Tulikuatei Okapandi, Ngetyi Jeova na Jesus Velikuata Okapandi

1, 2. (a) Oityi Jesus aitile melikuambelo liahulilila alingile nono apostolu mbae? (b) Omokonda yatyi Jesus ankho apondola okusukalala nokulikuata okapandi?

MONDALELO yahulilila Jesus alia novalongwa vae, ankho wasukalala unene newaneko liavo. Etyi ankho ekahi nokulikuambela navo, wapopile okuti ankho uhanda ovalongwa vae velikuate okapandi, ngetyi ngwe elikuata okapandi na Tate yae. (Tanga João 17:20, 21.) Inkha ovalongwa va Jesus ankho velikuata okapandi, otyo ankho matyilekesa kovanthu okuti Jesus watuminue na Jeova pano pohi. Ovanthu ankho mavaimbuka ovalongwa va Jesus mokonda yohole ankho vena pokati kavo, iya ohole oyo ankho maivekuatesako okutualako okulikuata okapandi. — João 13:34, 35.

² Tupondola okunoñgonoka omokonda yatyi motyinthiki otyo, Jesus apopile unene konthele yokulikuata okapandi. Omokonda waimbukile okuti ono apostolu mbae ankho kavelikuatele okapandi. Mongeleka, ono apostolu vatañgunine konthele “yolie omunene vali pokati kavo.” (Lucas 22:24-27; Marcos 9:33, 34) Tupu, Tiago na João vaitile Jesus opo evepake pomphangu yakolela vali Mouhamba wo keulu.—Marcos 10:35-40.

3. Oityi ankho tyipondola okulingisisa ovalongwa va Kristu okuhelikuate okapandi? Omapulo patyi matulilongesa?

³ Ehando liokutumina vakuavo ankho halioko vala lipondola okutyilika ovalanduli va Jesus okulikuata okapandi. Pononthiki mba Jesus, ovanthu ankho veliyapuka mokonda youndyale, nokapungulula. Ovalongwa va Jesus ankho vesukisa okuyekapo omalusoke oo apenga. Monthele ei, matulilongesa omapulo aa: Oityi Jesus alingile etyi ankho ovanthu vemulinga okapungulula? Oñgeni Jesus akuatesileko ovalongwa vae okulilongesa okuhalingi okapungulula, nokulikuata okapandi? Oñgeni ongeleka ya Jesus, novipuka alongesa vipondola okutukuatesako okutualako okulikuata okapandi?

JESUS NOVALUNDULI VAE VALINGILWE OKAPUNGULULA

4. Popia onongeleka mbulekesa okuti Jesus walingilue okapungulula.

⁴ Alo umwe Jesus, nae walingilue okapungulula. Etyi Filipe apopila Natanaele okuti wavasa Mesiya, emukumbulula okuti: “Okuti ko Nasalee kupondola okutunda otyipuka otyiwa?” (João 1:46) Tyafuile Natanaele ankho utyii okuti Mesiya matyitilwa ko Mbelei, ngetyi omukanda wa Miquéias 5:2 upopia. Hamwe wasoka okuti Mesiya ankho kapondola okutunda mepunda-umbo lyo Nasalee. Tupu, ova Judeu vamwe ankho vapenya Jesus mokonda ankho o woko Galileia. (João 7:52) Ova Judeu ovanyingi ankho vatomba ovanthu vo mo Galileia. Ova Judeu ovakuavo, ankho vahanda okunumanesa Jesus etyi vemuihana okuti omu Samaliya. (João 8:48) Ova Samaliya ankho elongo ekuavo iya ongeleya yavo ankho yelikalela nongeleya yova Judeu. Ova Judeu nova Galileia, ankho vatomba ova Samaliya iya ankho velityilika okukala navo.—João 4:9.

