Lundwa “Notyiawa Otyinene” tya Huku

1, 2. (a) “Motyiawa otyinene” tya Huku muakutikinya tyi? (b) Omapulo patyi matukumbulula monthele ei?

JEOVA wetuavela otyiawa tyoluembia etyi atuma Omona wae ehole, Jesus, pano pohi! (João 3:16; 1 João 4:9, 10) Apostolu Paulu waihana otyiawa otyo okuti “otyiawa otyinene tya Huku.” (2 Coríntios 9:15) Omokonda yatyi Paulu apopila ngotyo?

² Paulu ankho utyii okuti otyilikutila tya Jesus tyilekesa okuti omilao aviho via Huku mavikafuisuapo. (Tanga 2 Coríntios 1:20.) Otyo tyilekesa okuti “otyiawa otyinene” tya Huku tyakutikinya otyilikutila tya Jesus, nouwa-tima, noluembia luotyotyili Jeova etulekesa. Otyiawa otyo tyakolela katyitavela okutyihangununa monkhalelo tunoñgonoka nawa-nawa. Oñgeni otyiawa otyo tyakolela tyitukalesa? Iya oñgeni otyiawa otyo tyitulunda opo tulipongiye pala Ehinangelo liononkhia mba Kristu mu Tatu, 23 ya Tyitalale yo 2016?

OTYIAWA TYAKOLELA TYA HUKU

3, 4. (a) Oñgeni ulitehelela tyina umwe ekuavela otyipuka tyimwe? (b) Oñgeni otyiawa tyimwe tyakolela tyipondola okupilulula omuenyo wove?

³ Tuhambukwa unene tyina tuamapewa otyipuka tyimwe. Mahi oviawa vimwe viakolela unene iya vipondola okupilulula omuenyo wetu. Mongeleka, soka ñgeno walinga otyipuka otyivi. Pahe opopilwa okuti moipawa. Liwa-liwa apamoneka omunthu umwe uhei iya eliave opo ankhie pomphangu yove. Wafuapo opo ankhie pomphangu yove! Otyiawa otyo tyakolela tyikukalesa ñgeni?

⁴ Otyiawa otyo tyoluembia iya tyakolela tyipondola okukusokesa okulinga omapiluluko momuenyo wove. Hamwe tupu tyipondola okukulunda okukala vali notyali, nokukala noluembia navakuenyi, nokuevela una ukulinga omapita. Momuenyo wove auho, uhanda okulekesa okuti wapandula otyipuka wapewa.

5. Oñgeni otyiawa tya Huku tyofeto yeyovo tyavilapo vali koviawa ovikuavo?

⁵ Otyiawa tya Huku tyofeto yeyovo ongeleka onene. (1 Pedro 3:18) Soka kuetyi: Atuho tuapiñgana onkhali ku Andau, iya ehitiso lionkhali ononkhia. (Romanos 5:12) Oluembia lualunda Jeova opo atume Jesus pano pohi opo ankhile ovanthu aveho, opo “amakele ononkhia pala ovanthu aveho.” (Hebreus 2:9) Mahi otyilikutila tya Jesus tyakutikinya vali ovipuka ovikuavo! Makahanyako ononkhia pala apeho. (Isaías 25:7, 8; 1 Coríntios 15:22, 26) Aveho vakala nekolelo mu Jesus mavakakala nombembwa nehambu pala apeho, iya vamwe avakakala onohamba na Kristu keulu iya ovakuavo mavakatuminwa Nouhamba wa Huku pano pohi. (Romanos 6:23; Revelação 5:9, 10) Ononkhano patyi onongwa mbakutikinya motyiawa tya Jeova?

6. (a) Ovipuka patyi oviwa Jeova alaa ove ukevelela? (b) Popia ovipuka vitatu otyiawa tya Huku tyitulunda okulinga.

