbakanwa novanthu 52! Netyimona umwe okuti Siovaa unthyole. Naame nahanda okukala mombunga ei.” Chaithra atwalako umwe okulongeswa Ombimbiliya alingi omwivisi etyi tyati mo 2024 ambatisalwa. Ovanyingi tyivetwala kokufenda Siovaa okutala oviwa tulinga notyipuka tulihole na vakwetu. — Mat. 5:16.

6. Oityi tutila okukala omapanga a vakwetu tufenda navo tyituyakulila?

⁶ Okulinga omapanga a vakwetu tufenda navo, tyipondola okutuyakulila. Omutumwa Paulu wapopilile Ovakwa-Kilisitu vakwavo okuti: “Apeho lipamekei na vakwenyi nthiki na nthiki . . . opo pahakale nawike utenekwa nononkhono mbuyondya mbonkhali.” (Hemb. 3:13) Tyina twasoya onomphai mbetu ambuhimbika okusosonoka mondyila youviuki, Siovaa upondola okutuma umwe povanthu vae wetyimona, eye okutukwatesako. (Ovii. 73:​2, 17, 23) Etyi ametupopila matyitukwatesako okutwalako okufenda Huku.

7. Olwembia lututwala kokulinga-tyi? (Ova Kolosu 3:​13, 14)

⁷ Onthwe tuyambwa tupu na Siovaa, omokonda atuho tuli nokulikwatehila tulilinge olwembia na vakwetu. (1 Swau 4:11) Olwembia olo lututwala ‘kokuliatela-ko vala kovipuka vakwetu vetulinga,’ atulikwate-po na vakwetu tufenda navo. (Tanga Ova Kolosu 3:​13, 14; Efe. 4:​2-6) Momaliongiyo tuhambukwa mokonda muna omphepo ongwa, otyipuka tyihena vali apa tyivasiwa.

LIHUMBEI NA VAKWENYI

8. Oityi Siovaa alinga etukwateseko atulikwate-po na vakwetu?

⁸ Twelikwata-po tupu na vakwetu tufenda navo, ha pohi ya huku, Siovaa oe utukwatesako tulikwate-po na vakwetu namphila atuho tuvakwankhali. (1 Kol. 12:25) Ombimbiliya yapopia okuti onthwe tuli ‘nokulongeswa na Huku tulihumbe na vakwetu.’ (1 Tes. 4:9) Onondaka ombo mbulekesa okuti Siovaa utulongesa n’Ovihonekwa etyi tuna okulinga tukale omapanga a vakwetu atulikwate-po. “Tulongeswa na Huku” tyina tutanga etyi tyili m’Ombimbiliya ngatyo tulinga. (Hemb. 4:12; Tia. 1:25) Otyo umwe otyo Onombangi mba Siovaa veli nokulilongesa okulinga.

9. Onondaka mbuli momukanda Ova Loma 12:​9-13 mbutulongesa-tyi tyiyemba kokuhumba vakwetu?

⁹ Oityi Ondaka ya Huku itulongesa tyitukwatesako atulikwate-po na vakwetu? Paulu wetyipopia umwe nawa, momukanda Ova Loma 12:​9-13. (Itanga.) Movelesikulu ekwii Paulu wati: “Kokulinga onthilo vakwenyi, lingei votete.” Oityi onondaka ombo mbuhanda okupopia? Mbuhanda okupopia okuti “kokuhumba” vakwetu onthwe tuna okulinga ovatete, tuna okwoovola onomphitilo mbokuvelinga nawa, okuveevela, nokuveyakula nawa, nokuvelinga otyali novikwavo vali. (Efe. 4:32) Katusukisa okukevela vakwetu veye tulinge omapanga. Onthwe ‘tulingei votete.’ Sesusi wati: “Okwaava tyihambukiswa vali tyipona okupewa.” — Ovil. 20:35.

