Imbila Jeova Nehambu!

1. Okuimba tyitukuatesako okulinga tyi?

OMUHONEKI umwe woviimbo wankhimana wapopia okuti: “Onondaka mbutuhambukiswa, mahi tyina tuhikisa otyipuka tyimwe otyo tuimba, tyitukalesa vali nawa.” Oviimbo vietu vitukuatesako okuhilivika nokulekesa ohole yetu ku Tate yetu wokeulu, Jeova. Vitukuatesako okufuena vali kwe. Tyapepuka okuimbuka omokonda yatyi okuimba tyakolela unene mefendelo liasukuka, tyilinge tuimba atuike, ine momaliongiyo.

2, 3. (a) Oñgeni vamwe velitehelela konthele yokuimbila peulu ponthele yavakuavo momaliongiyo? (b) Omapulo patyi matulilongesa monthele ei?

² Oñgeni ove ulitehelela konthele yokuimbila peulu momaliongiyo? Okuti una ohonyi? Movilongo vimwe, ovalume vena ohonyi yokuimbila ponthele yavakuavo. Otyituwa otyo tyipondola okulingisisa ovakuatate aveho mewaneno okuahaimbi, haunene inkha ovakulu vewaneno vatalukwa novilinga ovikuavo momuvo wokuimba.—Salmo 30:12.

³ Oviimbo viakolela unene mefendelo tulingila Jeova. Tyotyili, onthue katuhande okuenda-enda momuvo woviimbo. Ngotyo, tuna okulipula okuti: ‘Oñgeni ndyilitehelela konthele yokuimba momaliongiyo? Oityi ndyipondola okulinga inkha ndyina ohonyi yokuimba ponthele ya vakuetu? Iya oñgeni ndyipondola okuimba nehambu?’

OKUIMBA TYAKOLELA UNENE MEFENDELO LIOTYOTYILI

4, 5. Epongiyo patyi lialingilwe mo Isilayeli yokohale konthele yoviimbo?

⁴ Tunde kohale, ovafendi va Jeova vaimba opo vemuhilivike. Mongeleka, etyi ova Isilayeli ankho ovakuatyili ku Jeova, okuimba ankho otyipuka tyakolela unene mefendelo liavo. Tupu, etyi David ankho ekahi nokupongiya ovipuka pala okutunga ondyuo ya Huku, waonganekele ova Levita vena 4.000 opo vahilivike Jeova noviimbo. Povanthu ovo, vena 288 ankho ‘valongeswa nawa okuimbila Jeova iya aveho ankho ovanongo.’—1 Crônicas 23:5; 25:7.

⁵ Oviimbo ankho viakolela unene putyina vapakula ondyuo ya Huku. Ombimbiliya itupopila okuti: “Vokuhika ononkhuino no vokuimba avahimbika okuimbila kumwe ngatyina wike vala, okuivalesa ondaka ike vala yokuhivilika nokupandula Jeova, etyi vakatula ondaka kumwe no nonkhuino, no nonkhiti, novipuka aviho viokuhika pokuimba pala okuhivilika Jeova, . . . mondyuo ya Huku yotyotyili amuyula omunkhima wa Jeova.”—2 Crônicas 5:13, 14; 7:6.

6. Epongiyo patyi Neemia alingile konthele yoviimbo etyi ankho atumina mo Jerusalei?

⁶ Neemia, waonganekele ova Isilayeli opo vakapindulepo ovimato vio Jerusalei, tupu waonganekele ova Levita opo vahike nokuimba oviimbo. Onkhalelo vaimbile, yaetelele ehambu enene ovanthu etyi ankho vekahi nokupakula ovimato. Neemia aholovona “ovikundyi vivali viovanthu vokuimba.” Ovikundyi ovio vivali tyina viimba, ankho vielitepuka avikelihonyenena potyimato tyili popepi nondyuo ya Huku. Ankho vaimbila unene peulu alo umwe ovanthu ankho veli kokule avetyiivi. (Neemias 12:27, 28, 31, 38, 40, 43) Tyotyili, Jeova wahambukilwe unene etyi ankho eiva ovaumbili vae vemuimbila oviimbo opo vemuhilivike.

7. Oñgeni Jesus alekesile okuti okuimba ankho matyikala onthele yakolela mefendelo lio Vakristau?

⁷ Pomuvo wa Jesus, okuimba ankho tyakolela unene mefendelo liotyotyili. Soka kuetyi tyaendele-po motyinthiki tyakolela vali momuenyo wae pano pohi. Etyi Jesus amana okulia Ondalelo ya Tatekulu novalongwa vae, avaimbi oviimbo opo vahilivike Jeova.—Tanga Mateus 26:30.