⁶ Onthele imwe yotyawa tya Huku, oohi maikakala omphangu yombembwa, kakukakala vali omauvela iya vokuankhia mavakatutiliswa. (Isaías 33:24; 35:5, 6; João 5:28, 29) Tuhole Jeova no Mona wae mokuetuavela “otyiawa otyinene.” Otyiawa otyo matyitulundu okulinga tyi? Otyo matyitulundu (1) opo tuhetekele nawa Kristu Jesus, (2) opo tukale nohole novakuatate vetu, iya (3) opo tuevele vakuetu nomutima wetu auho.

“OHOLE YA KRISTU ITULUNDA”

7, 8. Oñgeni tulitehelela konthele yoluembia lwa Kristu, iya otyo tyitulunda okulinga tyi?

⁷ Tete, tulundwa okuundapesa omuenyo wetu opo tunkhimaneke Jesus. Apostolu Paulu wati: “Ohole ya Kristu itulunda.” (Tanga 2 Coríntios 5:14, 15.) Paulu ankho utyii okuti inkha tutavela oluembia olunene lwa Jesus, otyo matyitulundu okukala nohole, nokunkhimaneka Jesus. Tyina tunoñgonoka nawa etyi Jeova ekahi nokutulingila, ohole yae maitulundu okutyinda omuenyo monkhalelo ilekesa okuti tunkhimaneka Jesus. Oñgeni matutyilingi?

⁸ Ohole ya Jeova maitulundu okuhetekela ongeleka ya Jesus, mokulandula nawa onomphai mbae. (1 Pedro 2:21; 1 João 2:6) Tyina tutavela Huku na Kristu, tulekesa ohole yetu kuvo. Jesus wati: “Una ovitumino viange nokuvitavela oe unthyole. Tupu, una unthyole uhole Tate, iya ame mandyikala nohole nokulilekesa kwe.”—João 14:21; 1 João 5:3.

9. Ovipuka patyi tukuluminyua okulinga?

⁹ Mokueenda Kuehinangelo, otyiwa tusokolole oñgeni matuundapesa omuenyo wetu. Lipula okuti: ‘Omononkhalelo patyi ndyikahi nokuhetekela Jesus? Iya opi nesukisa okuviukisa?’ Tyakolela okulilinga omapulo oo mokonda ouye uhanda tulinge ovipuka ulinga. (Romanos 12:2) Inkha katulunguka, tupondola okuhimbika okuhetekela omalongeso ouye, novipito, novanthu vokuankhimana. (Colossenses 2:8; 1 João 2:15-17) Oñgeni tupondola okulityilika omahongiliyo oo?

10. Omapulo patyi tupondola okulipula mokueenda Kuehinangelo, iya omakumbululo atyo maetulundu okulinga tyi? (Tala olutalatu pefo pahimbikila onthele.)

¹⁰ Mokueenda Kuehinangelo otyiwa tupole omuvo wokutala nawa omuvalo wetu, nono vidiu, noviimbo, nokutala nawa ovipuka vikahi mokomputadole yetu, no motelefone ine omo tablet. Lipula okuti: ‘Inkha Jesus wali pano atale etyi navala, okuti ñgeno tyankhundisa?’ (Tanga 1 Timóteo 2:9, 10.) ‘Okuti omuvalo wange ulekesa okuti ndyimulanduli wa Kristu? Okuti ñgeno Jesus wahumba ono vidiu mbange? Okuti ñgeno watehelela oviimbo viange? Inkha Jesus ukuata o telefone yange ine o tablet, matyinkhundisa inkha utala ovipuka vilimo? Okuti matyimphuilisa okuhangununina Jesus omokonda yatyi ndyihole ono videogame ndyiyumba?’ Ohole yetu na Jeova ipondola okutulunda okuyekapo ovipuka vihekahi nawa pala Ovakristau, namphila tyitupuiya. (Atos 19:19, 20) Etyi tuapakula omuenyo wetu ku Jeova, tuemulaa okuundapesa omuenyo wetu opo tunkhimaneke Kristu. Ngotyo katupondola okuyeka otyipuka natyike tyitutyilike okuhetekela Jesus.—Mateus 5:29, 30; Filipenses 4:8.