5. Ovalongwa va Jesus valambelele mononkhalelo patyi mbokapungulula?

⁵ Ononkhalamutwe mbonongeleya mbo va Judeu navo ankho vetupu onthilo novalanduli va Jesus. Ova Faliseu ankho veveihana okuti “ovanthu vahinganwa.” (João 7:47-49) Ova Faliseu ankho vatomba kese omunthu wahalongesilue monosikola mbova Judeu, na vana ankho vahalandula oviso viavo. (Atos 4:13, okatoi) Jesus novalongwa vae valingilwe okapungulula mokonda ovanthu pomuvo opo, ankho velimphanda no nongeleya mbavo, novilinga viavo, notyivala tyavo. Okapungulula oko kahongiliyile ovalongwa iya nonkhalelo ankho vatala vakuavo. Opo vatualeko tyelikuata okapandi, ankho vena okupilulula onkhalelo yavo yokusoka.

6. Popia onongeleka mbulekesa okuti nonthue tupondola okuhongiliyua nokapungulula.

⁶ Hono, ovanthu mouye auho valinga okapungulula. Hamwe ovanthu vetulinga okapungulula, ine hamwe onthue tulinga vakuetu okapungulula. Omphange umwe pahe omukokoli-ndyila woko Australia, wapopia okuti: “Ankho ndyiyele ovindele. Iya otyo ankho tyivilapo tyina ndyisoka kononkhumbi ovanthikovei vamoneswa — tyilinge kohale no hono.” Tupu, ankho uviyele unene mokonda vamwe vemulingile onya. Omukuatate umwe woko Canada, wapopia oñgeni ankho elitehelela, wati: “Ankho ndyisoka okuti ovanthu vapopia o Frances vakolela vali ku vakuavo.” Ayawisako okuti mokonda yotyo, ankho uyele ovanthu vapopia o Ingelesi.

7. Oityi Jesus alingile konthele yokapungulula?

⁷ Ngo pononthiki mba Jesus, no hono katyapepukile ovanthu vapiluluke onkhalelo velitehelela konthele ya vakuavo. Oityi Jesus alingile konthele yotyo? Tete, Jesus nalumwe alingile okapungulula. Waivisile kovahona, novanthu vahepa; kova Faliseu nova Samaliya. Alo umwe waivisile kovatanthi vomalilimu, novanthu ankho veiwe okuti valinga ovipuka ovivi. Vali, Jesus walongesile ovalongwa vae okuti ankho kavapondola okulinga okapungulula, tupu weveavelele ongeleka ongwa konthele yotyo.

OHOLE NOMUTIMA WELIOLA, VIFINDA OKAPUNGULULA

8. Otyipuka patyi tyakolela tyitukuatesako okulikuata okapandi? Hangununa.

⁸ Jesus walongesile otyipuka tyimwe tyakolela unene tyitukuatesako okulikuata okapandi. Wapopilile ovalongwa vae okuti: “Onwe amuho mulikuai.” (Tanga Mateus 23:8, 9.) Tyotyili, tulikwai mokonda atuho tuvana va Andau. (Atos 17:26) Tupu, Jesus wapopile okuti ovalongwa vae velikwai, mokonda aveho vetavela okuti Jeova o Tate yavo. (Mateus 12:50) Aveho vakala ombunga ya Huku. Ohole nekolelo vievekuatesako okulikuata okapandi. Momikanda ono apostolu vahonekelele Ovakristau, veveihanene okuti ovakuatate nonomphange.—Romanos 1:13; 1 Pedro 2:17; 1 João 3:13.a—Tala onondaka pokatoi.

9, 10. (a) Omokonda yatyi ova Judeu ankho vetupu ehunga liokulimphanda mokonda yeanda liavo? (b) Oñgeni Jesus alongesa okuti tyapenga okutomba omunthu weanda ekuavo? (Tala olutalatu pefo pahimbikila onthele.)