8. Ongeleka patyi ongwa Ovakristau votete vetusila konthele yokuhilivika Huku noviimbo?

⁸ Ovakristau votete vetusila ongeleka ongwa yokuhilivika Huku noviimbo. Tyelikalela nova Isilayeli ankho venda mondyuo ya Jeova opo vemufende, Ovakristau votete ankho veliongiyila vala mo nondyuo mbovakuatate. Namphila onondyuo ombo ankho hanongwa unene ngondyuo ya Huku, mahi no ngotyo Ovakristau ovo ankho vena ombili yokuimba. Apostolu Paulu wapopilile Ovakristau okuti: “Tualeiko okulongesa nokulipameka kese umwe na mukuavo noviimbo, okuhivilika Huku noviimbo viopaspilitu, nolupandu, nokuimbila Jeova momitima vienyi.” (Colossenses 3:16) Oviimbo vietu viesukisa “okuimbwa nolupandu.” Oviimbo vietu navio vilinga onthele “yokulia kuopaspilitu” kuawa “nomupika wekolelo nokualunguka momuvo wanakua.”—Mateus 24:45.

OÑGENI OVE UPONDOLA OKUIIMBA NEHAMBU?

9. (a) Omokonda yatyi vamwe vena ohonyi yokuimbila peulu momaliongiyo no movionge? (b) Oñgeni onthue tuna okuimbila Jeova iya ovalie vena okuava ongeleka? (Tala olutalatu pefo pahimbikila onthele.)

⁹ Omokonda yatyi ove una ohonyi yokuimba? Hamwe omokonda okuiimba katyilingwa unene mombunga yove ine motyilongo tyove. Ine hamwe omokonda ove utehelela oviimbo viovanthu vetyivila okuimba nawa molaliu no mo televisau iya tyina ulieleka navo usoya. Mahi, onthue atuho tuna otyilinga tyokuhilivika Jeova noviimbo. Ngotyo kuata omukanda wove woviimbo, yelula omutwe iya oimbi nehambu! (Esdras 3:11; tanga Salmos 147:1.) Mo nondyuo ononyingi mbomaliongiyo, muna ono televisau mupondola okumonekela onondaka mboviimbo iya otyo tyipondola okutukuatesako okuimbila peulu. Tupu oviimbo Viouhamba pehepano viimbwa Mosikola Yovilinga Viouhamba yovakulu vewaneno. Otyo tyilekesa okuti ovakulu vewaneno ovo vena okuava ongeleka ongwa yokuimba momaliongiyo.

10. Oityi tuna okuhinangela inkha tuna ohonyi yokuimbila peulu?

¹⁰ Ovanyingi vena ohonyi yokuimbila peulu mokonda vasoka okuti mavaimbila unene peulu ine hamwe omokonda vetupu ondaka ikahi nawa. Mahi nkhele soka kuetyi: “Ovikando ovinyingi, atuho tupengesa” tyina tupopia mahi no ngotyo katuyeke-po okupopia. (Tiago 3:2) Ngotyo, katupondola okuyekapo okuhilivika Jeova noviimbo mokonda yondaka yetu ihekahi nawa.

11, 12. Oñgeni tupondola okuimba vali nawa?

¹¹ Pamwe tyipondola tuna ohonyi yokuimba mokonda katutyii oñgeni tyiimbwa. Mahi kuna ovipuka vimwe tupondola okulinga opo tutyivile okuimba vali nawa.a—Tala okatoi.

¹² Upondola okuimba nondaka yaya peulu inkha ulilongesa okufima nawa tyina wiimba. Ngetyi onopilia mbutemesa o lanterna, okufima nawa matyikukuatesako okupopia nokuimba nondaka ikahi nawa. Wesukisa okuimbila peulu ngetyi upopia. (Tala onondonga momukanda Beneficie-se da Escola do Ministério Teocrático pomafo 181-184, mo kasapi kati: “Controle correto da respiração.”) Ombimbiliya pamwe ilunda ovafendi va Jeova opo “vakuililile nehambu” tyina vaimba.—Salmos 33:1-3.

13. Hangununa oñgeni tupondola okuimba nondaka yapama.

¹³ Mefendelo liombunga ine melilongeso lioulike linga ñga: Holovona tyimwe poviimbo uhole vali. Tangela peulu onondaka mbotyiimbo nondaka yakaluluka nokuapama. Konyima, tanga omutete wike-wike tyahafimi. Pahe oimbi nondaka yakaluluka nokuapama. (Isaías 24:14) Inkha otyo ulinga, moimbi nondaka yakaluluka nokuapama. Wahakale nohonyi yokuimba!

14. (a) Oñgeni okuikula nawa omulungu tyitukuatesako okuimba? (Tala okakasa “Como Superar Problemas Específicos.”) (b) Onondonga patyi ove usoka okuti mbupondola okukukuatesako?