11. (a) Oñgeni ohole yetu na Jeova na Jesus itulunda movilinga viokuivisa? (b) Oñgeni ohole itulunda okukuatesako vakuetu mewaneno?

¹¹ Ohole tuna na Jesus itulunda okuivisa nokulongesa nombili. (Mateus 28:19, 20; Lucas 4:43) Mokueenda kuomuvo Wehinangelo, okuti upondola okulipongiya opo ukale omukokoli-ndyila wapola pokati iya oundapa onoola 30 ine 50 movilinga viokuivisa? Omukuatate umwe omuhepe una omanima 84 ankho okusoka okuti kametyivili okukala omukokoli-ndyila mokonda wakulupa iya una ovitateka viekongoko. Mahi ovakokoli-ndyila vopotyilongo tyae ankho vahanda okumukuatesako. Vataindya etuku-tuku, notelitoliu ikahi nawa vapondola okukaundapa nae. Moluotyo, omukuatate oo etyivili okuundapa onoola 30. Okuti upondola okukuatesako umwe mewaneno liove opo akale omukokoli-ndyila wapola pokati mu Tyitalale na Tyikukutu? Otyili okuti hatuho tupondola okukala ovakokoli-ndyila, mahi tupondola okuundapesa omuvo wetu nonkhono mbetu opo tuundape vali unene movilinga via Jeova. Inkha tulinga ngootyo, nga Paulu, matulekesa okuti tukahi nokulundwa nohole ya Jesus. Oityi vali ohole ya Huku maitulundu okulinga?

TUNA OKUKALA NOHOLE NAVAKUETU

12. Ohole na Huku itulunda okulinga tyi?

¹² Vali, ohole ya Huku itulunda okukala nohole novakuatate vetu. Apostolu João wahoneka okuti: “Nonthyolwa, inkha ongotyo Huku etulingila oluembia, nonthue tuna okukala nohole kese umwe namukuavo.” (1 João 4:7-11) Ngotyo, inkha tuetavela ohole ya Huku, tuesukisa okukala nohole novakuatate vetu. (1 João 3:16) Oñgeni matulekesa okuti tuvehole?

13. Ongeleka patyi Jesus aava yokukala nohole navakuetu?

¹³ Ongeleka ya Jesus ilekesa oñgeni tupondola okukala nohole na vakuetu. Etyi ali pano pohi, wakuatesileko ovanthu, haunene vana vahepa. Wahakulile ovavei, novilema, novamphoki, no nompholo, novihita mulungu. (Mateus 11:4, 5) Tyelikalela nononkhalamutwe mbonongeleya, Jesus ankho una ehambu liokulongesa ovanthu vena esuko lio kunoñgonoka Huku. (João 7:49) Ankho uhole vana vahepa iya aundapa unene opo evekuatesako.—Mateus 20:28.

14. Oñgeni upondola okulekesa ohole kovakuatate vove?

¹⁴ Tupu Pehinangelo omuvo omuwa wokusoka oñgeni upondola okukuatesako ovakuatate nonomphange mewaneno liove, haunene vana vakulupa. Okuti upondola okukevetalelapo? Okuti upondola okuvetyindila okulia, nokuvekuatesako movilinga vio meumbo, nokukaenda-enda navo tyina eliongiyo liamapu, ine okuvekonga opo wende navo movilinga viokuivisa? (Tanga Lucas 14:12-14.) Yeka ohole ya Huku ikulunde okulekesa ohole kovakuatate vove.

TULEKESEI OKANKHENDA KOVAKUATATE VETU NO NOMPHANGE

15. Oityi tuesukisa okunoñgonoka?

¹⁵ Tatu, ohole ya Jeova itulunda opo tuevele ovakuatate vetu no nomphange. Atuho tuapiñgana onkhali no nonkhia ku Andau, nawike upondola okupopia okuti: “Ame hesukisile otyilikutila tyeyovo.” Ovaumbili aveho vekolelo va Huku vesukisa otyilikutila tyeyovo. Kese wike puonthue waevelwa ongele imwe onene! Omokonda yatyi tyakolela okutyinoñgonoka? Matuvasi omakumbululo mongeleka imwe ya Jesus.