10. Oityi tuna okulinga tyimoneke okuti tuna onduvia “kokuhumba vakwetu”? (Tala olutalatu.)

¹⁰ Etyi Paulu apopia okuti kokulihumba na vakwenyi lingei votete, pahe apopi vali okuti: “Lingei ovanthu vonduvia, mwahanangei.” Omunthu wonduvia oyou uta ombili ovilinga, usuka umwe navio. Tyina amapewa otyilinga tyimwe utyilinga umwe nawa. Omukanda Omihe 3:​27, 28 wati: “Wehelikondole, una uhiwa okulingwa otyiwa mulinga-tyo umwe. Wehelikondole ngwe ove utyivila umwe okumukwatesako.” Naina tyina twamamono mukwetu una etyi akamba twehelisetei-setei tumukwateseiko umwe. Twehelikondolei atuti hamwe pena-le mukwetu metyimono emukwatesako. — 1 Swau 3:​17, 18.

11. Oityi tuna okulinga tulikwate-po na vakwetu?

¹¹ Otyikwavo matyilekesa okuti tuhumba vakwetu, o putyina tuhasete okuvepolela-po tyina vametulingi tyimwe tyetunumanesa. Ova Efesu 4:26 yati: “Ekumbi liahanyingile otyo mwanumana vala.” Omokonda yatyi? Omokonda ovelesikulu 27 yati opo ngootyo ‘Eliapu matulipe ombundi.’ Otyo Siovaa m’Ondaka yae apalaikila-po okuti tuna okweevela vakwetu. Ova Kolosu 3:13 yati: Twaleiko ‘okulievela na vakwenyi tyahasimo.’ Otyipuka tyimwe otyinene tuna okulinga tulikwate-po na vakwetu, okuveevela tyina vametulingi tyimwe tyetunumanesa. Otyipuka otyo tyitukwatesako ‘tukale-kale umwe tyelikwata-po apeho momphepo ikola memphu liombembwa lihonyeka.’ (Efe. 4:3) Ine tweevela vakwetu matulikwate-po atukala nombembwa.

12. Oityi Siovaa alinga etukwateseko tulievele na vakwetu?

¹² Tyili pamwe okupolela-po ou wetulinga otyipuka tyetwiihama tyipondola okutupwiya. Mahi omphepo ikola ya Huku ipondola okutukwatesako atutyivili okweevela omunthu oo. Ombimbiliya tete yati, “humbei vakwenyi” aiti “lingei ovanthu vonduvia,” pahe aiti vali, “lingei ovanthu vokwatokota.” Omunthu ‘wokwatokota’ oyou una onduvia una ehambu” mokonda yomphepo ikola ya Huku. (Tala okatoi m’Ombimbiliya yokulilongeswa moputu momukanda Ova Loma 12:11.) Naina omphepo ya Huku ipondola okutukwatesako okulihumba na vakwetu nokuvepolela-po tyihasimo. Otyo apeho twesukisila okwiita Siovaa etukwateseko. — Luka 11:13.

“POKATI KENYI PAHAKALE OMALIYAPAUKO”

13. Ovipuka patyi ankho ñgeno vipondola okutuyapaula?

¹³ Momawaneno muna “ovanthu vatyo aveho,” tyati umwe ava vatunda oku ava vatunda oku. (1 Tim. 2:​3, 4) Mokonda yokwelikalaila, tyiti umwe ou uhanda etyi ou uhanda etyi, ou uvala ñgaa ou uvala ñgaa, ou uvindwa ñgaa ou uvindwa ñgaa, ou uhakulwa ñgaa ou uhakulwa ñgaa. Pahe ine katulunguka ovipuka ovio vipondola okutuyapaula. (Loma 14:4; 1 Kol. 1:10) Mokonda tuli “nokulongeswa na Huku tulihumbe na vakwetu,” twesukisa okulunguka opo tuhasoke okuti ovipuka vilingwa momuhoko wetu vikahi vali nawa, atukuluminya vakwetu navo vevilinge. — Fili. 2:3.

