Siovaa Ukuhole Unene

1. Oityi tyiya momutwe wove tyina usoka ku Siovaa?

NTHIKI imwe wetyisokele-ale oñgeni Siovaa ekahi? Tyina upopia nae melikwambelo, oityi tyiya momutwe wove? Namphila Siovaa twahapondola okumumona, mahi Ombimbiliya yapopia ovipuka ovinyingi vitukwatesako okusoka oñgeni ekahi. Pamwe watiwa, “ekumbi, ondyakulilo,” apa pamwe watiwa, “otupia tuyoka.” (Ovii. 84:11; Hemb. 12:29) Apa eli patiwa opopawa, pekahi ngemanya liosafila, ngotyivela tyiliaima, ngomphumba ili komakaka. (Isek. 1:​26-28) Okwiiva ovipuka ovio aviho viapopiwa ngootyo Siovaa, tyipondola okututilisa owoma.

2. Oityi tyilingisisa vamwe avahakala omapanga a Siovaa?

² Mokonda onthwe katumono Siovaa, tyipondola okutupwiya okutavela okuti utuhole. Vamwe mokonda yovitateka vakondya-kondya navio, pahe vasoka okuti Siovaa kapondola-le okuvehumba. Vamwe nkhele vekulile vala, ovohe vetupu-vo evi vevelingile vilekesa okuti vevehole. Siovaa utyii okuti, ovipuka ngoovio kavitukalesa nawa. Pahe opo etukwateseko, welipopia oñgeni ekahi Mondaka yae.

3. Oityi twesukisila okulilongesa umwe nawa olwembia lwa Siovaa?

³ Ondaka ipopia umwe vali nawa oñgeni Siovaa ekahi, ondaka olwembia. (1 Swau 4:8) Huku olwembia. Aviho alinga uvilingila molwembia. Olwembia lwa Huku olunene, luna ononkhono, soka uhole umwe naava vehemuhole-ale. (Mat. 5:​44, 45) Monthele ei, matupopi vali nawa etyi Siovaa ekahi, nolwembia lwae. Tyina tunoñgonoka vali nawa Huku yetu, matumuhumbu vali.

SIOVAA UTUHOLE UNENE

4. Okusoka kolwembia lwa Siovaa, tyikukalesa ñgeni? (Tala olutalatu.)

⁴ “Siovaa una olwembia.” (Tia. 5:11) M’ombimbiliya, Siovaa welieeleka nomwali una okankhenda. (Isa. 66:​12, 13) Pahe soka vala omwali wokuna okankhenda, otyipuka aenga-enga nawa olukembe lwae. Ulupuka pekolo, otyo elunyanaisa nondaka yavova. Tyina lulila, na tyina luna apa peihama, ulupiniyalela umwe lukale nawa. Noonthwe tyina twameihamenwa, tuyumbei onthumbi mu Siovaa, mokonda ngwe utuhole. Omuhoneki umwe w’Oviimbo wati: “Pweetyi otyiho tyahanda okundeka, ove wankholesile omutima omphameka.” — Ovii. 94:19.

5. Oviwa patyi ove uli nokupola kolwembia olunene lwa Siovaa?

⁵ Siovaa kayeke-po ovanthu vae. (Ovii. 103:8) Ngwe ketuyeke-po vala liwa tyina tuna etyi twalinga tyapenga. Ova Isilayeli vanumanesile Siovaa ehimbwe, mahi ngwe wapopile onondaka mbulekesa okuti, ovanthu vae velivela uvehole, keveyeke-po. Watile: “Ove walinga [omunthu] wapandwa unene komaiho ange, ove wankhimanekwa, ame ndyikuhole.” (Isa. 43:​4, 5) Olwembia lwa Huku kalwapilulukile. Apeho tuyumbei-ko onthumbi, ngwe utuhole. Na tyina umwe twalinga onkhali onene, Siovaa nkhele ketuyeke-ale. Ine tulivela atukondoka kwe, olwembia luna twasile-po, olo vala matuvasi. Ngwe wati: “Maevela nomutima auho.” (Isa. 55:7) Ombimbiliya yati tyina twamaevelwa, ‘ku Siovaa kutunda omivo viapola.’ — Ovil. 3:19.

6. Oityi Sakaliya 2:8 itupopila tyiyemba ku Siovaa?

⁶ Tanga Sakaliya 2:8. Mokonda Siovaa utuhole, tyimwihama tyina etutala tweihamenwa, ngwe wesuka umwe natyo tyokutuyakulila. Mokonda tutyii okuti, tyina onthwe tweihamenwa nae tyimwihama, tupondola okulikwambela atuti: “Ndyakulile ngeetyi uyakulila onthanga yeiho liove.” (Ovii. 17:8) Kolutu lwetu, otyipuka tyina vali unene owoma, mahi tukwata umwe nomavoko evali, eiho. Naina, tyina Siovaa etweeleka nonthanga yeiho liae, ongatyina eli nokututi: ‘Onwe vanthu vange ndyimuhole, ou umulinga tyomapita, ngootyo uli nokuyama kwaame.’