16, 17. (a) Oityi tupondola okulilongesila kongeleka ya Jesus yohamba nomupika? (b) Tyina wasokolola kongeleka ya Jesus, oityi watokola okulinga?

¹⁶ Jesus waava ongeleka yohamba imwe waevelele omupika wae wemulevalele 60.000.000 yono denaliu. Mahi konyima, omupika oo ahaevela omupika omukuavo wemulevalele vala 100 yono denalui. Okankhenda kohamba ankho kapondola okumulunda okuevela omupika mukuavo. Ohamba ainumana unene etyi yeiva okuti omupika oo kaevelele mukuavo ankho wemulevala onombongo mbehehi. Emupopila okuti: “Mupika ondingavivi, ame nekuyekela ongele yange etyi wati ndyevele. Noove ñgeno ankho kuakalele nokankhenda nomupika mukuenyi ngetyi ame nakala nokankhenda noove?” (Mateus 18:23-35, onondaka pokatoi) Ngo hamba, Jeova wetuevela ongele imwe onene. Oityi ohole ya Jeova nokankhenda kae vitulunda okulinga?

¹⁷ Tyina tulipongiya pala Ehinangelo, tupondola okulipula okuti: ‘Pena otyipuka omukuatate wange andingile? Okuti tyemphuiya okumuevela?’ Inkha ongotyo, ou o muvo wokuhetekela ongeleka ya Jeova, “wokuafwapo pala okuevela.” (Neemias 9:17; Salmo 86:5) Inkha tuapanda okankhenda okanene ka Jeova, matukala nokankhenda navakuetu, nokuveevela nomutima auho. Inkha katukala nohole nokuevela ovakuatate vetu, katupondola okukevelela Jeova akale nohole nonthue nokutuevela. (Mateus 6:14, 15) Tyina tuevela vakuetu, otyo katyilekesa okuti kavetulevele, mahi matyitukuatesako okukala nehambu.

18. Oñgeni ohole ya Huku yakuatesako omphange umwe okuhesuku noviponyo vio mphange omukuavo?

¹⁸ Tyipondola okutupuiya okuhesuku noviponyo viovakuatate vetu no nomphange. (Tanga Efésios 4:32; Colossenses 3:13, 14.) Omphange umwe utiwa o Lily otyo alingile.^[1] (Tala okatoi konthyulilo yonthele.) Wakuatesileko omuhepe umwe utiwa o Carol. Mongeleka, ankho utuala Carol netuku-tuku kese oku ahanda okuenda, nokumukuatesako okukalanda ovipuka kovenda, novipuka ovikuavo vali esuka navio. Namphila ankho Lily alinga ovipuka ovio, Carol ankho umutañgunina, iya pamwe ankho katyapepukile okumukuatesako. Mahi Lily ankho utala vala kovituwa oviwa via Carol, emukuatesako omanima omanyingi alo Carol avela unene ankhi. Namphila ankho katyapepukile ku Lily okukuatesako Carol, wapopia okuti: “Ndyikevelela okukamona Carol tyina amatutiliswa. Nahanda okumunoñgonoka tyina amakala omuviuki.” Tyotyili, ohole ya Huku itulunda okuhesuku noviponyo viovakuatate vetu no nomphange iya atukevelela omuvo tyina ovanthu mavakakala ovaviuki pala apeho.

19. “Otyiawa otyinene tya Huku” tyikulunda okulinga tyi?

¹⁹ Tyotyili Jeova wetuavela “otyiawa otyinene.” Apeho matulekesa olupandu! Ehinangelo omuvo ukahi nawa pala okusokolola kovipuka aviho Jeova na Jesus vekahi nokutulingila. Oluembia lwavo lutulunda okuhetekela nawa Jesus, pokulekesa ohole kovakuatate vetu, nokuevela ovakuatate vetu nomutima auho.