¹⁴ Opo ukale nondaka yapama tyina wiimba, ikula nawa omulungu wove. Tyina wiimba ikula omulungu wove opo munyingile vali omphepo tyipona tyina upopia. Pahe, oityi molingi inkha ulitehelela okuti ondaka yove kayapamene ine ityema? Upondola okuvasa ekuateso mokakasa kati: “Como Superar Problemas Específicos,” momukanda Beneficie-se da Escola do Ministério Teocrático, pefo 184

IMBA NOMUTIMA WOVE AUHO

15. (a) Eiviso patyi lialingilwe meliongiyo lilingwa like menima mo 2016? (b) Omokonda yatyi omukanda woviimbo waviukisilwa vali nawa?

¹⁵ Ovakuatate aveho veile peliongiyo Lionombangi mba Jeova lilingwa like menima mo 2016, vahambukilwe unene etyi Omukuatate Stephen Lett alekesa omukanda omupe woviimbo una osapi yati: ‘Tuimbilei Jeova Nehambu.’ Omukuatate Lett wapopia okuti tuesukisa omukanda omupe woviimbo mokonda Ombimbiliya Tradução do Novo Mundo das Escrituras Sagradas yaviukiswa vali nawa. Oviimbo viapilululwa mokonda onondaka mbumwe mbahapopiwa vali mo Tradução do Novo Mundo mbapolwa-mo. Tupu, muayawisua oviimbo vipopia konthele yovilinga viokuivisa, notyilikutila tyeyovo. Mokonda oviimbo viakolela mefendelo lietu, Ononkhalamutwe mbo Nombangi mba Jeova valinga omukanda woviimbo ukahi nawa. Tupu, okapa katyo kelifwa no Mbimbiliya Tradução do Novo Mundo.

16, 17. Ovipuka patyi viapiluluka momukanda omupe woviimbo?

¹⁶ Opo omukanda omupe woviimbo upepuke okuundapesa, oviimbo viaonganekwa mo nosapi. Mongeleka, oviimbo 12 viokuatetekela, vipopia konthele ya Jeova iya oviimbo 8 viokulandula-ko vipopia konthele ya Jesus notyilikutila tyeyovo. Pomafo otete pena omutete wo nosapi mboviimbo aviho. Otyo tyikuatesako ovakuatate tyina vaholovona otyiimbo tyelongomona.

¹⁷ Opo ovanthu vaimbe nomutima auho, onondaka mbumwe mbayandyululwa vali nawa. Onondaka mbahapopiwa vali mbapolua-mo amupingiyua ononkhuavo. Mongeleka, otyiimbo tyina osapi yati “Okupwa-elundo” pahe tyati “Tutualeiko Noumphua-lundo” iya nonondaka mbatyo mbapilululwa. Iya tyokuati “Yunga Omutima Wove,” pahe tyati “Tuyungei Omutima Wetu.” Omokonda yatyi palingilwa omapiluluko oo? Omokonda kohale tyina omunthu aimba otyiimbo otyo, ulinga vala ngoti pena ou ekahi nokupopila. Otyo katyikahi nawa kovape, no vokuesuka notyili, novakuendye, novahikuena, veya komaliongiyo no kovionge vietu. Otyo osapi no nondaka mbatyo mbapilululilwa.

18. Omokonda yatyi tuna okulilongesa okuimba oviimbo ovipe? (Tala okatoi.)

¹⁸ Oviimbo ovinyingi momukanda omupe vikahi ngomalikuambelo. Oviimbo ovio vipondola okutukuatesako okupopila Jeova oñgeni tulitehelela. Ovikuavo vituavela ondundo opo “tukale nohole, novilinga oviwa.” (Hebreus 10:24) Tuna okunoñgonoka oviimbo no ñgeni viimbwa. Onkhalelo imwe ipondola okutukuatesako, okutehelela oviimbo viangalavalwa vikahi mo jw.org. Inkha tyina uli keumbo ulilongesa oviimbo ovio, motyivili okuimba nonthumbi iya nehambu.b—Tala okatoi.

19. Oñgeni aveho mewaneno vapondola okufenda Jeova?

¹⁹ Hinangela okuti oviimbo otyipuka tyakolela unene mefendelo lietu. Oyo onkhalelo yakolela yokulekesa okuti tuhole Jeova iya tupandula ovipuka aviho etulingila. (Tanga Isaías 12:5.) Tyina wiimba nehambu, ulunda vakuenyi navo opo vetyilinge. Aveho mewaneno, tyilinge ovakuendye, novakulu ine ovape vapondola okufenda Jeova monkhalelo oyo. Ngotyo, uhakale nohonyi yokuimba nomutima wove auho. Linga ngetyi omuhoneki wo no salmu apopia okuti: “Imbilei Jeova!” Kuilililei nehambu!—Salmo 96:1.