7. Oityi twesukisila okuyumba onthumbi molwembia lwa Siovaa?

⁷ Siovaa wahanda atuho tuyumbe-ko onthumbi okuti, uhole umwe munthu na munthu. Ngwe utyii okuti mokonda yovipuka vimwe twakondyaile navio kohale, tupondola okulipula ine nae utuhole umwe. Pamwe tupu, pena evi tuli nokukondya navio pehepano vitulingisisa okwahayumbu-ko onthumbi okuti Siovaa utuhole. Oityi tuna okulinga tupameke onthumbi yetu mwe? Tala ovipuka Siovaa alinga vilekesa okuti uhole Sesusi, novalembulwa, utuhole umwe atuho.

OKUTYI TUMONENA OLWEMBIA LWA SIOVAA?

8. Oityi Sesusi ayumbilile-ko onthumbi okuti He umuhole?

⁸ Ovo Siovaa, Nomona wae Sesusi, omapanga omanene, velihole, velikwata-po tundee tya kohale. Kouye kutupu ovanthu vena-le oupanga omanima omanyingi, tyipona ovo Siovaa na Sesusi. Tutyimona umwe nawa okuti Siovaa uhole Sesusi, tyina tutanga Mateusi 17:5. Motesitu omo Siovaa ankho upondola vala okuti: ‘Ou, oyou ame napanda.’ Mahi mokonda wahanda umwe atuho tutyimone okuti uhole Sesusi, wati: “Ou Omona wange, omona ndyihole.” Siovaa ankho wahambukwa unene tyina atala otyipuka Sesusi ekahi, notyilinga malingi. (Efe. 1:7) Na Sesusi ankho utyii okuti Tate yae umuhole. Otyipuka emuhole, atyimukala umwe komutima. Nae mwene wetyipopaile ehimbwe okuti, Tate unthyole. — Swau 3:35; 10:17; 17:24.

9. Onondaka patyi mbulekesa okuti Siovaa uhole ovalembulwa? Hangununa. (Ova Loma 5:5)

⁹ Siovaa tupu una tyimwe alinga, tyilekesa okuti uhole ovalembulwa. (Tanga Ova Loma 5:5.) Nkhele tala vala ondaka, “lwauyulilwa.” Omukanda umwe pokwapopia ondaka oyo, wapopia ñgaa: “Tweluuyulilwa ngondongi.” Otyo tyilekesa umwe nawa okuti olwembia Huku ena novalembulwa olunene, kalulifwe-ale pano! Ovalembulwa navo vetyii okuti, ‘Huku uvehole.’ (Sunda 1) Omutumwa Swau, wapopile oñgeni otyipuka otyo tyemukalesa ati: “Sokei-ko vala, olwembia Tate etulinga, tyokukatiwa umwe tuvana va Huku!” (1 Swau 3:1) Okuti olwembia lwa Siovaa lwaoyela vala movalembulwa? Au. Siovaa walinga-linga-le ovipuka vilekesa okuti, atuho utuhole.

10. Otyipi otyipuka otyinene vali Siovaa alinga tyilekesa okuti ukuhole?

¹⁰ Otyipuka otyinene vali tyalekesa okuti Siovaa utuhole, otyipi? Otyilikutila tyeyovo! (Swau 3:16; Loma 5:8) Siovaa welipolele Omona wae ehole, emuyeke aipawe ankhile ovanthu aveho, opo tweevelwe ononkhali, atukala omapanga ae. (1 Swau 4:10) Tyina tusoka umwe nawa kweetyi ovo Siovaa na Sesusi velipola, matutyimono okuti atuho vetuhole. (Ngal. 2:20) Otyilikutila tyeyovo, katyalingilwe vala mokonda Siovaa mokuviukisa kwae otyo tyina okweenda ngootyo. Mahi wetyilingila motyali tyae, molwembia lwae. Tyamoneka umwe okuti Siovaa utuhole, pokwelipola omunthu ehole vali — Sesusi. Siovaa wayekele umwe omona wae amoneswe emone, etunkhila tuyovoke.

11. Oityi tulilongesila konondaka mbuli mu Selemiya 31:3?

¹¹ Twetyimona okuti olwembia Siovaa ena noonthwe, kelupakele vala komutima, mahi walinga umwe evi vilekesa okuti tyili utuhole. (Tanga Selemiya 31:3.) Siovaa wetweeta no kwe, mokonda utuhole. (Tala etyi tyapopia Epalukununo 7:​7, 8.) Petupu otyipuka natyike, nii petupu omunthu nawike, upondola okutupola molwembia lwa Huku. (Loma 8:​38, 39) Tyina usoka kolwembia olo lwa Huku, tyikukalesa-vo ñgeni? Tanga Oviimbo 23, utale oñgeni olwembia lwa Siovaa, notyipuka atekula nawa ovanthu, tyakalesile Ndaviti, neetyi tyihole okutukalesa onthwe atuho.

