Omapulo Ovatangi

Apostolu Paulu wahoneka okuti Jeova “kamayeke muyondyue alo muhevili vali okukoleleya.” (1 Coríntios 10:13) Otyo tyilekesa okuti Jeova utokola omuvo onthue tupondola okukoleleya, novitateka tukala navio?

Inkha otyo otyili, soka oñgeni tyitukalesa. Mongeleka, omona womukuatate umwe welipaa. He atyimunumanesa unene. Vapondola okulipula inkha Jeova ankho utyiyale opo atale inkha omulume oo nomukai mavetyivili okukoleleya motyitateka otyo. Mouye uno, matukala novitateka ovinyingi. Ngotyo, okuti tyaviuka okutavela okuti Jeova utala ovipuka aviho vitumonekela momuenyo wetu?

Putyina tuovolola o testu ya 1 Coríntios 10:13, tuimbuka okuti Ombimbiliya kaipopi okuti Jeova utokola omuvo onthue tupondola okukoleleya, novitateka tupondola okukala navio. Omokonda yatyi tupopila ngotyo? Tutalei omahunga ekuana.

Tete, Jeova waavela ovanthu ounongo wokuholovona. Uhanda tulinge omatokolo etu muene. (Deuteronômio 30:19, 20; Josué 24:15) Inkha tulinga omatokolo ahambukiswa Jeova, matuyumbu onthumbi mehongolelo etuavela. (Provérbios 16:9) Tyina tulinga omatokolo ahaviukile, matukala no nonkhumbi mbutundililako. (Gálatas 6:7) Ngotyo inkha Jeova uholovona ovitateka vietu, okuti ngotyo tuna ounongo wokuholovona?

Vali, Jeova ketuyakulila “kovitateka vituuhulukila.” (Eclesiastes 9:11) Omunthu upondola okukala novitateka mokonda ukahi momuvo wapenga no pomphangu yapenga. Jesus wapopia konthele yotyiponga tyimwe etyi ovanthu 18 vatokelelwe nondyuo avankhi. Wetyiyandyulula nawa okuti Huku haeko waetako otyiponga otyo opo ovanthu vankhie. (Lucas 13:1-5) Katyaviukile okusoka okuti tyina otyiponga tyihenemoneke, Huku utyiale olie mahupu iya olie mankhi.

Tatu, kese munthu una okukolela mu Jeova. Satanasi wapopia okuti ovanthu vaumbila vala Jeova mokonda yovipuka Eveavela. Satanasi wati inkha tukala novitateka, kamatutualako okukala ovakuatyili ku Jeova. (Jó 1:9-11; 2:4; Apocalipse 12:10) Inkha Jeova utuamena koviponga aviho, opo etyi tyapopia Satanasi otyili.

Kuana, Jeova kaholovona ovitateka mavitumonekela komutwe. Mahi, Jeova upondola okunoñgonoka etyi matyitumonekela komutwe, ankho uhanda. (Isaías 46:10) Mahi Ombimbiliya ipopia okuti Huku kaovola okunoñgonoka ovitateka aviho mavimoneka komutwe. (Gênesis 18:20, 21; 22:12) Jeova una oluembia iya omuviuki, otyo etuyekela tulinge omatokolo etu.—Deuteronômio 32:4; 2 Coríntios

Oityi Paulu ankho ahanda okupopia etyi ati “kamayeke muyondyue alo muhevili vali okukoleleya”? Apa Paulu wapopia yeti Jeova alinga tyina omunthu ena ovitateka natyina viamapu.a (Tala onondaka pokatoi.) Inkha uyumba onthumbi mu Jeova, mekukuatesako tyina umonekelwa na kese tyitateka. (Salmo 55:22) Matulingolesa omahunga evali alekesa omokonda yatyi Paulu apopila ngotyo.

Ehunga liotete, omokonda ovitateka vimonekela “ovanthu aveho.” Mokonda tukala mouye utuminwa na Satanasi, tukevela okukala novitateka vielikalela, alo umwe oviponga. Inkha tuyumba onthumbi mu Jeova, matutyivili okukoleleya nokutualako noukuatyili. (1 Pedro 5:8, 9) Konthyimbi yomukanda wa 1 Coríntios kapitulu 10, Paulu wahoneka ovipuka vimwe vialolele ova Isilayeli moluhandya. (1 Coríntios 10:6-11) Vana vayumbile onthumbi mu Jeova vetyivilile okukoleleya. Ova Isilayeli vamwe kavetavelele ku Jeova. Kavatuaileko okukala nekolelo mokonda kavemuyumbili onthumbi.

Ehunga lia vali omokonda “Huku omukuatyili.” Oityi tyihangununa? Tyina tutala oñgeni Jeova atekulile ovaumbili vae kohale, tyitukuatesako “okumuhumba nokutualako okutavela ovitumino viae.” (Deuteronômio 7:9) Tuelilongesa okuti omilao via Jeova apeho vitualako. (Josué 23:14) Tupondola okukala nonthumbi yokuti (1) Jeova kamayeke tukale novitateka tuhevili okukoleleya, (2) “metuavela omphitilo.”

Oñgeni Jeova “aavela omphitilo” vana vemuyumba onthumbi? Tyotyili, upondola okuvepola ovitateka. Mahi hinangela okuti, Paulu wati Jeova “memupe omphitilo, opo mutyivile okukoleleya.” Ngotyo, Jeova apeho utupameka opo tutyivile okukoleleya. Tutalei ononkhalelo mbumwe alinga ngotyo.

• Jeova “utuungumanesa mononkhumbi mbetu ambuho.” (2 Coríntios 1:3, 4) Upondola okuundapesa Ombimbiliya, nospilitu sandu, nomupika wekolelo nokualunguka opo vetukuatesako okutula omutima nokukala nomalusoke ekahi nawa.—Mateus 24:45; João 14:16; Romanos 15:4.

• Jeova upondola okutuavela ospilitu sandu opo ituhongolele. (João 14:26) Ospilitu sandu ipondola okutukuatesako okuhinangela omalondolo Ombimbiliya no nondonga mbutukuatesako okulinga omatokolo nounongo.

• Jeova upondola okuundapesa onoandyu opo mbutukuateseko.—Hebreus 1:14.

• Jeova upondola okuundapesa ovakuatate no nomphange opo vetukuateseko. Vapondola okutupameka muevi valinga, nevi vapopia.—Colossenses 4:11.

Oityi tuelilongesa monondaka mba Paulu tuavasa mu 1 Coríntios 10:13? Jeova kaholovona ovitateka patyi mavitumonekela. Mahi tupondola okukala nonthumbi yokuti, inkha tuyumba onthumbi mu Jeova, metukuatesako mu kese tyitateka tyitumonekela. Onthue tutyii okuti Jeova apeho malingi atyiho opo etukuateseko, inkha tutualako okukala ovakuatyili kwe.