14. Tuna okulikwatehila tulinge-tyi ya omokonda yatyi?

¹⁴ Otyikwavo tuna okulinga opo mewaneno muhakale omaliyapauko, okulikwatehila apeho tupameke vakwetu. (1 Tes. 5:11) Ovanyingi vayekele-po okwivisa, naava vapolelwe mewaneno, omanima ano veli nokukondoka. Tuveyakulei nawa, navo avetyimono umwe okuti tuvehole! (2 Kol. 2:8) Tala vala etyi tyapopia omuhikwena umwe wakalele omanima ekwii tyihaivisa vali tupu tyihai vali komaliongiyo. Etyi hono nthiki imwe aya keliongiyo, wapopia wati: “Vandyakulile nawa otyo tuhipulula otyo tuyola-yola.” (Ovil. 3:19) Otyipuka otyo vakwavo valingile tyalekesa okuti vemuhole, tyemukalesile ñgeni? Wapopia vali wati: “Andyityimono umwe okuti okuvoko kwa Siovaa kuli nokunthyongolela ndyikondoke vali apa pena ehambu.” Ine apeho tupameka vakwetu, Kilisitu upondola okukwatelela mwoonthwe “apepulule vana veli nokututumba nomitengi.” — Mat. 11:​28, 29.

15. Oityi vali tyipondola okutukwatesako tulikwate-po na vakwetu? (Tala olutalatu.)

¹⁵ Otyikwavo tuna okulinga tulikwate-po na vakwetu, okusoka nawa kweetyi matupopi. Omukanda wa Sombe 12:11 wati: “Okutwi hako kumakela onondaka, hako kumakela onondaka ngelaka limakela okulia?” Omunthu wokuteleka tyina amateleka nkhele utyimakela atale ine tyapepa, pahe etyiavela vakwavo, noonthwe tyina tuna etyi tuhanda okupopia, nkhele otyiwa okutyisoka umwe nawa pahe haa atupopi. (Ovii. 141:3) Tuna okupopia onondaka mambukalesa nawa vakwetu, mambuvepameka, onondaka ‘mambutungu ava vembukoya-po.’ — Efe. 4:29.

16. Ovalie vena okupopia onondaka mbupameka?

¹⁶ Vokwanepa no vokuna ovana, tyihanda apeho mulunguke, mupopie etyi tyipameka. (Kolo. 3:​19, 21; Titu 2:4) Tupu novakulu vewaneno vena okupameka nokuungumanesa ovanthu mewaneno, mokonda ovo ovanthita votyunda tya Siovaa. (Isa. 32:​1, 2; Ngal. 6:1) Pena omuhe umwe w’Ombimbiliya wati: “Ondaka, ilinga ongwa okwipopia momuvo waviuka!” — Omih. 15:23.

OLWEMBIA “MWEEVI TULINGA, NO MOTYILI”

17. Oityi tuna okulinga tyimoneke okuti olwembia tuna-lo na vakwetu lutuka umwe komutima?

¹⁷ Omutumwa Swau wati, “tulingei volwembia, ha tyo komulungu vala, atyehe-tyelaka, mahi o mweevi tulinga, no motyili.” (1 Swau 3:18) Tuhanda olwembia tukala nalo na vakwetu tufenda navo lutuke komutima. Oityi tuna okulinga lutuke komutima? Twesukisa okukala omuvo omunyingi navo, opo oupanga wetu upame, atulihumbu vali. Tuna okwovola onomphitilo mbokukala omuvo omunyingi na vakwetu tufenda navo momaliongiyo, no movilinga viokwivisa, nokwenda pomaumbo avo. Ovio okuvilinga, opo matyimoneka okuti ‘twalongeswa na Huku tulihumbe na vakwetu.’ (1 Tes. 4:9) Ine tutwalako okutyilinga, opo noonthwe matutyimono umwe okuti naina, “otyiwa, otyiwa ngatyi ovakulu nonondenge okukala na vakwavo tyelikwata-po!” — Ovii. 133:1.