OKUSOKA KOLWEMBIA LWA SIOVAA TYIKUKALESA-VO ÑGENI?

12. Tyina utala ñgaa omukanda Oviimbo 23, upopia-tyi?

¹² Tanga Oviimbo 23:​1-6. Onondaka mbuli m’Oviimbo 23, mbaimbwa nomunthu uyumba onthumbi molwembia lwa Siovaa, no motyipuka atekula nawa ovanthu. Ndaviti, omuhoneki wotyiimbo otyo, wapopia oupanga omunene ankho uli pokati kavo Nomunthita wae, Siovaa. Ndaviti kakalele notyiho mokonda walulikilwe na Siovaa, wapamenene umwe vala Mwe. Ankho utyii okuti ononthiki ambuho ena omwenyo, olwembia lwa Siovaa malumulandaula umwe vala, kamalumuyeke. Oityi ankho ayumbila-ko onthumbi ngootyo?

13. Oityi Ndaviti ayumbilile-ko onthumbi okuti Siovaa memutekula?

¹³ “Himakambe natyike.” Ndaviti ankho utyilwete okuti uli nokutekulwa nawa, mokonda Siovaa ankho uli nokumupa atyiho akamba. Ndaviti ankho epanga lya Siovaa, ya Siovaa ankho uli nokumwamena. Otyo ayumbilile-ko onthumbi okuti atyiho vala tyipondola okumutumbukila, Siovaa kamemuyeke-ale, memupe etyi akamba. Mokonda onthumbi Ndaviti ali nayo molwembia lwa Siovaa, ankho ina vali ononkhono kweevi vimulingisa otyiho, akala nawa, akala nehambu. — Ovii. 16:11.

14. Oityi tutila Siovaa ututekula nolwembia?

¹⁴ Siovaa ututekula nawa nolwembia, haunene umwe tyina twatumbukilwa neevi vitupola ehambu. Umwe utiwa o Clairea waundapa mo Mbetele omanima alamba 20, una ononthiki akalele tyehena ehambu, etyi meumbo liavo vatumbukililwe novitateka vimwe vielilundikinyine vala. Tate yae atumbukilwa nouvela umwe wemulemanekele umwe, umwe pwaava velilandula na Claire, apolwa mewaneno, meumbo aveho avapeseka, atyiti oniñgoso ankho valinga yatoka, eumbo velipolwa. Oityi Siovaa alingile evetekule umwe nawa nolwembia? Claire wati: “Ononthiki mbatyo ambuho, Siovaa wetwavelele umwe etyi twesukisa. Ononthiki mbumwe, Siovaa wetwavelele etyi tyilamba pweetyi ankho ndyili nokusoka! Apeho ankho ndyisoka kononthiki Siovaa alinga ovipuka vilekesa okuti una olwembia noonthwe, otyo ononthiki mbatyo ombo ndyimbupaka nawa. Okuhinangela ovipuka viatyo ovio, tyamphele ononkhono andyityivili okukoleleya.”

15. Oityi tyapamekele Ndaviti? (Tala olutalatu.)

¹⁵ “Umphameka.” Pamwe Ndaviti wehulililwe, mokonda yovitateka ovinyingi akondyele navio. (Ovii. 18:​4-6) Mahi Siovaa wemupamekele nolwembia, emutekula nawa. Siovaa watwaile epanga liae liaponwa, “monohika mbayova nawa, . . . monohika mbokwombela mbatalala nawa.” Ndaviti amono umwe ononkhono, etyivili okukoleleya. — Ovii. 18:​28-32.

16. Oñgeni Siovaa ehole okukupameka?

¹⁶ Noonthwe hono tukondya novitateka, tuli nokututumba novinyingi, “katwanyiminwe-ko tupu, omokonda yolwembia olunene lwa Siovaa.” (Ong. 3:22; Kolo. 1:11) Tala etyi tyakondyele na umwe utiwa o Lakele. Mokolona omu, omulume wae wemuyeka-po, ayeke-po umwe na Siovaa. Otyipuka otyo Lakele atyimwihama unene. Oityi Siovaa alinga akwateseko Lakele? Lakele wati: “Siovaa wandingila ovipuka ndyityimone okuti unthyole. Wanthumine omapanga omanyingi twakalele navo, vandyetailile okulia, vanthumine onomesase nonotesitu, vati okulivasa navo tuyola-yola, otyo vanthyinangelesa okuti Siovaa uli nokunthekula. Apeho ndyipandula Siovaa wampha ombunga ei onene.”