⁹ Konyima yetyi Jesus apopila ovalongwa vae okuti vena okulitala ngatyina velikwai, ayawisako okuti vena okuliola omutima. (Tanga Mateus 23:11, 12.) Ngetyi tuelilongesa, ovikando vimwe elungavi liayapulile ono apostolu. Pononthiki mba Jesus, ovanthu ankho velimphanda mokonda yeanda liavo. Ova Judeu ovanyingi ankho vasoka okuti vakolela vali ku vakuavo, mokonda vatuka mu Abraiau. Mahi, João Batista evepopila okuti: “Momamanya omu, Huku upondola okupolamo ovana pala Abraiau.”—Lucas 3:8.

¹⁰ Jesus wapopile okuti tyapenga okulimphanda mokonda yeanda. Wetyilekesa nawa etyi omuhoneki umwe wovitumino emupulile okuti: “Olie tyili-tyili munthele yange?” Opo akumbulule epulo olio, Jesus apopi ehipululo limwe. Omulume umwe omu Judeu wavetelue no nongangala, ambumusi metapalo. Ova Judeu vamwe valambelele petapalo opo, mahi avehemukuatesako. Mahi omu Samaliya umwe akala nokankhenda nae iya emukuatesako. Jesus wamanuhula ehipululo liae mokupopila omuhoneki wovitumino okuti nae wesukisa okukala ngo mu Samaliya. (Lucas 10:25-37) Jesus walekesa okuti omu Samaliya ankho upondola okulongesa ova Judeu etyi tyihangununa okukala nohole no munthele yavo.

11. Omokonda yatyi ovalongwa va Jesus ankho vesukisa okulityilika okulinga okapungulula? Oñgeni Jesus evekuatesileko okutyinoñgonoka nawa?

¹¹ Etyi Jesus eheneende keulu, wapopilile ovalongwa vae vaivise mo “Judeia aiho, nomo Samaliya, iya alo kononthele mbokokule-kule mbohi.” (Atos 1:8) Opo vetyivile, ovalongwa va Jesus ankho vena okulityilika okulimphanda, nokulinga okapungulula. Jesus ankho upopia ovituwa oviwa vyo nongendi iya otyo tyakuatesileko ovalongwa vae okuivisa kovilongo aviho. Mongeleka, wapandulile efualali limwe lyo kotyilongo otyikuavo mokonda yekolelo liae. (Mateus 8:5-10) Mepunda-umbo lyo Nasale, Jesus wapopile oñgeni Jeova akuatesileko ovanthu vovilongo ovikuavo, ngetyi omukai omuhepe woko Salefa, na Naama woko Silia ankho una otyilundu. (Lucas 4:25-27) Jesus tupu waivisile komukai omu Samaliya iya alo umwe wakalele ononthiki onombali mo Samaliya mokonda ovanthu ankho vesuka nokutehelela etyi alongesa.—João 4:21-24, 40.

OVAKRISTAU VO TETE ANKHO VESUKISA OKUFINDA OKAPUNGULULA

12, 13. (a) Oñgeni ono apostolu mbakalele etyi Jesus alongesa omukai omu Samaliya? (Tala olutalatu pefo pahimbikila onthele.) (b) Oityi tyilekesa okuti Tiago na João kavanoñgonokele nawa etyi Jesus ankho ahanda okuvelongesa?

¹² Ankho katyapepukile ono apostolu okufinda okapungulula. Vahuvile unene etyi vamona okuti Jesus ukahi nokulongesa omukai omu Samaliya. (João 4:9, 27) Omokonda yatyi? Hamwe omokonda ononkhalamutwe mbonongeleya mbova Judeu ankho kavapopi novakai pokati kovanthu ovanyingi. Pahe soka inkha ononkhalamutwe ombo ankho mbupondola okutavela okupopia nomukai omu Samaliya, tupu ankho wiiwe okuti ulinga ovipuka ovivi! Ono apostolu vapopilile Jesus opo alie, mahi Jesus ehesuku nokulia mokonda ankho ukahi nokulongesa omukai oo. Huku ankho uhanda Jesus aivise, ku Jesus okulinga ehando lya Tate yae ankho tyikahi ngokulia. Iya otyo ankho tyakutikinya okupopia nomukai omu Samaliya.—João 4:31-34.

¹³ Tiago na João ankho kavanoñgonokele nawa etyi Jesus ankho ahanda okuvelongesa. Etyi ovalongwa va Jesus ankho vekahi nokuenda komapunda-umbo o Samaliya, vaovolele omphangu oku ankho vapondola okulala. Mahi ova Samaliya kavayekele ovalongwa valale motyilongo tyavo. Tiago na João avanumana unene, iya avaiti ku Jesus opo keulu kutunde otupia atuhanyepo epunda-umbo aliho. Mahi Jesus eveviyula. (Lucas 9:51-56) Hamwe Tiago na João, ñgeno kavanumanene unene inkha otyo tyamonekele mepunda-umbo liavo mo Galileia. Tyafuile velitehelele ngotyo mokonda valingilwe okapungulula. Etyi palamba omanima amwe, João akaivisa kova Samaliya iya ovanyingi avemutehelela. Tyafuile wakalele nohonyi mokonda yetyi aitile ku Jesus.—Atos 8:14, 25.

14. Oñgeni otyitateka tyimwe tyokapungulula tyatetululilwe?

¹⁴ Konyima yo Pendekoste yenima 33, otyitateka tyokapungulula atyimoneka mewaneno. Etyi ovakuatate ankho vekahi nokuava okulia kovahepe, vokupopia o Gregu ankho kavevepe okulia. (Atos 6:1) Hamwe valingile okapungulula mokonda yelaka liavo. Liwa-liwa ono apostolu avatetulula otyitateka otyo. Avaholovona ovakuatate epandu vali valongoka nawa opo vaave okulia. Ovakuatate ovo ankho vena omanyina o Gregu, otyo hamwe tyapamekele ovahepe ankho vapopia o Gregu.

15. Oñgeni Petulu elilongesa okuhakala nokapungulula? (Tala olutalatu pefo pahimbikila onthele.)

¹⁵ Menima 36, ovalongwa va Jesus avahimbika okuivisa kovanthu aveho. Apostolu Petulu ankho wetyiliya vala okukala nova Judeu. Huku walekesa nawa okuti Ovakristau kavapondola okulinga okapungulula. Ngotyo, Petulu akaivisa kefualali lyo Roma ankho litiwa o Korneliu. (Tanga Atos 10:28, 34, 35.) Konyima yotyo, Petulu akala omuvo omunyingi Novakristau vehe va Judeu. Etyi palamba omanima amwe, mepunda-umbo lyo Antiokia, Petulu ayekepo okulia Novakristau vehe va Judeu. (Gálatas 2:11-14) Paulu emuviyula iya Petulu etavela. Oñgeni tutyii? Omokonda etyi Petulu ahonekela omukanda ovakuatate voko Asia Menor, wevepopilile okuti tyakolela okukala nohole novakuatate aveho.—1 Pedro 1:1; 2:17.

16. Oñgeni Ovakristau vo tete ankho veiwe?

¹⁶ Ongeleka ya Jesus yakuatesileko ono apostolu okulilongesa okukala nohole “novanthu aveho.” (João 12:32; 1 Timóteo 4:10) Namphila pakalele omuvo, ono apostolu vapilululile onkhalelo ankho vatala ovanthu. Tyotyili, Ovakristau vo tete ankho veiwe mokonda yohole ankho vena pokati kavo. Menima 200 omuhoneki Tertullian wapopia etyi ovanthu ankho vapopia konthele yo Vakristau, wati: “Ankho vena ohole pokati kavo,” iya “alo umwe ankho vafuapo opo vankhie mokonda ya vakuavo.” Okulivaleka “omunthu omupe” tyevekuatesileko okutala ovanthu ngetyi Huku evetala.—Colossenses 3:10, 11.