17. Omokonda yatyi Ndaviti ankho ‘ahatilila owoma otyipuka natyike?’

¹⁷ “Himatili owoma otyipuka natyike, mokonda ove una ame.” Ndaviti ankho ukalela vala okuyewa, tyokwahanda umwe okwipawa, wali nonondyale ononyingi, ovakwa-vita ovanene. Mahi Siovaa wemuyakulilile, wemwamenene mokonda ankho umuhole. Ndaviti ankho utyeete umwe okuti Siovaa unae, movipuka aviho vimutumbukila kamemuyeke-ale. Otyo aimbilile okuti: “[Siovaa] wandyovola kovipuka aviho ankho vinthilisa owoma.” (Ovii. 34:4) Tyili Ndaviti ankho una umwe evi vimutilisa owoma, mahi olwembia lwa Siovaa, luna vali ononkhono kweevi ankho vimutilisa owoma.

18. Oñgeni okupamena molwembia lwa Siovaa tyikukwatesako tyina watila owoma?

¹⁸ Oityi tutila okupamena molwembia lwa Siovaa tyitwavela ononkhono tyina twatumbukilwa neevi vitutilisa owoma? Omukokoli-ndyila umwe utiwa o Susi, wapopia oñgeni vakalele, nae nomulume wae, etyi omona wavo eliipaa, wati: “Tyina ovipuka viatyo ngoovio ovivi viamekutumbukila, pahe ulinga vala unene otyiho, ngoti pena vali etyi matyilandula-ko. Mahi olwembia lwa Siovaa, lwetukalesa nawa, lwetuyakulila.” Lakele twapopia-le, wati: “Nthiki imwe kounthiki, nakatehela vala omutima wange weihama unene, andyilingi otyiho, andyiteketa. Andyiliyave ku Siovaa, mahi andyipopila umwe peulu. Poola yatyo umwe opo, ndyikatehela Siovaa uli umwe nokunthulisa omutima, andyilala umwe, uti vala olukembe lwasiswa na ina. Otyipuka otyo nii hityilimbwa.” Omukulu umwe utiwa o Tasu, wakalele omanima ekwana mokaleya mokonda yokwaanya okwenda kotolopa. Okuti nae una etyi alingililwe na Siovaa tyilekesa okuti umuhole? Yoo. Wati: “Siovaa wamphele ovipuka ovinyingi, vilamba pweevi ankho nakamba. Otyo atyimphe umwe ononkhono, andyiyumbu vali onthumbi mwe. Siovaa wankhwatesileko nomphepo yae, amphe ehambu naapa ndyina umwe evi vinthokotesa vala omutwe. Andyityimono umwe okuti okuundapela kumwe na Siovaa, umona oviwa vituka kolwembia lwae. Naapa umwe ankho ndyili mokaleya, andyikala omukokoli-ndyila.”

FWENA KU HUKU YOVE WOLWEMBIA

19. (a) Okunoñgonoka okuti Siovaa utuhole, matyitutwala kokupopia-tyi momalikwambelo etu? (b) Oityi tyapopiwa tyiyemba kolwembia lwa Siovaa, tyekuhika umwe vali unene komutima? (Tala okakasa kati: “Onondaka Mbutusokesa Umwe Okuti Siovaa Utuhole.”)

¹⁹ Ovipuka twapopia monthele ei, vilekesa umwe nawa okuti, Siovaa “Huku wolwembia” una onthwe! (2 Kol. 13:11) Huku usuka noonthwe atuho. Mwene noonthwe tutyeete umwe okuti, tuli “pokati kolwembia lwae olunene.” (Ovii. 32:10) Tyina tusoka kovipuka Huku alinga vilekesa okuti utuhole, tutyimona umwe okuti usuka noonthwe, atukala vali omapanga ae. Tupondola umwe okupopia nae tyehena-le otyinkhe, okumupopila umwe okuti, onthwe tutei vala kolwembia lwae. Tupondola okumupopila aviho vitulingisa otyiho, tyayumba-ko umwe onthumbi okuti, metwiivi, wesuka umwe natyo tyokutukwatesako. — Ovii. 145:​18, 19.

20. Oityi tutila olwembia lwa Siovaa lutufwenaika vali kwe?

²⁰ Tufwenei kolwembia lwa Siovaa lwatokota nawa, ngeetyi tufwena kokatupia katokota nawa tyina kwatenda. Siovaa una olwembia olunene noonthwe, una okankhenda. Naina, tyina olwembia lwa Siovaa lwamekuvasi, lukwata umwe nomavoko evali, weheluyeke. Atuho, mokonda Siovaa utuhole, noonthwe tutiei: “Ame ndyihole Siovaa!” — Ovii. 116:1.