17. Oñgeni tupondola okulipola eyembelo liokulinga okapungulula? Popia onongeleka.

¹⁷ Hono, tupu tyesukisa omuvo opo tupole momutima wetu eyembelo liokulinga okapungulula. Omphange woko França, wapopia oñgeni tyihole okumupuiya okulityilika okapungulula. Wati: “Jeova undongesa oityi ohole ihangununa; oityi tyihangununa okukala omunthu wotyali; oityi tyihangununa okukala nohole novanthu aveho. Mahi nkhele ndyitualako okulilongesa okuhalingi okapungulula, namphila pamwe tyihapepukile. Iya ndyitualako okulikuambela konthele yotyo.” Omphange umwe woko Espanha, wapopia okuti alo hono pamwe una okuluisa eyembelo liokulinga okapungulula kovanthu vamwe. Wati: “Ovikando ovinyingi ndyifinda omalusoke oo. Mahi ndyityii okuti nesukisa okutualako okulinga ononkhono. Ndyipandula Jeova mokonda ndyina ehambu liokulinga onthele yombunga yelikuata okapandi.” Atuho tuesukisa okutala nawa oñgeni tulitehelela konthele ya vakuetu. Okuti nonthue tuesukisa okulipola eyembelo liokulinga okapungulula?

TYINA OHOLE IKULA, OKAPUNGULULA KAPWA

18, 19. (a) Omahunga patyi tuna okutambula ovanthu aveho? (b) Oñgeni tupondola okutyilinga?

¹⁸ Tuna okuhinangela okuti atuho ankho tuli kokule na Huku. (Efésios 2:12) Mahi mokonda yohole ena nonthue, Jeova wetukokela kwe. (Oséias 11:4; João 6:44) Tupu, Kristu wetutambula. Wetuavela omphitilo yokukala mombunga ya Huku. (Tanga Romanos 15:7.) Namphila tuvakuankhali, Jesus wetutambula nokankhenda, ngotyo onthue katupondola okuanya vakuetu!

¹⁹ Putyina onthyulilo ifuenaina-ko, ovanthu mavatualako okuliyapuka, nokulinga okapungulula, nokuliyala. (Gálatas 5:19-21; 2 Timóteo 3:13) Mahi mokonda tuvanthu va Jeova, tuovola okukala “nonondunge mbo keulu,” mambutukuatesako okuhalingi okapungulula iya atukala ovanthu vombembwa. (Tiago 3:17, 18) Tuna ehambu liokukala noupanga novanthu vovilongo ovikuavo, nokutavela onkhalelo vasoka, iya alo umwe inkha tyitavela, tulilongesa elaka liavo. Tyina tulinga ngotyo, ombembwa yetu ikala “ngondongi” iya ouviuki wetu aukala “ngomanyonda elunga.”—Isaías 48:17, 18.

20. Oityi tyimoneka-po tyina ohole ipilulula onkhalelo tusoka, nonkhalelo tulitehelela?

²⁰ Etyi omphange woko Australia elilongesa Ombimbiliya, katutu-katutu ahimbika okupilulula onkhalelo ankho elitehelela. Ohole yapilululile onkhalelo ankho asoka nonkhalelo elitehelela. Omukuatate woko Canada upopia o Frances, waimbuka okuti ovanthu valinga okapungulula vakuavo, mokonda kavetyii oñgeni vekahi. Welilongesa okuti “ovituwa viovanthu kavitei kotyilongo atyitwa.” Alo umwe wanepa omphange upopia o Ingelesi! Onongeleka ombo mbalekesa nawa okuti ohole ipondola okufinda okapungulula. Ohole ituwaneka monkhalelo ihevilwa okuyapulwa.—Colossenses 3:14.